هامسەرۊکایەتیی دەسەو ۋێڕاۋەبەری کەجەکەی ئەرەیاۋناش، حوسێن تورەلی وڵاڎپارێز و نیشتمانپەروەرو کورڎی ۋێرەگاو ۱۷و نیسانی جە شارو دهۊکی جە لایەنو میت و ترکی بە پەشتیوانیی دەزگاو پارێزناو پارتی (پەدەکە)یۊ تیرۊر کریا.
هامسەرۊکایەتیی دەسەو ۋێڕاۋەبەری کەجەکەی بە ۋەڵاوکەرڎەیۊ یاۋنەریێۋە ئەرەیاۋناش، "ئەگەر پارتی (پەدەکە) پەشتیوانی جە دەزگاو جاسوسی میتو ترکی نەکەرا، میت مەتاۋۊ پا وزۊ پانیشتوو کورڎسانی و مەتاۋۊ ۋەردەمو سەڎان کامێرا چەمڎارینە دلۍ شارەکانە وڵاڎپارێزا و نیشتمانپەروەرا تیرۊر کەرۊ.
ئەرەیاۋناکەو کەجەکەی:
"حوسێن تورەلی" جە ڕاو گرڎینە بە نیشتمانپەروەرێۋە ئێلحی ئشناسیۍ، جە ھجومېۋە چەکڎارینە جە دهۊک تیرۊر کریا. فرێۋە جە ئەرەمەرزیا نیشتمانپەروەرەکا بە تنی ھجومەکەشا شەرمەسار کەرڎ. بەپاو زانیارییەکا، "حوسێن تورەلی" پېسە فرێۋە جە نیشتمانپەروەرا سەرنیشتی، بە مەڵامەتو ھەرمانو کاری سیاسیۊ لوۋان پۍ پانیشتوو کورڎسانی و جە ئاکامو ھجومېۋەنە تیرۊر کریا.
"حوسێن تورەلی" ۋەڵتەریچ جە دهۊکەنە ھجومی چه کڎاریی کریابۍ سەرش. ۋەرو ئانەی پې جاری دوۋەمی ھجومکریاۋە سەرش و ھجومەکەیچ نیشانەش مڎۊ، کە گەشمەرڎەکەرڎەو حوسێن تورەلی قەرارو دمایی دۊڵەتو ترکی و میتی بیەن و ئا ھجومە بە پەشتیوانی دەزگاو پارێزناو پارتی ئەنجامدریان. بە ڕۊشنی هامکاری و پەشتیوانی دەزگاو پارێزنای جە گرڎو ئا تیرۊر و کۊکوژییانە پیۋیۊ، کە جەلایەنو میتیۊ جە پانیشتوو کورڎسانی ئەنجام دریا. حەرچنڎە مزانیۊ حوسێن تورەلی جە ئامانجو دۊڵەتو ترکی و میتی بیەن، بەڵام حیچ ڕاو جېۋە نەگیریان ۋەر و پۍ جارو دوۋەمی کریا ئامانج و تیرۊرکریا. تیرۊرکەرڎەو تورەلی ئا ڕاسییە ئاشکرا مکەرۊ. جە ڕاسینە پارتی (پەدەکە) حیچ کاروەدایێش ۋەران ۋەرو ئی ھجومانە نییا و دەزگاو پارێزنایچ هەڕەشۍ چا وڵاڎپارێز و نیشتمانپەروەرا کەرۊ، کە ۋەرو مەڵامەتی سیاسی ملا پۍ پانیشتوو کورڎسانی و گەرەکشانە کەراشا بە جاسوس و بە ئاشکرا پنەشا ماچا، ئەگەر دەسبەردارو ۋڵاڎپارێزی و نیشتمانپەروەریکەیتا نەبیدۍ، مەتاۋدۍ بژیۋدۍ. پارتی (پەدەکە) پی جۊرە چا نیشتمانپەروەرا نزیک بۊۋە، کە جە زوڵم و سەرکوتکەرڎەو ئاکەپە و مەهەپەی ۋێشا ڕزگار کەرڎەن و جە پانیشتوو کورڎسانی ئەرەنیشتۍ با، پۍ ئانەی میت ئا نیشتمانپەروەرا تیرۊر کەرۊ هامکاری و پەشتیوانی جە میتی کەرا. ئەگەر پەشتیوانی و هامکاریی پارتی (پەدەکە) ی و دەزگاو پارێزنای نەبۊ میت مەتاۋۊ پا وزۊ پانیشتوو کورڎسانی و مەتاۋۊ ۋەردەمو سەڎان کامێرانە دلۍ شارەکانە نیشتمانپەروەرا تیرۊر کەرا.
پارتی (پەدەکە) نەک تەنیا هامکاری پۍ کوشتەو نیشتمانپەروەرا دلۍ شارەکانە مکەرۊ، بەڵکم جە گرڎ یاگېۋەنە هامکاریی سیاسەتەکا دۊڵەتو ترکی پۍ پاکتاوکەرڎە و جینۊسایدکەرڎەو کورڎا کەرۊ. جە ئەرەگیرکەرڎەو پانیشتوو کورڎسانی و جە هەرێمەکا پارێزناو مەدیای جە جەنگو دژ بە گەریلاکانە شانبەشانو دۊڵەتو ترکی جمۊۋە و ھەرمانە کەرۊ، پەشتیوانی جە ھجومەکاو سەرو شەنگالی و مەخموری مکەرۊ، جە عەفرین و سەریکانی و گرێ سپی چنی چەتەکا بۍ. جە عەفرینی ئەرەگیرکریانە دیموگرافیا فاڕیان، کورڎ جە عەفرین بەرکریا، ئانۍ مەنېنۍ گرڎ ڕوۋۍ ئەشکەنجە و هەڕەشۍ کۊکوژیکەرڎەیشا ۋنەکریۊ و گرڎ ڕوۍ ھجوم کریۊ سەرشا. چا ئاژەنە پارتی (پەدەکە) بە نامۍ ڕێکوزیاو خێرکەرڎەیۊ بە ڕەسمی ئینا عەفرینەنە، خاسا چنی ئانە کریۊ؟ ئایا ئینە هامکاریکەرڎەو ئەرەگیرا و کوشەرا کورڎی نییا؟ بە دڵنیاییۊ ڕای گرڎی و گەلوو کورڎی مزانا و مۋینا، پارتی (پەدەکە) چکۊ مرڎان و چېش کەرۊ.
حەرپاسە پارتی (پەدەکە) جە سەرنیشتوو کورڎسانیچ پۍ ئانەی کوشەرا و پەلە پیتکە کێشەکا دۊڵەتو ترکی ئەرەگیری پاکتاوکاری ئاکەپە - مەهەپەی جە ھورچنیەکانە سەروزۊ دەسش بەھەرمانەو دیعایۍ کەرڎەن، داوا جە چن کەسۍ جە خەڵکو سەرنیشتوو کورڎسانی کەرۊ و چنیشا کۊبۊۋە و داواشا ۋنەکەرۊ جە ھورچنیەکانە پەشتیوانی جە ئاکەپە – مەهەپەی کەرا، پەشتیوانی جە سەرکردەو فاشیستی دوژمنو کورڎی تەیب ئەردۊغانی مکەرۊ. جە میدیا و یاۋنەریەکاشۊ فرە بە ڕۊشنی ئا پەشتیوانییەی جە ۋێش نیشانە مڎۊ، گرڎ ڕوۍ کوشەرو هەزاران نیشتمانپەروەرا کورڎی مارا سەرو تەلەفزیۊنەکاشا. گەلوو ۋڵاڎپارێزو کورڎی ئی هەنگام و کرڎەوا پارتی (پەدەکە)ی بە عالی یاۋانە و چەمڎاریش مکەرا.
ئێمە ھجومو سەرو حوسێن تورەلی شەرمەسار مکەرمۍ. ئی ھجومە، پېسە ھجومەکا ماۋێۋە چا وەڵی جە لایەنو میتیۊ و بە پەشتیوانی دەزگاو پارێزناو پارتی ئەنجامدریان. گەرەکشانە پی ھجوما وڵاڎپارێزا و نیشتمانپەروەرا سەرکوت کەرا. پێۋیسا گەلوو ۋڵاڎپارێزو کورڎسانی و ئەرەمەرزیا ۋڵاڎپارێز و نیشتمانییە دیموکراتییەکا خۊتانکەرڎەی جە حوسێن تورەلی بکەرا و بە شێۋێۋە تن و بە قوەت ناڕەزایی ۋەران ۋەرو ئانیشانە نیشانە بڎا، کە ھجومەکەشا ئەنجامدان".
ھ.ش
