شەوەی ۋېیەردۍ جە پەراوێزو خولو ٥١و گلېرۆبیەو ئەنجومەنو وەزیرا جبەرو ڕێکوزیاو هامکاری ئیسلامی جە ئەستەنبوڵ، ئەنجومەنو کۆمکاری وڵاتا عەرەبی بە ئامادەبیەی عەباس عێراقچی، وەزیرو جبەرو ئێرانی گلېرۊبیەو نائاسایی ۋێش بینا، جە گلېرۊبیەکەنە هرووژمو وڵاتو ئیسرائیلی پەی سەرو ئێرانی ئیدانە كریا.

سەرو داواو فواد حسێنی، وەزیرو جبەرو عێراقی هێزی شەوۍ دێرۍ، ئەنجومەنو کۆمکاری وڵاتا عەرەبی، بە مەبەسو ئیدانەكەردەی هرووژمو ئیسرائیلی پەی سەرو ئێرانی، گلېرۊبیەو نائاسایی ۋێش بینا.

جە گلېرۊبیەکەینە بە ئەرەیاۋنێوە، كە جە ١١ خاڵا پێكئامابۍ وەڵا کریاوە، كە گرنگترینشا ئینێنۍ:

١- ئەنجومەنو کۆمکاری عەرەبی هرووژمو ئیسرائیلی پەی سەرو ئێرانی سەرکۆنە مەکەرۆ، کە بەپاو پەیماننامەو نەتەوە یۆگێرتەکا خاوەنو سەروەرییا، چونكی ئا هەنگامۍ ئاسایش و سەقامگیری ۋەرکۊتوو مېیامینی وزۆنە چېرو تەرسۍ.

٢- داوا جە گلېرگەی مېیاندەوڵەتی و بەتایبەتی وڵاتا ئەنجوومەنو ئاسایشی مەکەرمۍ، کە بە دەورو ۋێشا هۊربېزا و وڵاتو ئیسرائیلی مردنا جە دەسدرێژی پەی سەرو وڵاتێوە خاوەن سەروەری.

٣- داواو پارېزنای ئاسایشو دەریاوانی، سەقامگیری ۋەرکۊتوو مېیامینی و هاڵیکەردەیۆ ۋەرکۊتوو مېیامینی جە چەکی ئەتۆمی مەکەرمۍ.

هامكات، ڕۆو ١٣و ئی مانگۍ ئیسرائیل جە ڕاو دەیان مووشەکا و فڕۆکەی جەنگییوە هرووژمش کەرڎ سەرو ئێرانی، پێگە سەروازی و ئەتۆمییەکێش جە سەرانسەرو ئێرانینە کەردۍ ئامانج و جە ئاکامەنە زیاڎ جە ١٠ ۋەرپەرسا باڵاو ئەمنی و سەروازیی و زانۍ ئەتۆمیۍ ئا وڵاتەیە کوشیۍ.

یاگۍ ئاماژەیەنە، جە جوابو هرووژمەکا ئیسرائیلینە سوپاو پاسدارا ئۆپەراسیۆنو “قەولو ڕاسی٣”ـێشا ئەرەیاۋنا و جە ڕاو زنجیرێوە هروژمی مووشەکیۆ دەیان یاگۍ ئیسرائیلیش کەردۍ ئامانج.