جە هیلدسهایم یاڎوو گەشمەرڎا ۋەرنیشتی و پاریسی بەرزڕاگیریا
شاروو هیڵدسهایم و ئەڵمانیاینە یاڎوو گەشمەرڎا کۊکوشی پاریسی و ئا کەسا کە جە هجومە ئەرەگیریەکانە پۍ سەروو ۋەرنیشتی گەشمەرڎۍ بیۍ، بەرزڕاگیریا.
بە سەرمەشقایەتی رێکوزیاکاو یانگ ستروگلی و ژەنە گەنجا زۆرای جە ناوەنڎوو جەمەو دیموکراتیکی کوردی جە هیڵدسهایم چالاکی یاڎکەردەیۆ لوواڕاوە.
دماو دەیەقېوە بێدەنگی پۍ رێز ۋنەگېرتەی جە یاڎوو گەشمەرڎا جەبارەو مژارەکەیۆ وتارۍ پێشکەش کریۍ و چنەشەنە ئاماژە پانەی کریا، "ئێمە بە زۋانی جیاجیایچ قسۍ کەرمۍ، جە مەنتیقۍ جیاجیاو جەهانیچەنە بیمۍ، سەرگوزشتە و ڕازەکېچما جیاوازۍ با، چېوېوە هامبەشما هەن: گرڎما جە لایەنوو سیستمیوە چەوسیەیمۍ، ئا سیستمە حیج بە ئێمە مەبەخشۆ. ئێمە ئینایمۍ پەشتەو جمیەرە دژە سەرمایەدارییەکا، شۆڕشگێڵنا و وەڵېکۊتەوازەکاوە مردمۍ و شارەکاما بە پەشتیوانی میان نەتەوەیی رێکوزمۍ و کۊشیای ئانەی بەرمۍ ڕاوە؛ ئا جەنگ و ئەرەگیری و فشارۍ کە کریا ئۆباڵەکەش ئینا ئەستۆو وڵاتا ئەوروپاینە".
جە یاڎەکەنە بەڵگەفیلمێوە نمایش کریا. یاڎەکە بە دروشمەکاو "گەشمەرڎۍ مەمرا"، "بژیۋۊ مدرامانوو ۋەرنیشتی" و "بژیۋۊ مدرامانوو گەریلای" دمایش پنە ئاما.
