کۆڵبەرێوە کوشیا و کۆڵبەرێوەتەریچ بەمەڵامەتوو سەکتەو دڵیۆ عەمرەو خوڎایش کەردە
جە مەنتیقە سنووریەکاو ۋەرکەوتوو کوردسانینە کۆڵبەرێوە بە تەقەو هێزەکا دەوڵەتوو ئێرانی کوشیا و کۆڵبەرێوەتەریچ بە مەڵامەتوو سەکتەو دڵیۆ عەمرەو خوڎایش کەردە.
بە پاو هەواڵێوە ماڵپەڕوو کۆڵبەر نیوزی ڕۊو یەکشەممەی جە مەنتیقەو سنووری هەنگەژاڵەو بانەینە کۆڵبەرێوە بە نامۍ سۆران عەبدی تەمەن ٢٢ ساڵی بە تەقەو هێزەکا دەوڵەتی کوشیان.
هەمان ڕۆ جە مەنتیقەو سنووری نەوسوڎۍ کۆڵبەرێوە بە نامۍ محەمەد بایر محەمەدی تەمەن ٤٨ ساڵی جە وەختوو کۆڵبەرینە بەمەڵامەتوو مردای دڵیشۆ عەمرەو خوڎایش کەردە ، ڕۊو جومعەیچ کوڕوو ئا کۆڵبەرەیە بە نامۍ میلادی کە تەمەنش ١٥ ساڵێن، جە وەختوو کۆڵبەرینە چا مەنتیقەنە، بەمەڵامەتوو کۊتەیرە واری جە یاگێ سەختەنە زامڎار بیەبۍ.
وەڵتەریچ وەڵا کریابێوە کە ڕۊو شەممەی جە مەنتیقەو سنووری نەوسوڎێنە کۆڵبەرێوە بە نامۍ پەیمان ئەحمەدی تەمەن ٣٥ ساڵی بە تەقەو هێزەکاو دەوڵەتی کوشیان.
بە پاو ئامارەکا کۆڵبەر نیوزی جە ساڵەی ویەردۍ کوردی/ هەتاوی (٢٧٢٣/ ١٤٠٢) ٤٤ کۆڵبەرۍ کوشیێنۍ و ٤٠٠ کۆڵبەرێچ زامڎارۍ بیێنۍ، کە فرەیشا بە تەقەو هێزەکاو دەوڵەتی پێکیێنۍ.
هاموەخت بەپاو ئامارێوە تۆڕەو مافەکا مرۆڤوو کوردسانیچ جە مانگەو سیاوکامینە ٨ کۆڵبەرۍ و کاسبکارۍ کوردی کوشیێنۍ و ٤٧ کۆڵبەرۍ و کاسبکارێچ زامڎارۍ بیێنۍ.
