جمیەروو گەنجا شۆڕشگێڵنی (تەجەشە) کە ڕێکوستەیۍ چەترئاساو گەنجاو کوردسانین جە ئەوروپا، بە بەشداری هەزار کەسا جە وڵاتا ئەڵمانیا، فەرەنسا، سویسرا، هۆڵەندای و فرېوە جە وڵاتا ئەوروپای، یەرەمین کۆنگرەو ۋېش جە پایتەختوو فەرەنساینە ڕاوەبەرکەرڎ. گەنجەکۍ پۍ ڕېزگېرتەی جە کەسایەتی گەشمەرڎا دیدار هارون، بەرخۆدان چیاگەر، باران ماوا و تاڤین تێکۆشین و  گرڎوو گەشمەرڎا ئاخېزی بە دەیەقېوە بێدەنگی دەسشا بە کۆنگرەی کەرڎ.

جە کۆنگرەو یەرەمینە کە چېروو دروشمەو "وېت بە ڕېکوستەی کەرەو، ڕابەر ئاپۆی ئازاڎ کەرە"لوواڕاوە، گەنجا شۆڕشگێڵنی و بنەیانەو گەشمەرڎا کوردسانی ئەوروپانە، گەنجا دیموکراتیکی، شۆڕشگێڵن، وڵاتپارێز، چەپ و سۆسیالیستەکۍ بەشدارۍ بېنۍ.

دماو دەیەقېوە جە ڕێزگېرتەی، ڕۆنامەنوویس سەفکان کۆبانێ دەسش بەقسەکەرڎەی کەرڎوو واچېوە ڕابەروو گەلوو کوردی عەبدوڵا ئۆجالانیش ۋیرئارڎۆ کە واتەبېش"بە گەنجی دەسما پنەکەرڎ و بە گەنجی سەرۍ گنمۍ."

کۆبانێ ئاماژەش پانەیچ کەرڎ، جە سایەو کۊشیای ئازاڎیی عەبدوڵا ئۆجالانیۆ، گەنجەکېما بیۍ بە ساحیبوو ئشناسنامە و ژیۋایۍ ئازاڎیی، و ئاماژەش پانەی دا ئا گەنجۍ کە دوورېنۍ جە ڕێکوستەی و ئینۍ چېروو کاریگەری شێوازە تایبەتەکاو جەنگوو دوژمنینە و ڕۆ دماو ڕۆی جە حەقیقەتوو ۋېشا دوورۍ گناوە. کۆبانێ ۋیرش ئارڎۆ کە تەنیا چن ڕووېوە کەم مەنەن پۍ ساڵەو ٢٠٢٤ و ئەرەیاۋناش کە جە دەوروو پارادایموو عەبدوڵا ئۆجالانینە پەنەوازەن گرڎ بوارەکانە ڕێکوستەی سەروو ژیۋای ئازاڎیی و کۊشیای پۍ ئازاڎیی جەستەیی عەبدوڵا ئۆجالانی پەرەش پنە بڎریۆ.

حەرپاسە گەنجاو ئەنداما تەجەشەی ڕۊشنشا کەرڎۆ کە گرڎوو ئا چالاکییا کە تا ئیسە بە سەرپەرەشتی ڕێکوستەی گەنجا ئەنجام دریېنۍ پۍ ئازاڎیی جەستەیی ڕابەروو گەلوو کوردی عەبدوڵا ئۆجالانی بیېنۍ و ئاماژەشا پانەی دا کە بە ئیراڎۆ کۆنگرەکەیشا پۍ ئازاڎیی عەبدوڵا ئۆجالانی و ڕزگاری کوردسانی کۆنگرەی یەرەمشا دەس پنەکەرڎەن.

حەرپاسە گەنجەکۍ ئەرەیاۋناش، کە سیستموو سەرمایەداری کۊتەن دلۍ پرۆسەو خنیکیایۆ و گرڎوو جەهانینە بە شێوازوو جەنگی بۍ ئەخلاقی هجوم کەرۆ سەروو گەنجا.

جە بەشېوەتەروو قسەکاشانە گەنجەکۍ ئەرەیاوناشا، کە ئاخېزوو ۋەرنیشتی بە ئایدۆلۆژیاو ڕابەروو گەلوو کوردی عەبدوڵا ئۆجالانی بیەن بە نموونە پۍ گرڎوو جەهانی و چی پرۆسەو بێ چارەیی و پەڕ جە شلۊقیەینە، پۍ ئانەی ئاخېز گرڎوو جەهانیەنە سەرکەوتە بۆ، پەنەوازش بە دینامیزم و سەرمەشقایەتی گەنجان.

 گەنجەکۍ ئەرەیاۋناش، گەورەتەرین دوژمنوو ئیراڎەو ئازاڎیی کوردی هامکاری کەرڎەی فاشیستۍ پېسە ئاکەپە – مەهەپەیا و دەس نیشانش کەرا جە دژوو تاوانە بۍ ئەخلاقیەکاو هامکاری فاشیستی، ئاڎۍ بە کۊشیایشا عەبدوڵا ئۆجالانی ئازاڎ کەرا و سەرۍ گنا.