گەلوو سەرنیشتوو وەرکەوتوو سووریای بە بەشداری دەزگا و ڕێکوزیاکا ئیدارەو وێ ڕاوەبەری دیموکراتیکی و مانگو سووری کوردی، ڕۆو ١٧و ئاداری، کاروانو یوەمو هامکارییە مرۆییەکاسا ڕەوانەو شارە کەناراوییەکا سووریا کەرد، هاوکارییە مرۆییەکێ کە پێکئامێبێنێ جە ٦ هەزار پاکەتێ واردە و ٢ هەزار و ٥٠٠ پاکێتی پاک کەرەوێ و ٣٥٠ تۆنێ ئاردێ جە ناوچەو کەناراوییەکا سەرو قوربانیا کۆمکوژیەکەی دابەشکریا.

ئامادەکارییەکێ پەی کاروانو دووەمو هامکاریی جە ١٠و نیسانیۆ دەسش پنەکەردەن و جە ١١و نیسانی جە قامیشلۆنە کەوتەن ڕا. کاروانو هامکارییەکا جە ١٢و نیسانیۆ جە تەبقاوە بەرەو شارە کەناراوییەکا کەوتەن ڕا، کاروانو هامکاری دووەمی ١٤هەزار پاکێتی واردەی و پەنەوازیێ پزیشکیێ گێرۆ وێ. شیرین سلێمان خەلیلە واتەواچەو نووسینگەو ژەنا مانگەو سوورو کوردی، کە بەشدارەنە جە یاوناو کاروانو یوەم و دووەمو هامکاریە مرۆییەکا سەبارەت بە گلێرکەردەیۆ هامکارییەکا مانگو سوورو کوردی و دۆخو گەلا ئەرەنیشتێ شارە کەناراوییەکا پەی ئاژانسەکەیما قسێش کەردێ.

بە جۆش و وەشیێ فرە ئامێ پێشوازیماوە

شیرین سلێمان خەلیلە ئاماژەش بە کۆمکوژیی دژو عەلەویە ناوچە کەناراوییەکا کەرد و ئەرەیاوناش؛ زەرەرێ فرەشا پنەیاوان، بەمەڵامەتو ئا کۆمکوژییۆ تەرسێ فرە نیشتێنە گلێرگەو عەلەویەکا و سەریش هوردان، بەمەڵامەتو کۆمکوژییەکاوە نمەتاومێنە یانەکاشانە بەیا چبەر و پەنەوازی ڕوانەشا دابین بکەرا. زاڕۆڵەکێشا مەلانە وانینگە و تەنانەت مەلانە چبەریچ پەی گەمە کەردەی."

شیرین سلێمان خەلیلە ئانەیشش ئەرەیاونا، مانگەو سووری ئیدارەو وێڕاوەبەری دیموکراتیکو سەرنیشتوو وەرکەوتوو سووریای بە جۆش و خرۆشێوە فرە جەلایەنو گەلوو عەلەوییەکاوە پێشوازش ونە کریا، جە یوەم کاروانمانە بە شێوێ عال پێشوازیما ونە کریا.

'ئێمە بەردەوام ئامادێ یاوناو هامکارییەکانمێ'

شیرین سلێمان خەلیلە ئەرەیاوناش کە مانگەو سوورو کوردی هامکارییە مرۆییەکا بە ئەرک و وەرپرسیارێتی وێس مزانۆنە و واتش: "چنی فرە جە ڕێکوزیاکا ناوچەکەی، سەرەتا کۆنگرە و ستاری و ڕێکوزیاو هامکاری میزۆپۆتامیای ئینایمێ پەیوەندینە. بەمەڵامەتو پەنەوزییەکا گلێرگەو عەلەوی، قەرارما دا هامکارییەکا یاونمێنە کەناراوەکا. ئیسە عەلەویەکێ پەنەوازیشا بە هامکاری و پەشتیوانیا."

' ئاستەنگیەکێ هیچ کاریگەریشا نەیپڤپبییەن'

شیرین سلێمان خەلیلە ئاماژەس پانەیەدا کە کارەوانو هامکاری یوەمی ڕووبەڕوو ئاستەنگی بییەنۆ حکومەتو دیمەشقی ڕاش پنە نەرایمێ بە لۆگۆو مانگو سوورو کوردیۆ هامکارییەکا یاونمێنە کەناراوەکا، جە ئەنجامنە لۆگۆکێما لابەردێ. وشکنای فرە ئەنجامدریا ئێمەچ هیچ دژایەتی و گێڵای و وشگناکەیما نەکەرد چونکە تەنیا ئارامانجو ئێمە یاوناو هامکارییەکا بێ. پۆکەی ئێمە نەتاوێنمێ گەلوو عەلەوی بە تەنیا جیا بازمێنە."

'پەنەوازا ڕێکوزیا مییاننەتەوەییەکێ پەشتیوانی جە مانگەو سوورو کوردی بکەرا'

شیرین سلێمان خەلیلە جە دماین و قسەکاشەنە ئەرەیاوناش کە بە کارەوانو یوەمو هامکارییەکێما یاونێنێ نزیکەو ٦٠ دەگایا و واتش: "ئێمە زیاتەر گرنگیما با کەسا دان کە قوربانی کۆمکوژییەکەی بێنێ و  جە بوارو دارایینە لاوازێ بیێنێ. ئێمە مەبەستمانە جە هاوکارییە مرۆییەکانە تەنیا هامکاری دارایی نەبۆنە، مەبەسما پەشتیوانی مەعنەوییا. پۆکەی مەبۆنە دەزگا و ڕێکوزیا مییاننەتەوەییەکێ هامکارییە مرۆییەکا نەیاونانە قوربانیا کۆمکوژییەکا و واتش: "مشۆم ڕێکوزیا مییاننەتەوەییەکێ یارمەتییە مرۆییەکاشا یاونانە هەم گۆش جە شایەتحاڵو مانگەو سوورو کوردی گێرانە و هەمیچ چنی گەلوو عەلەویی گنانە پەیوەندی ڕاستەوخۆ. بەسەدان هەزار کەسێ جە شارە کەناراوییەکا چەمەڕاو هامکارییێنێ. هەرۆاسە پەنەوازا ڕێکوزیا مییاننەتەوەییەکێ بە هامکاریی مرۆییەکاشا پەشتیوانی جە مانگە سوورو کوردی بکەرا."