ڕووانە جە کوردسانەنە جەخت سەروو سیاسەتوو تاونایۆ (ئاسیمیلاسیۆن)ی کریۊوە و پێسە بەشێوە جە سیاسەتوو جەنگی تایبەتی ملۊڕاوە، مافوو ۋەنای، تەندروسی و خزمەتگوزاری گرڎیی بە زۋانی ئەڎایی دڎانش مەنریۆ پۊرە. هامسەرۆکەو لقوو ئەیتیم سەنی ئامەڎیی ساڵیحا زورلوە سەرنجش وست سەروو ڕێبازوو حکومەتی بەنیسبەتوو پەشتگۊش وستەی داواکاری ۋەنای بە زۋانی ئەڎایی گەلوو کوردی.

زورلوو واتش: "کێشەو کوردی جە سەرەتاو دەسپنەکەردەو کۆماریوە دەسش پنەکەرد،  تا ئیسەیچ بەردەواما، تا ئا حەدەی کە سیاسەتەکۍ تاونایۆ و ئەسڕیەیۆ بیێنۍ مەڵامەتوو ئانەی کە کێشەو کوردی ئیتر تەنیا کێشێوە دلێینەو تورکیای نەبۆ بەڵکم بیەن بە کێشێوە کە گرڎوو بەشەکا ۋەرکەوتوو دلێڕاسەینە وەڵا بیەنۆ، بەتایبەتی دماو کودەتاکەو ١٢و ئەیلوولی، سیاسەتوو نیولیبراڵی جە لێوە بەردەوام بۍ، جە لێوەتەریچۆ، بە سیاسەتی ئەمنی جە هەرێمە کوردییەکانە، بەرهەمئاردەی جە کوردسانەنە بەتەمامی ڕاگیریا و فشارێوە قورس وزیا سەروو گەلوو کوردی، سەرەڕاو ئی فشارا کورد جە ڕاو دیالۆگیوە داواو چارەسەری دیموکراتیکی کەرۆ کە پێویسا دەموودەس ئەنجام بڎریۆ.

سیاسەتوو ئەسڕیەیۆ ئشناسنامەی ملۊڕاوە

زۆرلوە ئاماژەش پانەی دا کە قەڎەغەکەردەی زۋانی کوردی ئاژێوە تازە نییا و واتش: "یۆ جە تنتەرین وئاشکراتەرین سیاسەتەکا جەنگی تایبەتی جە گرڎوو مەجالەکانە قەڎەغەکەردەی زۋانی ئەڎاییا. بێ ئەرزشکەردەو ئشناسنامەی و زۋانی و کولتووری بە کەم تەماشەکەردەی و بیەو ئا گەلەیە هەژمار کریۆ. سیاسەتوو ئەسڕیەیۆ ئشناسنامەی پەیڕەو کەرا. هەتا زۋانی ئەڎایی پێسە زۋانوو پەروەردەی نە وزیۆ دلۍ پرۆگراموو ۋەنایۆ، ماناو بێ ئەرزشکەردەیا. ئێمە باسوو زۋانێوە کەرمۍ کە نزیکەو ٧٠ ملۋێن کەسا قسێش پنەکەرا، زۋانی کوردی یۊن جە زۋانە قەڎیمیەکا جە زۋانە ئاریاییەکا، بەڵام حۊڵوو دلێنەبەردەیش مڎا، بەتایبەتی بڕۍ جە زاراوەکاش ئینۍ لێواروو دلێنەشییەینە و تەنیا گەلوو کوردین پەی زۋانەکەیش کۊشیای کەرۆ."

مشۊم دەسەڵات هەنگامەی پێویسە بنیۆ

زورلوە واتش: "مەبۆ زۋان و شوناسوو گەلێوە لاواز هەژمار کریۆ پێویسا کێشەو کوردی چارەسەر بکریۆ پۍ ئانەی ژیۋایۍ بە ئشناسنامە و زۋانوو گەلیوە بنیاڎ بنریۆ، ئینە کێشەو کوردین، مشۊم هەلومەرج پۍ پەروەردەی بە زۋانی ئەڎایی وەش کریۆ، پێویسا کێشەو کوردی چارەسەر بکریۆ، پۍ ئینەیچ ئەژنەوای ڕۊشنا، مشۊم دەسەڵات هەنگامەی پێویسە هۊر گێرۆ."