جاڎەکا سەماوە ینە بە چالاکیی هونەریی یادوو ئەنفالی کریاوە
کەسوکارو ئەنفال کریایا جە مەنتیقە جیاجیاکا پانیشتوو کوردسانیۆ ڕووەشا کەردە شارو سەماوەی، پەی ئاشناکەردەی خەڵک و شارەکەی بە کارەساتو ئەنفالی، جەناوەندو شارەکەینە چالاکی هونەری ئەنجامدریا.
دماو ئانەی شاڵاوەکا ئەنفالی بە هەشت قۆناغێ جە لایەنو ڕژێمو بەعسی وڕایۆ ساڵەو ١٩٨٨ ئەنجامدریا زیاتەر جە ١٨٢ هەزار کورد زیندەبەچاڵکریێ، پێسەو تەمامکاریێوە پەی پرۆسەکەی بە هەزارەها کوردی کە فرەیشا ژەنێو و زاڕۆڵێ بێنێ، ماوەو پەنج مانگا جە زیندانەکا نوگرەسەلمانو سەماوەینە ڕاگیریۍ، دماتەر جە ڕۆڵە و کەس و کارەکاشا بڕیێ. جە ئیسەنە پێسەو بۆنێوە ساڵانە کەسوکاروو ئەنفالکریایا بە گردو ئا کەسا جە نوگرەسەلمانەنە زیندانی کریێ، سەردای ئا قەڵایە کریا.
پەی ئا مەبەسەیە ئارۆ سەدان کەسێ جە کەسوکارو ئەنفالی و تاقانەکا ئەنفالی، چالاکوانا و ئەنداما ڕیکوزیاکا جە شار و شارۆچکەکا کەلار، کفری، کۆیە، هەڵەبجە و بلە و بارزان ڕووەشاکەردە شارو سەماوەی.
پەی ئاشناکەردەی ئەرەنیشتا شارەکەی بە تاوانەو ئەنفالی، سەرو جادە سەرەکییەکا سەماوەی شانۆو "پیای ئاڵتونی" بە زوانی وکوردی جەلایەنو شانۆکار پشکۆ حەمەڕۆستەمی پێشکەشکریا و شعرێوە دەربارەو کارەساتو ئەنفالی بە زوانو عەرەبی جەلایەن و شاعیر عەلی نارێنی ونریاوە. هەرپاسە پێشانگێوە نمونەی پەی نیشاندای قوربانیا ئەنفالی نیشان دریا، ژمارێوە فرە جە ئەرەنیشتا سەماوەی دەورو چالاکییەکەینە کۆبیێوە.
دماتەر وتارەو کەسوکارو ئەنفالا بە هەردووە زوانی کوردی و عەرەبی ونریاوە و دماتەر بەرەو نوگرەسەلمان کەوتیڕا.
