کەنەکە ئەرەیاۋناش، "ئی دەورەو پەرلەمانو پانیشتوو کورڎەسانی ئاڵۆزتەرین و پەڕ قەیرانتەرین دەورەو هۆرچنیەو پەرلەمانیا، پۊکەی ئی هۆرچنیە گرنگا و پەنەوازا خەڵك بلانۍ سەرو سنووقەکا دەنگدای و دەنگ بە کاندیدی نیشتیمانپەروەری بڎا کە مەسڵەحەتوو گەلەکەیما پارێزنا.
کۆنسەو ڕاوەبەری کۆنگرەو نەتەوەیی کورڎەسانی-کەنەکەی، جە بارەو ئەنجامدای هۆرچنیەو دەورەو ششەمو پەرلەمانو هەرێموو کورڎەسانیۆ ئەرەیاۋنێوەش وەڵا کەرڎۆ.
دەقو ئەرەیاۋناکەی پی جۆرەنە:
هۆرچنیەو ئی دەورەو پەرلەمانو هەرێمو پانیشتوو کورڎەسانی جە قۆناغێوە فرە تایبەتەنە ملۆڕاوە. قۆناغێک کە جە٣٣ ساڵەو تەمەنو ئا هەرێمە ڕسمیەو دەورەکا هۆرچنیەو پەرلەمانینە حەجگیز ئاڼنە ئاڵۆز و پەڕ قەیران نەبیەن. سەرو ئاستو دلېینەو کورڎةسانی، ناتەبایی لایەنە سیاسییەکا و گرژیی تنو بەینیشا، قەیرانەی ئابووری و بژێوی خەڵکی و بێ دەرامەتیی، کەمی خزمەتگوزاری و بێکاریی، جە کارکۊتەی پەرلەمانی و کەمتەرخەمیی حکومەتو کار پۆڕنای و قەرزە کەلەکەبیەکا سەریش، نیگەرانیی خەڵکی و ۋەرتەسککەردەیۆ ئازادییەکا، گېرتەی و دەمکوتکەردەی رۆنامەوانا، قەیران و کێشەکاو حکومەتو هەرێمی چنی بەغڎای، هەرپاسە دەسوستەینەی سەروازی و ئەمنی و ئاژاوەگێڵنیی دۆڵەتا هەرێێمی جە پانیشتوو کورڎةسانینە، ئینۍ و جەمۍ پەرسۍ تەرۍ ئا خەسڵەتێنۍ کە پانیشتوو کورڎەسانی و دەسەلاتو ڕاوەبەری هەرێمیشا پنە مشناسیۆوە.
هەلوێسو دەسەڵاتو ناوەندیی ئێراقیچ ۋەرا ۋەر بە هەرێمو کورڎەسانی نەک هەر هەڵوێسێوە دۆسانە نییا، بەڵکم بەبەردەوامیی ئینا کۆشش و بنکۆڵکەردەی و وەشکەرڎەی گرفتا تەرینە و گولانەکەردەیۆ ئا قەوارەینە. جگە چانەی جە دماو پڕۆسەو ریفراندۆمو٢٠١٧یۆ، بەشێوە فرەو خاکو پانیشتوو کورڎەسانیش وستۆ چێرو دەسەڵاتو ۋێش، پڕۆسەو فاڕای دیمۆگرافیاو شارو ناوچەکا کورڎەسانیچش درێژە پنەدا. جە لېوەتەریچۆ بە رێککۆتەی چنی دۆڵەتا هەرێمیی خجڵو پیلانگێڵنای و دلېنەبەردەی دەسکۆتەکا خەڵکو کورڎەسانیا. چنی دۆڵەتو تورکیای رێککۆتەی ئیمزا مکەرۆ و پارتە کورڎەسانیەکا قەڎەغە مکەرۆ، ڕا بە تورکیای مڎۆ بە قوڵایی دەیان کیلۆمەترا بێنە خاکو کورڎەسانی و سەرو حسابو مەسڵەحەتەکا خەڵکو کورڎەسانی رێککۆتەی ئابووری و ئەمنی و سەروازی ئیمزا مکەرۆ. هەرپاسە چنی دۆڵەتو ئێرانیچ بە مەبەسو سەرکوتکەردەی کۆششو رەواو گەلوو ۋەرکۆتوو کورڎەسانی، پەیماننامەو بێکاریگەریی و کۆنترۆڵکەردەی هێزە سیاسییەکا ئا بەشەو کورڎەسانی و بەزۆر فاڕایۆیشا پەی کەمپی ئیمزا مکەرۆ. ئینەیچ ئا خەسڵەتێنۍ کە هەڵوێسو حکومەتو ناوەندی ئێراقی و بەشێوە فرە جە سەرکردە و لایەنە سیاسییەکا ئێراقیشا پنە مشناسیۆوە.
بەلێ، رێک جە هەلومەرجێوە هەستیار و چارەنوویسسازەنە هۆرچنیەو پەرلەمانو پانیشتوو کورڎەسانی ملۆڕاوە. قۆناغێوە چارەنوویسسازا چونکی جە لێوە مەترسی گۆرە سەرو دەسکۆتەکا گەلەکەیما جە هەر چوار پارچەکەنە هەن و جە هەمانکاتیچنە دەرفەتی گۆرەما ئینا وەردەمەنە.
ئێمە جەکۆنگرەو نەتەوەیینە کە هەمیشە داواو تەبایی و یەکڕیزی گەلوو کورڎەسانی و هێزە سیاسییەکا مکەرمۍ، داوایچ مکەرمۍ پڕۆسەو هۆرچنیەی جە کەش وهەوێوە ئارام و شارسانینە و بێ دەسوەردای بلۆڕاوە. بە زۋان و رەفتاری ۋەرپەرسانە و دوور جە تنوتیژیی بانگاشەو هۆرچنیەی بکریۆ. هۆرچنیێوە ڕۆشن کە خەڵکو پانیشتوو کورڎەسانی ئازادانە بتاوا دەنگو ۋێشا بڎا. ئێمە دڵنیێنمۍ کە گەلوو پانیشتوو کورڎەسانی هوشیارێنۍ و دەنگو ۋێشا پا کاندیدا مڎا کە مەسڵەحەتە باڵاکاو خەڵکو کورڎەسانی پارێزنا و وەرگیری جە دەسکۆت و ماف و ئازادیەکاشا مکەرا و پەی کورڎەسانێوە ئازاڎی و دژ بە ئەرەگیری و پیلانەو نەیارا ئەرەکۊشا. هیوای گۆرەو ئێمە ئانەنە جە ئاکامو هۆرچنیێوە چامنە درووسینە ئەنجامەکەش قبوڵبکریۆ و دماییچ حکومەتێوە کارا کە جوابدەرەوەو ویستەکا دەنگدەرا و گرڎو گەلوو کورڎەسانی بۆ، ئەرەمەرزیۆ و دەس بەکارەکاش بکەرۆ.
