دەسەی ڕاوەبەری کۊنگرەو نەتەوەیی کورڎسان (کەنەکە)ی بۊنەو ١و ئایاری ڕۊو جەهانیی کرێکاراوە ئەرەیاۋنېۋەش ۋەڵاکەرڎۊ.

دەقو ئەرەیاۋناکەو کەنەکەی:

1 و گوڵان (ئایار)ی  ڕۊو کرێکارا جەهانی پیرۊز بۊ

کرێکارۍ و رەنجکېشا بە کۊشیا و وێڕاگریی وېشا، بە ئارەقو میا چەما و رەنجو وېشا 1 و گوڵانیشا کەرڎ بە ڕۊو  یۊبیەی، بە کۊشیای و هامپەشتیی کرێکارا جەهانی. ئی جەژنۍ جە ئیسەنە  جە سەرانسەرو دنیۍ پېسە ڕوۋۍ تایبەتی و ماناڎاری پیرۊز کریۊ.  ڕۊو ١و گوڵانی جە تەمامو کرێکارا و زەحمەتکێشا کورڎسانی و دنیۍ پیرۊز بۊ.

ڕۊو ١ و گوڵانی جەژنەو گرڎو خەڵکو کورڎسانیا. کورڎسانیۍ سەڎان ساڵېن پەی ئازاڎیی و رزگاری و ژیایۍ ئاسوودەی و سەرفرازی کۊشیا. ئی کۊشیایە ۋێش جە ۋێشنە رەنجێۋە گۊرە و ماناڎارا. ۋەرو ئانەی خەڵکو کورڎسانی کرێکارۍ و رەنجکېشۍ ئازاڎیی و رزگارینۍ. حەر پۊکەی کورڎسانیۍ پېۋەرە و بە فەخرۊ ئی جەژنۍ پیرۊز کەرا و بە جەژنەو ۋێشا مزاناش.

با ئی جەژنۍ جە تەماموو خەڵکی و گەریلای و پێشمەرگەی و شەڕڤانا، جە گرڎو خەباتکارا دۊزو ئازاڎیی و رزگاری کورڎسانی مبارەک بۊ.

رژێمە سەرکوتکەرەکۍ، گرڎ وەختۍ یاڎو ئی جەژنېشا قەڎەغە کەرڎەن. هەزاران عەرقەلە و وەربەسشا وستەن وەردەمو کرێکارا و رەنجدەرا، تا ئی ڕوۋەیە پېسە جەژنۍ مبارەک نەکەرا، بەڵام مەردم بۍ سڵەمایۊ، وەردەوام درێژەشا بەخەبات و کۊشیای و رەنجو ۋێشا دان و جە دیمو خەباتیەنە ئی جەژنېشا کەرڎېنە حەقیقەت و ساڵانە مبارەکەشا کەرڎېنە. گەلوو کورڎیچ حەر جە سەرەتاکا بیەیشۊ ئی ڕوۋەشە بە جەژنە پېسە جەژنەو ۋېش قەبوڵ کەرڎېنە و بە جۊش و خرۊشۍ فرۊ زەماۋنەش گېڵنێنە.

ئېساڵ، ئێمەی کورڎ و کورڎسانیا جە ئاژېوە هەستیار و جدینە پێشوازی جە 1 و گوڵانی مکەرمۍ. جە حەر چوۋار پارچەو کورڎسانیەنە ھجوم و پلانۍ دژ بە گەلوو کورڎی وەردەوامیشا ھەن. دوژمنۍ کورڎی پرۊژەکېشا گۊرېنۍ، گرڎو دەسکۊتەکا کورڎی ئینۍ چېرو تەرسۍ گۊرەینە. پۊکەی مشۊ گرڎو هێزە کورڎسانیەکا یەکدەنگی و  یۊبیەی ۋێشا ھېقم تەر کەرا و جە سەنگەرېوەنە دژ پا پلانا مرڎاوە و پوچشا کەراوە.

جە ئیسەنە جە تورکیا و سەرنیشتوو کورڎسانی ھورچنیېوە چارەنۋیسساز ئینا ئارانە. کورڎ چنی دۊسەکاش لیستېوەشا ئاماڎەکەرڎەن و بەشڎارۍ ھورچنیەکا با. ئی ھورچنیۍ گرنگېنۍ. جە سەرانسەرو تورکیاینە تەوەقوعو فاڕیای کریۊ. چی ھورچنیانە ئامانجو هامپەیمانی کورڎسانی شکستپنەئارڎەو رژێمی جەنگەرانی و فاشیستیا و کیاناو ژمارەېۋە فرەو نوێنەران پۍ پەڕلەمانی.

ئێمە پېسەو "ک، ن، ک"ەی،  پاڵپەشتی لیستو کورڎی (هەدەپە HDP – پارتو چەپیی سەوز)ی مکەرمۍ و داوا جە گەلەکەیما کەرمۍ کە بە جۊش و خرۊشۊ بلا سەرو سنوقەکا دەنگدای و ئیسفاڎە چی دەرفەتیە ھورگېرا.

پی بۊنۊ داوا جە گرڎو کورڎی و کورڎسانیا کەرمۍ  جە حەر شۊنێوەنە با بەشڎاری جە مەراسیمەکا 1 و گوڵانینە کەرا و جە دژو ھجوم و پلانەکا ئەرەگیرا دەنگو ناڕەزابیەی و قەبوڵ نەکەرڎەی ھوربڕا و پاڵ و هێزەکا پارېزناو کورڎسانینە.

ک ن ک، 1 و گوڵان (ئایار)ی جە گرڎو مەردمو کورڎسانی و جەهانی پیرۊز مکەرۊ. مبارەک بۊ ١ و گوڵانی، جەژنەو کرێکارا جەهانی.

ھ . ش