نەورۆزو قەندیلینە پەیامو کۆمیتەو ئازاڎیی ئۆجالانیی ونیاوە، کە دلێشنە داوا کریابێ هەوڵەکێ پەی دماییئارڎەی بە گۆشەگیری و هەرپاسە مسۆگەرکەرڎەی ئازاڎیی جەستەیی ڕابەرو گەلو کوردی عەبدوڵا ئۆجالانی هەسێ کریاوە.
کۆمیتەو ئازاڎیی ئۆجالانی، ئاهەنگو مەبارەککەرڎەی جەژنەو نەورۆزینە بنارو قەندیلینە، پەیامێوەش پێشکەش کەرد.
پەیامەکە حەکیم عەبدولکەریم، ئەندامو کۆمیتەکەی واناوە و واتش: "نەورۆز پەی کوردستانی ڕۆو مدرامانین دژو زاڵمی و زۆرداری، ڕۆو ژیوایۆ سرووشتی و هەستی نەتەوایەتیین، ڕۆو خاوەنداریین جە تارێخی پەڕ شکۆو گەلەکەیما، نەورۆز هەمیشە جەوهەرو یۆبییەی و پێوەیی گەلی و جووڵەی ئازاڎییوازیی گەلاو مەنتێقەکەین، کڵپە و تینەو ئاویرو نەورۆزی جۆشوخرۆش مدۆ گەلەکەیما و پا جۆشەوە یاگێش دلێ کۆشیای ئازاڎی و دیموکراسیینە گێرتێنە، نەورۆز مەبارەک و بەهادارا پەی کوردا چونکوم ڕاو ئازاڎییش پەی ڕۆشنە کەردێنمێوە.
درێژەو پەیامەکەیشنە ئامان، پێویسا دوژمنێ خاس چا ڕاسییە بیاوانە، کە ئی گەلە بێساعیب نییا، جە ڕۆو ئارۆینە ئاستی حەرە باڵانە ساعیبوو گەنجینێوەگەورەی فکری و ئایدۆلۆژیین، داراو سوپای حەرە بە دیسپلینێ و فیدایێ پارێزنای ڕەواین، ساعیبو ئیرادەو ملوێنان خەڵکی ئازاڎییوازی و ئاشتییوازین، ساعیبو بەرجەستەو دیموکراسی و پێوەژیوای ئازاڎانەو گەلان.
هەرپاسە بانگەوازش ونەو گەلوو وێما و گلێرگەی میاندەوڵەتی کریا، کە بەرەو ئیمرالی مەڕیۆ و سزاو دیسپلینی و سەپنای زیندانی زۆرەزمێ ڕەت بکریۆوە، حەر پەوکای ئازاڎیی جەستەیی بەڕێز عەبدوڵا ئۆجالانی بەهای گرنگە و تارێخییەش پەی گلێرگەی ئینسانی و ئاشتی وەرکەوتوو دلێڕاسەینە بۆ ".
