ڕۊو یەکشەممەی گەڕو دوۋەمو هۊرچنیەکا سەرۊکایەتی جە تورکیا لوۋا ڕاوە. دماو ئانەی ئاشکرا بی، کە ڕەجەب تەیب ئەردۆغان براوە بۍ، بەهاو لیرەی تورکی جەدەسدایۍ تاریخیش جە بۍ قیمەت بیەینە تۊمار کەرڎ. ڕۊو دوۋەشەممەی بەهاو دۊلارێوە بی بە ۲۰.۰۹ لیرۍ.

ئەردۆغان هەڵمەتەو هۊرچنیەیش سەرو زانیاریی چەواشەکارانەی و فاشیزمی ڕاوەبەرکەرڎ، جە قسەکاشەنە دماو هۊرچنیەیش ئەرەیاۋناش، وەردەوام بۊ چا سیاسەتا، کە حەتا ئیسە ڕاوەبەرش کەرڎېنۍ.

ئاژانسە میان دۊڵەتییەکۍ، شیکەرڎەیۊشا پۍ واوەی هۊرچنیەیۊ ئەردۆغانی کەرڎ، بەتایبەتی سەرنجشا وست سەرو ئابووری و ئازاڎیی جە تورکیا.

ئاژانسە میان دۊڵەتییەکۍ پرسیارەو ئانەیشا کەرڎە، ئەردۆغان تا چن متاۋۊ بەرنامە ئابوورییە ئەرەیاۋناکەیش جابەجۍ کەرۊ، ئەنجامۍ ئا هەنگاما کە پۍ زیاڎکەرڎەو مەعاشی جە دژوو هورماسای بەرزی، کە وەڵۍ هۊرچنیەکانە وەعدش دابۍ، دماو هۊرچنیەکا بە تەمامی ڕۊشنۍ باوە.

جە شیکەرڎەیۊکانە ئاماژە پانەیچ کریان، کاول بیەو ئا مەنتیقا کە بوومەلەرزەی دۍ ۋنە ٣٤ ملیار دۊلارۍ زەرەرش بە تورکیای یاۋنان و ئاینڎەو ٣.٤ ملۋېن کۊچبەرا سوریچ چا ۋڵاتەنە ڕۊشن نیا.

حەسەن مالیک جە کۊمپانیاو تەلیمەری جە دوبەی هۊرسەنگنای پۍ ئامار و داتا ئابوورییە وەڵېکۊتەکا مکەرۊ و ۋاتش، "هۊرچنیەو ئەردۆغانی ڕا بە سەرمایەگوزاری حیچ سەرمایېوە بیانی مەڎۊ" و ۋاتش، "ئابووریی تورکیای ئینا قەیرانێوە گۊرەنە، کە کاریگەریش سەرو سەرمایەی هەن و هورماسای فرە بەرزا، ڕێژەو سووی فرە کەما و حیچ ئیحتیاتېوە پۍ فاڕایۊ سەرمایەی پرۊژەکانە نییا. تەنیا خاڵەی وەشبەختی پۍ خەڵکی ئانەن، کە هومېڎەوارۍ با ئەردۆغان گېڵۊوە پۍ سەرو سیاسەتو ئابووریی ئۊرتۊدۊکسی."

ئابوریناسی ئەمەریکی ڕۆجەر مارک ئاگایی مڎۊ، کە بە ئەگەرېوە فرۊ قەیرانەو هامسەنگی زەڕدای جە تورکیا قووڵتەر بۊوە و کۊنترۊڵکەرڎەی سەرمایەیچ زیاتەر بۊ. ۋاتش: "ئەگەر ئا سیاسەتۍ نەفاڕیا، تورکیا بەرەو قەیرانێوە ئاست بەرزی جە زەڕدای و فاینانسکەرڎەی ملۊ. ئەگەرش فرەن، کۊنترۊڵکەرڎەی سەرمایەی زیاتەر کریۊ. چانەینە ئی ئاژە بۊ بە مەڵامەتو ئانەی، کە ئینسان بە زۊر ناچار پانەی کریۊ، کە دۊلار کەرۊ بە لیرە؛ ئەگەرو ئانەیچ هەن، کە تورکەکۍ نەتاۋا قەرزەکاشا جە بەرو ۋڵاتیوە بڎاوە."

هـ .ش