هیزی ٤ شەممە، سەعات ١٥:٣٠ی دمانیمەڕۊی کە هاموەخت بۍ چەنی ٨وو مارس (ئادار) ڕۊو جیهانیی ژەنا، جە شاروو بڕۊکسلوو پایتەخوو بەلجیکاینە، ١٧مین کۊنفرانسی میاندەوڵەتیی (یۊبییەی ئەورووپا، تورکیا، وەرکەوتوو دلێڕاسەی و کورڎی)، بارەگاو پەرلەمانوو ئەورووپاینە دەسش پەنە کەرد.

کۊنفڕانسەکە، جە چوارچووەو هەرمانەکاو کۊمسیۊنی مەدەنیی یۊبییەی ئەورووپای، فراکسیۊنوو پەرلەمانتاراو ئەورووپای یۊگێرتەی، چەپۍ، سۊسیالیستۍ و سەوزەکۍ و کۊنگرەو نەتەوەیی کورڎسانی- کەنەکە و ئەنیستیتۊو کورڎی بڕۊکسلنە، رێکوزیۍ و ژمارێوە فرۍ کەسایەتیۍ، سیاسەتمەدارۍ، پارلەمانتارۍ و ئەکادیمیسەنۍ، جە ئەورووپا، ئەمەریکا، ئاسیا، وەرکەوتوو دلێڕاسەی، تورکیا و هەر چوار بەشوو کورڎسانی و چنڎین ورگیرۍ خەڵاتوو نۊبڵوو ئاشتی و چالاکۍ، بەشڎارێنۍ چەنەش و ژمارێوە مێمانێچ بە پەیامی ڤیدیۊی و ئۊنلاین کۊنفڕانسەکەنە بەشڎارۍ بێنی پێسە، شیرین عەبادی-یە خەڵکوو ئێرانی و ورگیرەو خەڵاتوو نۊبڵوو ئاشتی، نوام چۊمسکی، ویرمەنڎی گەورەی ئەمەریکی و دنیۍ.

کۊنفڕانس بە دەیەقێوە مردای و ڕێزگێرتەی جە قوربانییاو بومەلەرزەکاو کورڎستانی، تورکیای و سووریای واچەو ڕێکوزا کریاوە.

کۊنفڕاسەکەنە کە دوو ڕوۍ خواینۊ، چنڎین پانێلۍ سەروو بارودۊخوو کورڎسانی، تورکیای، ئێراقی، سووریای، ئێرانی، وەرکاوتوو دلێڕاسەی بەگرڎی و چارەسەری دیمۊکراتیکی دۊزوو کورڎی  حەر چوار بەشوو کورڎسانینە بەتایبەتی قسەوباسشا سەرۊ کریۊ. بابەتێوە تەروو گرنگوو کۊنفڕانسی دۊخوو "ڕابەر ئۊجالان"ی و دەستەبەرکرڎەی ئازاڎیی جەسەیی و دماییئارڎەی پا گۊشەگیریە قورسەینە، کە ٢٤ ساڵێن سەپیان ملشرە. "ژەنی، ژیوای، ئازاڎی" و شۊڕشوو وەرکەوتوو کورڎسانی و ئێران و هەشتوو مارسی ڕۊو جیهانیی ژەنا و کۊشیای ئازاڎیی ژەنا باسوو کۊنفڕانسەکەی بێنۍ و بەگرنگیوە سەرشا مردۍ.

ئینە و هجوومە ئەرەگیرییەکاو ڕژێموو تورکیای پەی سەروو پانیشتوو و وەرنیشتوو کورڎانی، بەکارئارڎەی چەکی قەدەغە و کیمیایی جە لاو ڕژێموو ئەرڎۊغانیوە دژ بە گەریلاکاو ئازاڎی و ژیوگەو کورڎسانی لاو کەسە پسپۊڕا و شارەزایاوە قسێشا سەر کریا.

یاگۍ واتەینە، بابەت و مژارەکاو دلۍ کۊنفڕانسەکەی بە چنڎین زوانۍ پێسە، کورڎی، تورکی، فارسی، فەڕەنسی، ئینگلیزی، ئەڵمانی هتد... وەرگێڵنایشا پەی کریۊ.

دماتەریچ جە لاو چنڎین دەزگایا ئەرەیاونای و میدیایا کورڎیوە پێسە ستێرک تیڤی، میدیا هەبەر، ئێن ئاڕتی، کورڎسان ٢٤، ئاژانسوو هەواڵوو فوڕاتی، ژەنی تیڤی و چنڎین میدیا بێگاناوە، هەرمانۍ و چالاکییەکا دووە ڕۊو (یۊبییەی ئەورووپا، تورکیا، وەرکەوتوو دلێڕاسەی و کورڎی) ڕووەماڵ کریۍ و پەی ڕای گرڎینۍ فاڕیێوە.

س.ز