(خەدیجە گۊز)ە کاندیدەو پارتو چەپی سەوزی جە هەرێمو یوۋەمو ئەنقەرەی پۍ پەرلەمانی ئەرەیاۋناش، هیوا و خەباتو ژەنا جە دەنگداینە نیشانە مڎا و داواش جە ژەنا کەرڎ، پۍ خەباتو ئازاڎیی و یەکسانی دەنگ بە پارتو چەپی سەوزی بڎا.
(خەدیجە گۊز)ە ۋاتش، ھورچنیەکۍ ١٤و ئایاری هەم پۍ تاریخو تورکیای و هەم پۍ ژەنا ھورچنیېوە فرە گرنگېنۍ.
(خەدیجە گۊز)ە ئاماژەش بە هەڵۋێسو پارتو چەپی سەوزی پۍ خەباتو ژەنا کەرڎ و ۋاتش، "ئا ژەنۍ، کە جە دلۍ هامپەیمانیی ڕەنج و ئازاڎینە جە دەورو یۊی کۊبیېنێوە، سیاسەت و خەباتو ۋێشا سەرو جاڎەکاوە، جمیەرو فێمێنیستی و خەباتو ساڵەهای ساڵەو جمەیرو ژەناش جە دلۍ پارتو چەپی سەوزینە بە یۊی یاۋنا. ئینە هەم جە بەیاننامەو پارتی و هەم جە کەسایەتیی ژەنانە ۋینیۊ. دلۍ ئی حیزبەینە، ژەنۍ هێزی سەرەکینۍ. ڕاسەوخۊ پۍ ۋێش و ژەنا تەریچ کۊشیای کەرا. پی جۊرە، حۊل مڎا نوێنەرایەتیی ژەنا کەرا. منیچ کاندیدەو پارتو چەپی سەوزینا. وەرو ئانەی ئیسە دەرفەتما هەن، کە کۊشیای ژەنا، کۊشیای جە جاڎەکانە، جە یانەکانە، جە مەعمەلەکانە، جە زانشتگەکانە بیاۋنمۍ پەرلەمان. پارتو چەپی سەوزی ئی ڕۍ نیشانە مڎۊ".
(خەدیجە گۊز)ە ئاماژەش پانەی دا، خاڵەو دەستپنەکەرڎەو یاۋنەری و بەیاننامەو حیزبەکەیشا پۍ ھورچنیەو ژەنا جە بارەو گېڵنایۊ ڕێککۊتننامەو ئیستەنبول-یۊ و ئەرەیاۋناش، ئینە تەنیا وەعدۍ نییا پۍ ھورچنیەکا. چی ۋڵاتەنە نزیکەو ٣٢ ملوېن ژەنا مافو دەنگدایشا هەن و ماچۊ، "فرەیچشا دەنگ مڎا. وەڵۍ گرڎ چېۋێنە، ژەنۍ گەنجۍ، ژەنۍ زەحمەتکێشۍ، ژەنۍ عەلەویۍ، ئا ژەنۍ، کە ساڵەهای ساڵا داواو ئازاڎیی و یەکسانی کەرا و خەباتش پۍ کەرا، ڕوۋە چی پارتەیە (پارتو چەپی سەوز)ی مکەرا. بە پەیلواو من ئینە تەئسیرش بۊ سەرو دەنگدای."
(خەدیجە گۊز)ە ئەرەیاۋناش، پردێوە فێمینیستی جە بەینو ژەنا کورڎی و ژەنا تورکیای جە ڕاو کۊشیای ژەناوە وەشە بیېنە و داواش جە گرڎو ژەنا کەرڎ پۍ حېقم کەرڎەو ئی خەباتیە جە دلۍ پارتو چەپی سەوزینە یۊگېرا و جە دەورو یۊی کۊباوە.
ھ.ش
