شاندو دەم پارتی و پارێزنەرو نوسینگەو یاسایی سەدەی ئێبراهیم بیلمەز کە جە ئەنجومەنو پەرلەمانتارا کۆنسەو ئەوروپای (MPKE)ین پەی بەشدرابییەی جە گلېرۆبیەکا بەینو ٣٠ ئەیلولی و ٤ تشرینو یوەمو ٢٠٢٤ جە شارو ستراسبۆرگو فەرەنسای، ژمارێوە چەمپنەکۆتەیشا ئەنجامۍ دێ.

گلێرۆبیەکانە هۆرسەنگنای پەی پاشێلکاریی مافەکا مرۆڤی جە تورکیانە، کردەوێ دژە-دیموکراتیکیۍ و کێشەکا مېڎانوو یاسای جە تورکیانە کریا. پارێزنەر ئیبراهیم بیلمەز کە چنی سی پی تی چەمپنەکەوتەیش ئەنجامدان، پێوەس بە سیستەمو گۆشەگیری، ئەشکەنجە و قەرکەردەی ئیمراڵی، گۆشەگیری سەرو ڕابەرو گەلوو کوردی عەبدوڵا ئۆجەلانی دۆسیێوەش ڕادەسو وەرپەرسا کەرڎ.

جە دماین ڕۆو چەمپەنەکەوتەکانە جە کۆنسەو ئەوروپاینە بە نامنیشانو 'ئاژەو زینانیا سیاسی جە زینانەکا تورکیاینە' کۆنفراسێوە ڕۆنامەوانی ئەنجامدریا.

پارێزنەرو نوسینگەو یاسایی سەدەی ئێبراهیم بیلمەز، پەرلەمانتارو کۆمەڵەو چەپی د. دییپا گۆڤینداراژن و پەرلەمانتارو دەم پارتی جە بازنەو ئامەدی بەدران ئۆزتورک پېسە قسەکەری بەشدارۍ بێنۍ.

دماو ئانەی بەدران ئۆزتورک سیستەمو قەرکەردەی، گۆشەگیری و ئەشکەنجەو سەرو ڕابەرو گەلو کوردی عەبدوڵا ئۆجالانیش هۆرسەنگنا، پارێزنەرو نوسینگەو یاسایی سەدەی ئێبراهیم بیلمەز قسێش کەردۍ.

ئیبراهیم بیلمەز قسێش کەردۍ و ئاماژەش پانەیەدا کە گێرتەخانەکۍ و ئاژەو زینانیا سیاسی زامێوەن بە جەسەو تورکیایۆ، زینانیکریا هەن دماو  ٣٠ ساڵا زینانیکەردەی سەربارو ئانەی نەوەشا کەچی هەڵای ئازاد نمەکریۆ و واتش: "جە ئیسەنە کێشێ فرێ هەنێ، بەڵام ئا یاگێ کە فرەتەرین کێشەش چنەن گێرتەخانەو ئیمراڵین. ماوەو ٤٣ مانگان نمەتاومێ هیچ زانیارییێوە جە ئیمراڵییۆ هۆرگێرمۍ. کە زینانی وڵاتێوە ئەندامو کۆنسەو ئەوروپاین."

'سزای هەتاهەتایی هەر سزاو جە قەنارەداین'

ئیبراهیم بیلمەز سەرنجش وست سەرو سزای هەتاهەتایی و واتش: " تورکیانە سزێوە پی جۆریە نەبێ. بەڕێز ئۆجالان دادگایکریا و سزاو جە قەنارەدایشا پەی بڕیۆ، بەڵام بەمەڵامەتو ئانەی تورکیا جە لایەنو دادگاو مافەکا مرۆڤو ئەوروپای (DMME)یۆ ۋنەپەرسایشۆ چنە نەکریۆ، سزاکێ لابریا. بەڵام گردو پسپۆرا یاسای ئینۍ سەرو هەمان قەناعەتو ئێمۆ، کە سزاو زینانیکەردەی هەتاهەتای سزێوەنە هامشێوەو جە قەنارەدای." ئاماژەش پانەیە کەرڎ کە خودو ئی سزێ پەی کوشتەی سەرو وێن و چارۆنە سەرو هەزارەها مرۆڤارە سەپیێنە. هەرچنە کۆمیتەو وەزیرانو ئەوروپای پرسیارەش جە بارۆ مکەرۆ، بەڵام تورکیا ژمارەکا ئاشکرا نمەکەرۆ. ئا پارێزنەرە واتیچش؛ دادگاو مافەکا مرۆڤو ئەوروپای سزای قورسەو هەتاهەتایی بە پێچەوانەو خاڵەو ٣ەمو پەیماننامەو مافەکا مرۆڤی نیانەرە و بە سزاو "ئەشکەنجە'ی پێناسەش کەردەن. بەڵام داخەم مەشۆ کۆمیتەو وەزیرا ئەرکو وێش جە جابەجێ کەردەو یاساکانە جە وەرانوەرو تورکیاینە ئینا کەموکوڵینە و جابەجێشا نمەکەرۆ.

'نزیکبییەیۆ دۆڵەتو تورکی جە ئیمراڵیینە بەماناو ناچارەسەریی پەرسەو کوردینە'

بیلمەز سەرنجش وست سەرو ئا کاتەی کە بەدۆڵەتو تورکی دریان سەبارەت بە سزاو هەتاهەتایی و واتش: "پێگەو بەڕێز ئۆجەلانی تەنیا پێوەس نیا بە ئێمەی پارێزنەراوە، هامکات هەڵوێسێوە سیاسیش هەن. چونکی دەربارەو مژارو کوردی خاوەن قسێو پێگەن. جە لایەنو تورکیایۆ دەربارەو مژارو کوردی پێسەو موخاتیبی وینیان. پۆکەی نزیک بییەیۆ دۆڵەتو تورکی جە ئیمراڵینە بەماناو ناچارەسەریی پەرسو کوردین. ئاستەنگیێوە گۆرەو وەردەمو دیموکراتیک بییەی تورکیای مژارو کوردی و گۆشەگیری ئیمراڵین."

'تورکیا جە مژارو پەرسەکاو کوردینە ناچارەسەریش بە بنەما گێرتەن  '

د. دییپا گۆڤینداراژن باسش چانەیە کەرد دەسو فرەو وڵاتا جە پیلانگێڵینی سەرو ڕابەرو گەلوو کوردی عەبدوڵا ئۆجالانینە بۍ و ئاماژەش پانەیە کەرڎ مێزەو چارەسەری کە جە مابەینو دۆڵەتو تورکی و کوردانە بۍ جە لایەنو دۆڵەتو تورکیۆ جە بەین بریا و واتش: "تورکیا جە مژارو پەرسەکا کوردینە ناچارەسەریش بە بنەما گێرتەن. گۆشەگیری ئیمراڵی بەردەواما. پەنەوازا جە چوارچێوەو سەروەری مافەکا مرۆڤی، یاسای و دیموکراسینە ئەرەمەزییەکێ ئەوروپای ئەرک و وەرپرسیاری وێشا جابەجێ بکەرا."