سەبارەت بە گۆشەگیری رەهاو سەرو رابەرو گەلوو کورڎی عەبدوڵا ئۆجالانی و چارەسەریی سیاسی جە ۋەرکۆتوو مېیامینینە، شارو جنێڤو سویسراینە کۆنفڕانسێوە سازکریا.
چېرو نامۍ "جە ۋەرکۆتوو مېیامینینە چارەسەری سیاسی: فەلەستین-کورڎەسان- ئینتفازە-سەرهۆردای" بە سەرمەشقایەتی ناوەندو جەمەو دیموکراتیکی کورڎی جنێڤەنە (نەجەدەکە-گە)ی و یۆبیەو ژەنا کوردی سویسرای (یەژەکە-سە) جە هۆڵو ئامفی تیاترۆو زانکۆو کارکەری جنێڤینە (Université ouvrière de Genève)کۆنفڕانسێوە سازکریا.
پارتو شۆڕشگێڵنی کۆمۆنیستی و تۆڕەو سەرهۆرداو ئینترناسیۆناڵیستی پاڵپەشتۍ کۆنفڕانسەکەی بێنۍ. پەرلەمانتارەی وەڵینەو هەدەپەی ئایشە ئاجار باشارانیە، نوێنەرو پارتو سۆڕشگێڵنی کۆمۆنیستی لوک رۆلی، جە کۆمیتەو پەشتیوانی جە ۋەرنیشتی چالاکوانە نادیانە و جە تۆڕەو پەشتیوانی جە فەلەستینیچ نونەرێوە پېسە قسەکەرۍ بەشدار بۍ.
جە وتێوەنە ئایشە ئاجارە ئاماژەش بە پیلانگێڵنی ٩و تشرینو یووەمو ١٩٩٨ جە دژو رابەرو گەلوو کوردی عەبدوڵا ئۆجالانی کەرڎ و یاڎش ئاورڎۆ کە زیاتەر جە ٢٥ ساڵان زیڼانو ئیمرآڵینە گۆشەگیری و سیستەمو ئەشکەنجەی هەن.
ئانەیچش وست ڕووە کە ئەشکەنجەو گۆشەگیری ئیمراڵی چېرو کۆنترۆڵینە و ۋەروچەما دۆڵەتا مېیاننەتەوەیۆ ملۆڕاوە، ئا ئەشکەنجە بەتەمامو وڵاتەکەیرە وەڵا بیەنۆ. ئانەیچش وست ڕووە کە، جە ڕاو هرووژمی ئەرەگیریوە پەی سەرو کورڎەسانی، سیاسەتو قڕکەردەی گەلوو کوردی، زۋانی کوردی، ژیۋگە، ژەنا و زاوڵا کوردی پەیڕەو مکریۆ.
جە بەشێوەتەرو قسەکاشەنە ئایشە ئاجارە باسش جە هەڵمەتەو مېیاننەتەوەیی 'ئازادی پەی عەبدوڵا ئۆجالانی، چارەسەری دیموکراتیک پەی پەرسو کوردی' کەرڎ کە جە ١٠و تشرینو یووەمو ٢٠٢٣ێوە دەسشپنەکریان و چا روانگۆ جەختش کەرڎۆ، کە پەشتیوانی دۆساو گەلوو کوردی ئینترناسیۆناڵیستەکا چا هەڵمەتۍ گرنگا و دەورش جە سەروستەیشەنە مەبۆ.
لاو ۋێشۆ لوک رۆڵی نوێنەرو پارتو شۆڕشگێڵنی کۆمۆنیستی باسش چانەی کەرڎ، کە سیستەمو سەرمایەداری بە تایبەتی ناتۆ کە ئینا چێرو هەیمەنەو ئەمریکاینە پەی فراوانکەردەی هەژموونو ۋێش و ناوچەکا چێرو کاریگەری ۋێش، گەلا مڎۆ جەنگ.
واتیچش: ئا هرووژمۍ کە دەیان ساڵێن دۆڵەتا تورکیا و ئیسرائیلی ئەنجامشا مڎا، جەنگی جەهانی یەرەما کە هێزەکاو سەرمایەداری جە دژو گەلا ۋەرکۆتوو مېیامینی و تەمامو جەهانی ڕاوەبەرش مکەرا.
رۆڵی ئاماژەش پانەیچ کەرڎ کە جە ڕاو شۆڕشو ۋەرنیشتی و ئەرەکۊشای ئازاڎیی کوردی و ئەرەکۊسای گەلوو فەلەستینیوە رۆحو مڎرامانی جە دژوو سیستەمو سەرمایەداری خوڵقیان و واتش، "پا ئەرەکۊشایا مافو دیاریکەردەی چارەنویسو گەلا ۋەرکۆتوو مېیامینی مسۆگەر مەبۆ و ڕاو کۆنفیدڕاڵیزمی کۆمەڵایەتی و دیموکراتیکی دیاری مکریۆ کە ئانەیچ رزگاری گەلاو ۋەرکۆتوو مېیامینی و جەهانیا".
دماو قسەکا لوک رۆڵی، پانێلی دووەمو کۆنفڕانسەکەی دەسشپنەکەرڎ و چنەشەنە نوێنەراو تۆڕەو پەشتیوانی جە ۋەرنیشتی و تۆڕەو پەشتیوانی جە فەلەستینی قسێشا کەرڎۍ.
دماتەر جە بارەو هەڵمەتەی مېیاننەتەوەیی 'ئازادی پەی عەبدوڵا ئۆجالانی، چارەسەری پەرسو کوردی'نە گفتوگۆ و ڕا فاڕایۆ ئەنجامدریا و دماتەریچ بەشدارا کۆنفڕانسەکەی پۆستەرەکۍ رابەرو گەلوو کوردی عەبدوڵا ئۆجالانیشا بەرزۍ کەردێوە و پی جۆرە کۆنفڕانسەکە دمایش پنە ئاما.
