جوانێوە وەختوو کۆڵبەرینە رەقبیۆ
جە مەنتیقێوە سنووریی شاروو سەقزوو ۋەرکەوتوو کوردسانینە کۆڵبەرێوە جوان جە وەختوو کۆڵبەرینە رەقبیۆ و یەرۍ کۆڵبەرۍ تەریچ، کە دوێشا جوانێنۍ بە تەقەو هێزەکاو دەوڵەتوو ئێرانی جە نەوسوڎە، مەریوان و بانەنە زامڎار کریۍ.
بە پاو هەواڵێوە تۆڕەو مافەکا مرۆڤوو کوردسانی شەوەو یەکشەممەی جوانێوە بە نامۍ هەستیار عەبدولکەریمی جە وەختوو کۆڵبەرینە جە مەنتیقەو سنووری میشیاوو سەقزینە بە مەڵامەتوو سەردایۆ رەقبیەنۆ و عەمرەو خوڎایش کەردێنە.
هەر چا ڕووەنە کۆڵبەرێوە تەری جوان بە نامۍ میلاد حسێنی جە مەنتیقە سنووریەکا مەریوانینە، جوانێوە تەر بەنامۍ ئاورین حەقانی جە مەنتیقە سنووریەکا بانەینە و کۆڵبەرێوەیچ بە نامۍ جەمیل عەبدی جە نەوسوڎەنە بە تەقەو هێزەکاو پاسەوانوو سنووری ئێرانی زامڎارۍ کریۍ.
جە سەرەتاو ئی حەفتەیۆ دووۍ کۆڵبەرۍ بەتەقەو هێزەکا دەوڵەتی کوشیێنۍ و دووۍ کۆڵبەرێچ بە مەڵامەتوو مردای دڵی و رەقبیەیۆیۆ عەمرەو خوڎایشا کەردێنە و لاو کەمیۆ ٧ کۆڵبەرێچ زامڎارۍ کریێنۍ.
بەپاو ئامارەکا تۆڕەو مافەکا مرۆڤوو کوردسانی، مانگەو سیاوکامینە ٨ کۆڵەبەر و کاسبکارۍ جە مەنتیقە سنوورییەکا ۋەرکەوتوو کوردسانینە بەمەڵامەتوو تەقەو هێزەکا دەوڵەتیۆ، جە سەختینە کۊتێنێرە واری و ڕووەدایەکا ئاماو لوایۆ جە وەختوو لواینە پۍ مەنتیقە سنوورییەکا گیانشا جە دەسدان.
حەر چا ماوەنە ٤٧ کۆڵەبەرۍ و کاسبکارۍ کوردی زامڎارۍ کریێنۍ کە فرەیشا جە تەرەفوو هێزەکاو دەوڵەتیوە کریێبێنۍ ئامانج.
هاموەخت بە پاو ئامارێوە کۆڵبەر نیوزی جە ساڵەی ویەردۍ کوردینە ٤٤٤ حاڵەتۍ کوشتەی و زامڎار بیەی کۆڵبەرا جە مەنتیقە سنووریەکانە تۆمار کریێنۍ.
