کەنەکە بە بۊنەو جەژنەو ڕەمەزانیوە پەیامێوە مەبارەکباییش ئاڕاسەو گەلوو کورڎی و تەماموو موسڵماناو دنیۍ کەرد و ئەرەیاوناش، بەداخۊ کە دووەبارە جە دۊخێوە دژوارنە جەژنە کەرمۍ و تا ئیساتێچ قاڕچنیەیۊ و ئەرەگیری سەروو گەلەکەیماوە نەمرڎان.
دەستەو ڕاوەبەریی کۊنگرەو نەتەوەیی کورڎسان (کەنەکە)ی، پەیامێوە مەبارەکبایی جەژنەو ڕەمەزانییش ئاڕاسەو گەلوو کورڎی و تەماموو موسڵماناو دنیۍ کەرد و واتش، دووەبارە جە دۊخێکی دژوار و سەختنە جەژنە کەرمۍ، جینۊسایدوو سەروو گەلەکەیما نەمرڎان، سروشتوو وەڵاتەکەیما دلێنە بریۊ، ئەرەگیری و هەڕەشەکاو دوژمنا سەروو پانیشت و وەرنیشتوو کورڎسانی تا بۍ زیادتەرۍ با.
باس چانەیچ کریان، جە وەرکەوتوو کورڎسانینە دماو سەرەورڎای "ژەنی، ژیوای، ئازاڎی" فشارەکاو دەوڵەتی پەی سەروو هاموەڵاتییا زیادۍ بیێنۍ و ڕۊبەڕۊ قۊرتە کۊمەڵایەتییەکۍ قووڵتەرۍ باوە، پانیشتیچنە قەیرانۍ ئابووریۍ و کۊمەڵایەتیۍ درێژەشا هەن، تا ئیساتۍ مشکیلەو مەنتێقە بڕیایرەکا حەل نەبییەن و هجوومەکاو دەوڵەتوو تورکی زیادتەرێچ بیێنی، جە هەمان وەختنە هجوومەکاو سەروو وەرنیشتی درێژەشا هەن.
پەوکای داوا کەرۊ، گرڎوو هێزە کورڎییەکا وەراوەروو ئا هجوومانە مرڎاوە، گرڎوو کورڎی و کورڎسانییا دژایەتیی ئەرەگیری و لەشکرکێشییەکا کەرا، دەنگشا وەراروەروو ئەرەگیرا بەرز کەراوە و جە ڕیزوو هێزەکاو پارێزنای کورڎسانینە یاگۍ وێشا گێرا.
دەربارەو ورچنیایەکاو سەرنیشتوو کورڎسانی و تورکیایچ ئەرەیاونانش، جە سەرنیشتوو وەڵاتەکەیمانە ورچنیەیۍ ئینا ئارانە و لیستوو نیشتمانپەروەراو کورڎی و دۊستەکاشا چێروو نامۍ "هامپەیمانیی نیشتمانی"ینە هەن، پێسە کەنەکەی پەشتیوانیی یەکڕیزیى نیشتمانیی کورڎسانی کەرمۍ و داوا جە گرڎوو گەلەکەیما کەرمۍ، جە دلێنە و جبەریچۊ بلا سەروو سندوقەکاو دەنگدای و دەنگ بدا و پەشتگیریی ئا یۊبییەیە کەرا.
جە ئاخیروو پەیامەکەینە ئامان، تەنانەت چی هەلومەرجەیچنە هومێڎەوارێنمۍ و باوڕما هەن، کە گەلەکەما جە ئایندێوە نزیکنە بە ئارامی و ئازاڎی جەژنە و زەماونڎەکاش سەروو خاکە ئازاڎەکەیشۊ کەرۊ، پی بۊنەوە جەژنەو ڕەمەزانی جە زیندانییا و ئازاڎیوازا، جە خەڵکوو کورڎسانی و گرڎوو جیهانی ئیسلامی مەبارەک کەرمۍ.
س.ز
