دەقو پەیامەکەو کەنەکەی:

جەژنەو مدرامانی، جەژنەو ئازاڎیی، نەورۊز پېرۊزبۊ

جە ۋەڵېنگەو کورڎشانیەنە، نەورۊز یاگێۋە دیارەش ھەنە، نەورۊز ڕۊو مدرامانیا، ڕۊو سەرھۊرداین، ڕۊو سەرکۊتەین سەرو ستەمیەرە. نەورۊز جەژنەو ئازاڎینە. نەورۊز سەرو بنەماو ئەرەکۊشای جە دژوو چێردەسەیی ۋەش بیەن. نەورۊز جە دژوو ستەمکاری، گرڎو شێۋەکا چێردەسەیی، بیەن بەسمبولو ئازاڎیی.

ئارۊ گەلو کورڎی بە ئەرەکۊشاو قوربانېدای نەورۊزش کەرڎەن بە ڕۊو زەماۋنۍ و ۋەشی و مدرامانی. پا ئەرەکۊشاو مدرامانېچە جە ئاستو مېان نەتەۋەینە نەورۊزش کەرڎەن بە جەژنەو کورڎا. خەڵکو کورڎسانی جە کورڎسانو جبەرو ۋڵاتی گرڎ ساڵێۋە پۍ ڕزگاری و ئازاڎیی نەورۊزی پېرۊز کەرا. گەلو کورڎی جە شارو دەگاو زینڎان و گرڎو کایەکاو ژیاینە، نەورۊزش کەرڎەن بە سەنگەرو ئەرەکۊشای پۍ ئازاڎیی و ڕزگاری.

بێستا جە سەران سەرو کورڎسانېەنەئێرو نەورۊزی بە گوڕو بە تېنتەرا. جە پانېشتوو ۋەرنېشتوو کورڎسانېەنە بە ڕەسمی پېرۊز کریۊ. جە ۋەرکەوتوو سەرنېشتوو کورڎسانیچ سەرەڕاو گرڎو ئاستەنگېەکا، خەڵکو کورڎسانی نەورۊز بە ماناو ۋێشۊ پېرۊز کەراو ئێرو نەورۊزی بەتېنتەر ھورکریۊ.

ئێمە بەنەورۊز ساڵێۋە تازۍ دەسپنەکەرمۍ. ساڵەی ۋیەرڎۍ بە گرڎ شێۋۍ ساڵەو ئەرەکۊشای بۍ. شش مانگێن جە ۋەرکەوتوو کورڎسانی و گرڎو ئێرانی بە ۋەرھەنگامەو ژەناو بەدروشمەو" ژەنی، ژیای، ئازاڎیی" سەرھوردێۋە گۊرە ملۊ ڕاۋە. جە سەرنېشتوو ۋەرنېشتوو کورڎسانی کارەساتو بومەلەرزێۋە گۊرە کەوتوو دەیان ھەزار مرۊڤۍ گېانشا جە دەسداو بە ملۋێنان مرۊڤێچ زەرەرشا ۋنە کۊت. سەرەڕاو ئا ئاژەیچە  دوژمنەکێما جە ھجومەکاشا ۋەردەوامۍ بێنۍ.

جە ئېسەوە دیارا کە ئێساڵ بۊ بە ساڵەو ئەرەکۊشایۍ گۊرەی. دوژمنۍ ئێمە جە فرەو یاگاوە ھجومکەرانۍ. بەتایبەت دۊڵەتوو ترکی پۍ دلێنەبەرڎەو گرڎو دەسکۊتەکاما جە پانېشتوو سەرنېشتوو ۋەرنېشتوو کورڎسانی خەریکو ھجومۍ ۋەردەوامېن. دۊڵەتو ئێرانېچ بە گرڎ شێۋۍ گەلوو چالاکا ئێمەش کەرڎەن ئامانج. حەرچنە پانېشتوو کورڎسانی پێگێۋە ڕەسمېش ھەن، بەڵام نېا ئاژێۋە خاسەنە، ئاژەو مەنتېقە ئەرەبڕیەکاو کورڎسانی خراپا. دوژمنەکێما پۍ تێکداو ئا پێگەو مەکانېە خەریکۍ پېلان گێڵناینۍ. جە ۋەرنېشتوو کورڎسانېچ ئەرەگېری و ھجومەکۍ ترکی ۋەردەوامېش ھەن. ڕژێمو سوریایچ چەمەڕاو ھەلێۋەن، پۍ ئانەی  ۋەدەس ئاماکاو ۋەرنېشتوو کورڎسانی دلێنە بەرۊ.

حەرپاسە ئێساڵ شاڵۋەگەڕو پەیماننامەو لۊزانیا. دوژمنەکێما نېازشاھەن سەڎ ساڵۍ تەریچ قەوارەو پەېماننامەو لۊزانی سەرو ئێمەرە سەپنا. ئێمەیچ گەرەکمانە ئا پەیماننامەیە کە بەزۊر سەرو ئێمەرە سەپنانشا دلێشەنە بەرمۍ و پارچە پارچەش کەرمۍ. پەنەوازا ئێمە جە دژوو پەیماننامەو لۊزانی، ئێساڵی کەرمۍ بە ساڵەو یەکڕیزی و یۊبیەو ۋێما دلێنە بە قوەت کەرمۍ.

ئی ئاژە ئەرکێۋە فرە وزۊ سەرو شاناما. پێویسا ۋەران ۋەرو گرڎ ئەرەگېریەکانە تەگبېرو ۋێما کەرمۍ. پێویسا ھێزو پارێزنای بەقوەتتەر کەرمۍ، پێویسا ھجومو دوژمناما دلێنە بەرمۍ. پێویسا دەسکۊتەکاما پارێزنمۍ و دەسکۊتۍ زیاتەریچ ۋەدەس بارمۍ. پۍ ئانەیچ ئەشۊ جە ئەۋەڵۊ یەکڕیزی و یۊبېەی دلۍ یانەو کورڎا بارمێنە دی و یۊبېەی نەتەۋەیی بە قوەت کەرمۍ. پێۋیسا ئێساڵی کەرمێنە ساڵەو ئازاڎیی.

ئێمە جە ئاژێۋە چانەنە پێشوازی جە نەورۊزی مکەرمۍ. نەورۊزی بەماناو ڕۊحو مدرامانی پېرۊز مکەرمۍ. ئێمە داوا جە گەلوو ۋێما کەرمۍ و ماچمۍ؛ پێسە گرڎ ساڵەکای تەری لودۍ مەیڎان و کۊڵانەکا بە ڕۊحو مدرامانی نەورۊزی پېرۊز کەرڎۍ.

پەنەوازا چی قۊناغە زەرورەنەو جە پرۊسەو ئەرەکۊشای پۍ ئازاڎیی ڕزگاری کورڎسانی، نەورۊز بۊ بە ڕۊشنایۍ گەشو پێۋەرە بیەی و یۊبیەی نەتەۋەیی کورڎسانی.

کۊنگرەو نەتەۋەیی کورڎسانی پی قەناعەتو ڕۊحیەتۊ نەورۊزی بە دڵگەرمی نەتەۋەیی و نېشتېمانی جە گرڎو کورڎسانېا پېرۊز مکەرۊ.

ۋەخت ۋەختو بەقوەت کەرڎەو مدرامنیا.

ۋەخت ۋەختو ئازاڎییا

نەورۊز پېرۊز بۊ

ھ.ش