هامسەرۆکایەتی کۆنسەو ڕاوەبەری کەجەکەی بۆنەو ئامای جەژنەو نەورۆزیوە ئەرەیاۋنێوەش وەڵا کەرڎۆ و چنەشەنە نەورۆزو ٢٠٢٥یش جە گەلا قەڎیمی میزۆپۆتامیای و گرڎو گەلا چېردەسەو جەهانی پیرۆز کەردە، کەجەکە داواو بەشداریۍ بەهێزیش کەرد جە مبارەکباییەکا نەورۆزینە.

ئەرەیاۋناکەی پی جۊرەنە:

"پېسە گەلەکەیما، بە جۆشوخرۆشێوە گۊرۆ پێشوازی جە جەژنەو نەورۆزیما مکەرمۍ. نەورۆز کە هێماو مڎرامانیا جە دژو زەحاقی زاڵمی، وە سەر جەنۆ ژیۋایۆین، بە هەزاران ساڵێن جە لایەنو گەلا میزۆپۆتامیایی قەڎیمیۆ، گەلاو ئێرانی، ئانادۆڵی، قافقاسیای و ۋەرکۊتوو مېیامینیۆ بەشێوەو سەرجەنۆ ژیۋایۆ و مڎرامانی پێشوازیش ۋنە مکریۆ. بە هەزاران ساڵێن گەل دژو ستەم، فشاری و کۆڵۆنیالی بە ڕوحو نەورۆزیوە ئینا مڎرامانەنە، چنی نەورۆزی سەرجەنۆ ژیۋای خوڵقناوە، زەریف و ئازادش مکەرا. نەورۆز چی سەردەمەنە بە هەمان ماناوە جە لایەنو گەلاوە بە جۆشێوە گۊرۆ، بە حەسرەت و دڵوەشیۆ پێشوازیش ۋنە مکریۆ. ئارۊیچ بە دڵوەشیۆ پێشوازی جە نەورۆزێوە تازەی مکەرا. پی دڵوەشیۆ نەورۆز جە گەلاو قەڎیمی میزۆپۆتامیای، جە گەلاو ئێرانی، ئانادۆڵی، قەفقاسیای و ۋەرکۊتوو مېیامینی، جە گەلا چێردەسەی جە گرڎو جەهانی، جە ژەنا، جە گرڎ کەسێ کە جە دڵ و ویرکەردەیۆیشەنە نەورۆزی گەش مکەرۆوە پیرۆز مکەرمۍ. نەورۆزو ٢٠٢٥ پێرۆز بۆ.

گەلوو کوردەسانی پېسە خوڵقنەرو نەورۆزی، ئا گەلەنە بەوپەڕو قوڵییوە جە نەوزۆزەنە مژیۋۆ. جە چەرخو تاریخینە وەختۍ زاڵما دلېنەبەردەیش سەرەرە سەپنێنۍ، بە نەورۆز مڎرامانش کەرد و گرڎ جارۍ سەرجە نۆ ۋێش وەشکەردۆ. ۋەرو ئی حەقەتینە تاریخیە ڕابەر ئاپۆ واتش، 'گەلوو کوردی گەلوو نەورۆزییا'. ئینە حەقەتینێوە ڕۊشنی تاریخیا. نەورۆزو گەلوو کوردی پیرۆز مکەرمۍ کە پی ئەنەیاوا تاریخیۆ کۊشش مکەرۆ.

بێگومان جە خوڵقنای نەورۆزی و یاونایش پی سەردەمەیە بڕۍ کەسایەتیۍ تاریخیۍ بیەیشا هەن کە دەورشا بیەن. کاوەی ئاسنگەر جە دژو ستەمو دەحاقی سەرمەشقی ئەرەپڕای گەلوو کوردی و گەلا قەڎیمی میزۆپۆتامیای کەرد و جە تاریخەنە پېسە کەسایەتیێوە کە نەریتو نەورۆزیش دەسپنەکەرڎ، یاڎ مکریۆوە. جە سەردەمو ۋێچمانە جە دژو دەحاقەکا کە گەرەکشانە گەلوو کوردی دلېنەبەرا، نەورۆز بە ڕۊشنایۍ کە مەزڵوم دۆغانی جە تاریکی زینانینە هۊرش کەرڎ، سەرجە نۆ گەش بیۆ و یاوا بە ماناڎارییە تاریخیەکەیش. ئا ڕۊشناییەی کە کاوەی سەردەم مەزڵوم دۆغانی کەردۆ، ئارۊنە دڵو ملیۆنان ئینسانا گەرم مکەرۊوە، هۆششا ڕۊشن مکەرۆوە و هۊرچەرخیان پەی ئێرێوە گۊرەی. بە پێرۆزکەردەی ئی ڕوە زەریفەیە، مشۊم بە حورمەت، وەشەسیایی و حەسەرەتۆ یاڎو ئا کەسا بکەرمێوە کە گیانو ۋێشا فیدا کەرد و ئینەشا پێشکەش کەردیمۍ. مشۊم جە قوڵانی ناخیماوە درکشا پنە بکەرمۍ و خاوەنداریشا چنە بکەرمۍ. پی ئاوەزۆ؛ کاوەی سەردەم مەزڵوم دۆغان، زەکیە، ڕاشان، ڕوناهی، بێریڤانە و جە کەسایەتیشانە گرڎو گەشمەرڎا شۆڕشی و دیموکراسی بە حورمەت، وەشەسیای و حەسرەتۆ یاڎۍ مکەرمېوە.

نەورۆزو ٢٠٢٥ جە ڕابەر ئاپۆی پیرۆز مکەرمۍ. سڵام و حورمەتو ۋێما پێشکەش بە ڕابەر ئاپۆی مکەرمۍ کە خوڵقنەرو ئەوەکۊشایمانە، نیم سەدەن سەرمەشقی جە گەلوو نەورۆزی مکەرۆ و بە بانگەوازو ئاشتی و گلېرگەی دیموکراتیکی کە جە لایەنو ڕابەر ئاپۆیۆ کریان، ماناڎاریێوە تازەش ئامێزانو نەورۆزو ٢٠٢٥ کەرد. گەلەکەما بە هێز و مۆراڵۆ ئی بانگەوازییە تاریخیەشە هۊرگېرت، قەرارش دا بەشێوەو نەورۆزو پێکئاوردەی ئازادی بەڎەنی ڕابەر ئاپۆی و وەشکەردەی گلېرگەو دیموکراتیکی پێشوازی جە نەورۆزو ٢٠٢٥ بکەرۆ. ئی هەڵوێسەو گەلەکەیما ماناڎارا. ئاشکران جە گرنگتەرین کاتی تاریخینە بە بانگەوازو 'ئاشتی و گلېرگەی دیموکراتیک'ی ڕابەر ئاپویۆ گەلاو ۋەرکۊتوو مېیامینی و بە تایبەت گەلوو کوردی بیێ بە داراو ئاسۆیۍ تازەو ئازادی. چی سەردەمەنە هێڵۊو گلېرگەی دیموکراتیکی ڕاو ڕزگارینە جە جەهانو فشار، ئەرەگیری، جەنگی و قەیرانەکا مۆدێرنێتەی سەرمایەداری. پی مەڵامەتۆ خاوەنداریکەردەیش جە بانگەوازییەکەو ڕابەر ئاپۆی و ئەوەکۊشای پەی جابەجێ کەردەی ئا بانگەوازییە خاوەن ماناڎاریێوە تاریخیا.

هەرپاسە نەورۆز جە گرڎو هەمڕا و دۆسا ئەنتەرناسیۆنالیستیما پیرۆز مکەرمۍ. ئانەی کە ئەوەکۊشایما یاوان پی ئاستەیە، ڕەنجی گۊرەو ئاڎیشاش چنەن. هەرپاسە جە ئەنجامدای چەمپنەکۊتەی چنی ڕابەر ئاپۆی و یاوای بە بانگەوازو 'ئاشتی و گلېرگەی دیموکراتیک'ی کە پېسە مانیفێستۆیۍ موینمێش، هەڵمەتەو ئازادی مېیاننەتەوەی کە جە ١٠و تشرینو یووەم و ٢٠٢٣ێوە بە سەرمەشقایەتی دۆسا، هەمڕایا ئەنتەرناسیۆنالیستی دەسش پنەکەرڎ، خاوەن هامکاریێوە گۊرەن. ئی دۆسۍ و هەمڕایۍ تا وەکو ئارۊیچ بە دەورێوە تاریخی هۊرئێستێنۍ. جە ئیسە بە دمایچۆ باوەڕیما هەن کە پەی پێکئاوردەی ئازادی بەڎەنی ڕابەر ئاپۆی و جابەجێ کەردەی پارادایمو گلېرگەی دیموکراتیکی بە دەوری تاریخیشا هۊربێزا.

پی ئاوەز و ویرکەردەیۆ داوا جە گەلەکەیما مکەرمێنە بە بەهێزییۆ بلانە مێڏانو نەورۆزی. گەلەکەما جە سەرنیشتوو، پانیشتوو، وەرکەوتوو و وەرنیشتوو کوردەسانی، گەلەکەما کە ئینێ چبەرو وڵاتینە، بە هەزاران و ملیۆنان کەسێ بە جۆش و جەماوەریۆ نەورۆز پیرۆز مکەرا. بە کەردەیۆ ئێری، بە جلوبەرگی نەتەوەیی، بە گێڵنای زەماوەنێ، بە هەڵهەڵە و گۆرانییەکا ئازادیی پێشوازی جە نەورۆزی مکەرا. مێڏانەکا نەورۆزی پەڕمکەراوە و بە هێزۆ داواو ئازادی جەسەیی ڕابەر ئاپۆی بەربڕانە و پێسەو خواستو بنەڕەتی وێس نیشانە مڏۆنە. ژەنێ و جوانێ کوردی سەرمەشقایەتی ئینەیە مکەرا. گەلەکەما گرڏ یاگێنە پێسەو نەورۆزی ئازادی و گلێرگەی دیموکراتیک پێشوازی جە نەورۆزو ٢٠٢٥ مکەرۆ. پێسەو ئانەی گەل و گەلا بەرش بڕا، مشۆم ئیتر سیستەمو ئیمراڵی بە تەمامەتی وڕۆنە و هورشنریۆوە. مشۆم ڕابەر ئاپۆ جە ئیمراڵینە بەربشۆنە. پەی ئانەی بانگەوازو 'ئاشتی و گلێرگەی دیموکراتیک' جابەجێ کریۆنە، مشۆم ئازادی جەسەیی ڕابەر ئاپۆی پێک بێنە و بۆنە خاوەن دەرفەتەکا هەرمان کەردەو ئازادی.

جارێوەتەر بە گڕ و تین ئایێرو نەورۆزی و جەژنەو نەورۆزی جە گرڏ کەسێ موبارەک مکەرمێنە و هیوادارێنمێ سەرو بنەماو ئازادی جەسەیی ڕابەر ئاپۆی و گۆرەکەردەو ئەوەکۆشای جە کوردەسانی ئازاد، تورکیای دیموکراتیک و وەرکەوتوو مییامینی دیموکراتیکو ئاشتی، دیموکراسی و ئازادی بارۆنە پەی گرڏ کەسێ.

نەورۆز پیرۆز بۆنە!

بژیوۆنە نەورۆز!"