جە ئەرەیاۋنېوەنە کۆمیتەو گەلا و ئایینەکا کەجەکەی ئاماژەش پانەی کەرڎەن، "چن ڕووۍ دماو جەژنەو کریسمسیوە جەهان پایۍ وزۆ ساڵێوە تازۍ زایینیوە. پا بۆنۆ ساڵەی تازۍ جە کوردسانیا و گرڎوو مرۆڤایەتی پیرۆز کەرمۍ و هیواڎارېنمۍ کە ساڵەو ٢٠٢٤ بۆ بە ساڵێوە پا جۆرەی کە کێشە بنچینەییەکۍ مرۆڤایەتی چارەسەر کریا، جە جوگرافیاو ۋەرکەوتوو دلېڕاسەی و گرڎوو مەنتیقەکا جەهانینە جەنگ دمایش بۍ، مرۆڤایەتی ئاشتی، ئارامی و تەندروسی و ژیۋایۍ ئازاڎ و دیموکراتیکی بەدەسبارۆ.

ۋەرکەوتوو دلېڕاسەی کە مەسیحیەت چنەشەنە سەرشهۊردان و بە مرۆڤایەتیرە وەڵا بیەنۆ، بە جەنگېوە دژوار، گۆشەگیری، ئەشکەنجە و هجووم جە ئاستۍ قڕکەردەینە پایۍ وزۆ ساڵەو ٢٠٢٤ی زایینی. راسیېوەن، کە بەمەڵامەتوو ئا هجووماوە گرڎوو گلېرگەکا ۋەرکەوتوو دلېڕاسەی بە تایبەتی گلېرگەکا کورد و عەرەبی زەرەر و گورزەی گۊرېشا وەرگنۆ. ئێمە قەناعەتما پاسەن، کە جە کەشێوە پا جۆرەنە مبارەک کەرڎەی جەژنۍ، یاڎکەرڎەیۆ پیرۆزمەندیە کۆمەڵایەتییەکا، بە کەردەیشا بە بۆنېوە پۍ چارەسەروو کێشە سیاسیەکا، متاویۆ ماناشا پنە بەخشیۆ. هیوا و قەناعەتما ئانەن کە جەژنەو کریسمسوو ئێساڵی بۆ بە بۆنېوە پۍ دمایی ئارڎەی بە جەنگی، هۊرگېرتەی گۆشەگیری، وەڵابیەیۆ ئاشتی و واڵەو-برایی دلۍ گەلانە، یاوای گرڎوو گەلا بە ئارامی، تەندروسی و خێرۍ و بەرەکەتی.

پېسە جمیەروو ئازاڎیی کوردی ئێمە قەناعەتما پاسەن کە کێشەکۍ گلېرگەکا ۋەرکەوتوو دلېڕاسەی و مرۆڤایەتی و جەهانی، قەیران و پشېوییەکۍ بە کۊشیایۍ ئەخلاقی، ئەنەیاوایۍ سیاسی و رێکوستەیی متاویۆ چارەسەرۍ کریا. ئێمە مزانمۍ کە کۊشیای دیموکراسی و ئازاڎیی گەلا، گلېرگە ئایینیەکۍ، ژەنا و گەنجا تەنیا ڕاو ڕزگاری جە قەیرانۍ و گېچەڵەکان جە ۋەرکەوتوو دلېڕاسەی و گلېرگەکا جەهانی. پا ویر و باوەڕۆ ئێمە داوا جە هێزەکاو دیموکراسی، هێزە کۆمەڵایەتیەکا تەرەفڎارا بەها مرۆڤایەتیەکا کەرمۍ کە پۍ ئانەی جەژنەو کریسمسوو ئێساڵی و ساڵەی تازۍ زایینی بانۍ بە ساڵێوە پا جۆرە کە کۊشیای بەهاکاو دیموکراسی و ئازاڎیی، کۊشیای زیاتەر پەرەش پنە بڎریۆ.

ئێمە ئانەی ویرمارمېوە کە جەژنە و بۆنە ئایینیەکۍ بانگەوازێوەنۍ پۍ بەها کۆمەڵایەتیەکا، مرۆڤایەتییەکا پېسە وەشەسیایی، رێز، ئاشتی و واڵە و برایی و گەرەکمانە ئانەی دەسنیشان کەرمۍ کە چی وەختەنە پەنەوازش پا بەهایا جە گرڎ وەختۍ زیاتەرا. ۋەروو ئانەیچ ئێمە داوا جە گرڎوو مرۆڤایەتی کەرمۍ کە جە ساڵەو ٢٠٢٤ینە جە کوردسان، ۋەرکەوتوو دلېڕاسەی و گرڎ یاگۍ جەهانینە دژوو حکومەتی و دەوڵەتا کە مەخزۍ کۆلۆنیالیستی، قڕکەری و فاشیستیانەشا هەن، جە بەرەو کۊشیایۍ هامبەشینە ئانڎەی تەر بە بەقوەتی بەشداری جە کۊشیای رێکوستەیی کەرڎەینە کەردۍ. گەرەکمانە ویرش بارمېوە کە جە ساڵەی تازېنە پېسە گەلاو ۋەرکەوتوو دلېڕاسەی و جەهانی زیاتەر جە گرڎ وەختۍ، پەنەوازما بە هامپەشتی  و پاڵپەشتی یۊترینی هەن. هیواڎارېنمۍ کە جەژنەو کریسمسی بۊنە بە مایۍ ئامای ساڵێوە تازۍ پا جۆریە کە گەلا ۋەرکەوتوو دلېڕاسەی و گەلاما جە کوردسان، کۊشیای ۋېشا سەروو خەتەو نەتەوەی دیموکراتیکی زیاتەر پەرەپنەبڎا، هەستەکاو یۆبیەی، یۆگېرتەی و واڵە و برایەتی بەقووەتتەر و حېقمتەر کەرا.

پا هەست و ویرکەردەیۆ جارێوەتەر جەژنەو کریسمسی سەرەتا جە گەلاو ئەرمەنی، ئاشوری، سوریانی، کەلدانی جە کوردسان، حەرپاسە جە تەماموو گلېرگەی مەسیحی مبارەک کەرمۍ و هیواڎارېنمۍ کە پۍ گرڎ کەسی بۊ بە ساڵێوە پەڕ جە وەشەسیایی، ئاشتی و واڵەو-برایی".