هامسەرۆکایەتی دەسەو ڕاوەبەری کەجەکەی بۆنەو ٨و مارسی ڕۊو جەهانی ژەنا رەنجدەری و کۊششکاریۆ پەیامێوەش وەڵاکەردۆ و سڵامش ئاراسەو کۊشیای ژەنا جە مێڎانە میان نەتەوەییەکانە کەرد و ئەرەیاۋناش: "پێسە جمیەروو ئازاڎیی کوردی ئەرەیاۋنمێش کە شان بە شانوو ژەنانمۍ، پەشتیوانی جە کۊشیایشا کەرمۍ".

کەجەکە جە کەسایەتی سەکینە جانسز (سار)ێنە گەشمەرڎاو ئازاڎیی ژەناش ۋیرئاوردێوە و ئەرەیاۋناش، "بڕواما هەنە کە جە ڕاو ئازاڎیی ژەناوە گلێرگە و ژیۋای ئازاڎۍ با".

پەیامەکەو هامسەرۆکایەتی دەسەو ڕاوەبەری کەجەکەی پی جۆرەنە:

"٨و مارسی ڕۊو جەهانی ژەنا رەنجدەری و کۊششکاری پیرۆز کەرمۍ. سڵام جە کۊشیای ئا ژەنا کەرمۍ کە بڕواشا پانەی هەنە کە ئازاڎیی ژەنا بۆ بە مەڵامەتوو ئازاڎیی گرڎوو مرۆڤایەتی و پێسە جمیەروو ئازاڎیی کوردی ئەرەیاۋنمێش کە ئێمە ئینایمۍ چنی ژەنا و پەشتیوانی ۋێما پۍ کۊشیاو ئاڎیشا بەربڕمێوە.

جە وەڵێکۊتەی و بە کۆمەڵایەتیبیەی مرۆڤایەتینە پێگەو سروشتی، هەست و هۆشمەندی ژەنا فرە گرنگا. یۊوستەی و بەشکەردەی و تایبەتمەندیە کۆمەڵایەتیەکاو ژەنا جە بەکۆمەڵایەتیبیەی ئینسانەکانە و وەڵێوستەی ژەنا کۆمەڵایەتی، ئەندێشە، زانست، کولتور و هونەریەنە دەوری سەرماسقشا بیەن. ژەنی بە رەنجوو ۋێشا سەرمەشقایەتیشا پۍ وەڵێکۊتەیەکا گلێرگەی کەردەن. جە گرڎ بەها و پەرە ئەسایێنە ئیسفاڎەشا بە مرۆڤایەتی و گلێرگەی یاۋنان بەتایبەتی چالاکییە بنچینەیی و گرنگەکۍ ژیۋای ڕووانەی، ژەنی رەنجی فرەشا کێشتەن. مانا بەخشای بە ژیۋای ئینسانەکا، ئەخلاق و جوان ناسیشا دەرەنجاموو ئا حۊڵ و هەستانە کە ژەنی چنەشەنە بەشدارۍ بیێنۍ. بە پوختی ئێمە جە بیەو مرۆڤایەتی ۋێمانە قەرزاربارۍ ژەنانمۍ.

ئا سەردەمۍ کە جەوهەر و رەنگوو ژەنا جە ژیۋاینە بە تۆخی موینیا، سەردەمانێ بێنۍ، کە ئازاڎیی، یەکسانیشا چنەبۍ و فشار و دەسەڵاڎداری و ئەرەگیریشا چنە نەبیەن. مرۆڤایەتی بە هەزاران و دەیان هەزار ساڵۍ پی جۆرە ژیۋا، ژیۋای ئاڎیشا دلۍ ئازاڎیی و ئاشتینە ویەردەن.

وەختۍ کە سروشتوو کۆمەڵایەتی ژەنۍ و ئازاڎیی جە کۆمەڵایەتیبیەی بڕیارە و جە هەستوو ئازاڎیی، یەکسانی، ئاشتی و وەشەسیایی بێبەشەکریا، جە تەرەفوو پیایاوە کریا ئامانج، هامسەنگی ژیۋای تێکشی و ژیۋای ئازاڎیواز، یەکسانیواز سەروو بنەماو وەشەسیایی، ئاشتی و بەشکەردەی دلێنەشی. چا وەختۆن کە ئەقڵیەتوو باڵادەسی پیای وەڵێکۊتەن، ژەنی ڕووبەڕوو فشار، کۆلۆنیالیزمی و تنووتیژی سیستماتیکی بیێوە. هەمان ئا چێوۍ کەسەروو ژنارە ئامێنۍ. سەروو گلێرگەیچەرە ئامێنۍ. ئازاڎیی و ئاشتی دلێنە بریێنۍ و سەردەموو جەنگی، تنووتیژی، ئەرەگیری و قڕکەردەی دەسشپنەکەردەن. ۋەروو ئانەی ژەنی نوێنەرایەتی کۆمەڵایەتیبیەی کەرا، وەختۍ ژەنی کریا ئامانج و چێردەسۍ کریا، گلێرگە کریۆ ئامانج و چێردەسە بۆ.

مۆدێرنیتەو سەرمایەداری ۋەروو ئانەی ژیۋگەو ژەنا، و جەسڎەو رەنجشا هۊرلووشۆ و تاڵانش کەرۆ، قولەپۊپەو ئەقڵیەتوو پیا سالاری وێنا کەرۆ. مۆدێرنیتەو سەرمایەداری گرڎ جۆرە ئەندێشە، زانست، تەکنیک، هونەریش کەردەن بە رەگەزپەرستی و کۆلۆنیالیستی. مۆدێرنیتەو سەرمایەداریچ سیستمێوەن کە زیاتەر گلێرگەی و ژیۋای دلێنەبەرۆ و تاڵانش کەرۆ. سیستمێوە کە بە عالتەرین شێوە پەیوەندی مامەڵەو ژەنۍ و مامەڵەو گلێرگەی وزۆڕووە، مۆدێرنیتەو سەرمایەدارییا.

بێگومان ژەنی جە سەرەتاوە تا ئارۆ ئەقڵیەتوو باڵادەسی پیای و ژیۋای کۆیلەداری، کۆلۆنیالیستیش قبوڵ نەکەردەن و ۋێڕاگریش کەردەن. جە سایەو ئا دژایەتی و مدرامانەو ژەنا، هوشیاری ئازاڎیی و ئیراڎەو گلێرگەی گرڎ وەختۍ بە زینڎەیی مەنەنۆ. جە جەوهەروو کۊشیای سەرەمڕەو وەڵینگەو مرۆڤایەتینە جە دژوو سیستموو باڵادەسی، کۆلۆنیالیستی و قڕکەردەی پەیڕەوکریان، ژەنی هەڵوێسوو ئازاڎیوازی و ۋێڕاگریشا هەن.کۊشیای ئازاڎیی ژەنا جە وەڵینگەنە هەرگیز رووەش جە کەمی و جە کزی نەکەردێنە، بە پێچەوانۆ گرڎ وەختۍ وەڵۍ کۊتەن و گۊرە بیەن. یاوان بە ئاستێوە کە سەردەموو ئێمەنە سەرمەشقایەتی پۍ کۊشیای ئازاڎیی کۆمەڵایەتی کەرۆ. گرڎ یاگێنە ژەنی پۍ وەڵۍ ملا و سەرمەشقی کۊشیای کەرا. ئیسە بە دروشمەو ژەنی، ژیۋای، ئازاڎیی جە گرڎ یاگێنە کۊشیای ئازاڎیی و رزگاری گەش کەرا.

جە وەڵێکۊتەی جمیەرەکەیمانە و ئاخێزوو کوردسانینە فاڕیای و هۊرچەرخنای، رەنج و سەرمەشقایەتی ژەنا دەورێوە بنچینەییش گێڵنا. جمیەرەکەما هێز و پاڵنەری ۋێش جە هێزوو ژەنا و تامەزرۆیی ژیۋای ئازاڎی هورگێرۆ. ئاخێزوو کوردسانی بە رەنگ و سەرمەشقایەتی ژەنا پۍ وەڵۍ ملۆ. بێگومان بەدەسئاردەی ئا تایبەتمەندییەو ئاخێزوو کوردسانی، ئەنجاموو مامەڵە و هەڵوێسوو رابەر ئاپۆیا. رابەر ئاپۆ ئازاڎیی ژەناش جە چەقوو کۊشیاینە نیارە و بەهایۍ فرەش پۍ ژەنا نیارە، ڕاش وەروودەم و رێکوستەبیەینە و ئیرادەو ژەنانە کەردۆ. ئانەیچ جیاوازیش بە جمیەرەکەیماو ئاخێزوو کوردسانی بەخشا ، ژەنیش بەقوەت کەردۍ و هێزش پنەبەخشۍ. رابەر ئاپۆ پۍ وەڵێوستەی و هوشیاری و کۊشیای ئازاڎیی ژەنا رەنج و حۊڵێوە فرەش ئەنجامدا. جە ڕاو ئا مامەڵە و نزیکایەتی و بیردۆزی و فەلسەفیەی وەڵێش وست، مۆدێل و پاڕادایمێوە تازەو ژیۋایش سەروو بنەماو ئازاڎیی ژەنا پەرەپنەدا. ئا رەنجەو رابەر ئاپۆی ئارۆ تەماموو جەهانینە جە تەرەفوو ژەناوە موینیۆ، قیمەتش پۍ منیارە و خاوەنداریش چنەکەرا. ژەنی پەی ئازاڎیی رابەر ئاپۆی جە ریزەکا وەڵۍ وەڵێوە بەشدارێنۍ و سەرمەشقی پۍ هەڵمەتەو ئازاڎیی کەرا. ئێمە ئا هەڵوێسەو ژەنا فرە بە مانا، بە قیمەت موینمۍ و چی ڕووە ماناڎارەنە جارێوەتەر سپاسوو گرڎوو ژەنا کەرمۍ.

جە کۊشیای ئازاڎیی ژەناو کوردسانینە  کە کاریگەریش کەردەن سەروو جەهانی، بە هەزاران و دەیان هەزارا ژەنی گەشمەرڎۍ بیۍ. چا کۊشیاینە کەسایەتی گەورۍ رابەرە و سەرمەشقەی پێسە سەکینە جانسز-سارۍ هۊرکۊتێنە، کە ئشناسنامە و کەسایەتی کۊشیای ئازاڎیی ژەناشا متەنەرە. رابەر ئاپۆ ئەرەیاۋناش کە کۊشیای ئازاڎیی ژەنۍ کۊشیای سەکینە-سارێن. ئێمە جە کەسایەتی هامڕا سەکینەینە کە جە جەهانیبیەو کۊشیای ئازاڎیی ژەنا کوردسانینە دەوری گۊرەش گێڵنا، گرڎوو گەشمەرڎا ئازاڎیی ژەنۍ بە رێز و پنەزانایۆ ویر مارمێوە. قەناعەتما پاسەن کە ئەگەر ژەنی ئازاڎۍ با، گلێرگە و ژیۋایچ ئازاڎۍ با. پا قەناعەتۆ، ئێمە جارێوەتەر ٨و مارسی جە گرڎوو ژەنا مبارەک کەرمۍ، پەشتیوانی ۋێما پۍ کۊشیای ئاڎیشا بەربڕمۍ و سەرکۊتەی گۊرەیشا پۍ موازمۍ".