کەنەکە ئەرەیاۋناش گەلو کوردی بەشێوە نییا جە جەنگو ئیسرائیل-ئێرانی، کورد گەرەکشا گرڎو پرسەکا بە گفتوگۆ و ئاشتیانە چارەسەرې بکریا و واتش: "چی پرۆسەنە یەکڕیزی دلې یانەو کوردیی ژیۋاییا. کۊشش مکەرمۍ پەی بنیاڎنیای پلاتفۆڕمێوە هامبەشو لایەنەکا ۋەرکۊتی."
کۆنگرەو نەتەوەیی کوردەسانی (کەنەکە) پېوەس بە جەنگو بەینو ئیسرائیل-ئێرانی و ئا پێشئامای و فاڕیایۍ جە هەرێمەکەنە ئینې ئارانە، ئەرەیاۋنێوەش وەڵا کەرڎۆ.
ئەرەیاۋناکەو کەنەکەی پی جۊرەنە:
"جەنگو بەینو ئێرانی و ئیسرائیلی جەنگێوە تازە نیا. دەیان ساڵێن بە ناڕاسەوخۆ ملەملانێ و جەنگ جە ما بەینو ئی دووە دۆڵەتەینە ئینا ئارانە. ماوێوە درێژ ئی جەنگە جە ما بەینو ئیسرائیلی و هێزە بە وەکالەت و هامپەیمانەکا ئێرانینە لوۍ ڕاوە. بەڵام جە ماوەو ١٠ ڕۆی ۋېیەردەینە جەنگێوە ڕاسەوخۆ جە ما بەینو ئیسرائیلی و ئێرانینە پەی وێشا ئامان ئاراوە. جە هێزیۊن ویلایەتە یۊگێرتەکې ئەمریکایچ بە راسەوخۆ بەشدارو دلۍ جەنگەکەی بی. ئی جەنگە تا مۍ گۊرەتەرو و ۋەرفراوانتەر بۆ. جەنگەکە جە غەزۆ دەسش پنەکەرڎ، لوبنان و سوریا و یەمەنش پۊڕنې و ئیساتۍ ئێران بیەن بە مېڎانو ئی جەنگەیە. مژارەکە جە پرس و کێشمەکێشو بەینو دووۍ دۆڵەتاوە پڕانۆ، بیەن بە پرسێوە مېیاندۆڵەتی و جەهانی.
کورد بەشێوە نییا جە جەنگەکەی
ئێمە پېسە گەلو کوردی لایەنێوە ئی جەنگەیە نیەنمۍ و حەرچڼە هەوڵ بڎەیمې نەبیمې بە تەرەفێوە جەنگەکەی، بەڵام ئی جەنگە عیلاقەش بە ئێمەیچۆ هەن و کاریگەریۍ فرەش سەرو گەل و وڵاتەکەیما بۆنە. فرێوە جە بنکە و بارەگا سەروازییەکا ئێرانی ئینۍ ۋەرکۊتوو کوردەسانینە و جە لایەنو ئیسراییلیوە مکریا ئامانج و بیەن بە مەڵامەتو بارگرانی و زەحمەتی سەرو ژیۋای و گوزەرانو گەلەکەیما چی بەشەو کوردەسانینە. جە لېوەتەریچۆ فرەو مووشەک و فڕۆکەکا ئا وڵاتا ئاسمانو کوردەسانیرە موېیەرانە و جە فرەو روواوە زەرەرشا جە ئابووری و ژیۋگەو کوردەسانی دان.
ویستو کوردی؛ چارەسەرین جە ڕاو ئاشتی و دیالۆگیۆ...
پېسە گەلو کوردی گەرەکما نیا جە قۆڵێوە ئی جەنگەینە بیمۍ و گەرەکمانە گرڎو کێشە و ئاڵۆزییەکا هەرێمەکەیما بە گفتوگۆ و ئاشتی چارەسەر بکریا. ئی جەنگە بە ویستو ئێمە دەسش پنە نەکەرڎەن، بەڵام جە ئیسەنە ئێمە ئینایمۍ دلېڕاسەو ئی جەنگەینە. ئی جەنگە کە جە ماوەو ٢١ مانگا ۋېیەردەینە جە ۋەرکۊتوو مېیامینینە بەردەوام بیەن، ئاسەواری گۊرەش بیەن و بۆش. ئا ئاژەو ئیساتې کە بەرهەمو پەیماننامەکا سایکس بیکۆی و لۆزانیا بەرەو هۊرشێونایۆ و فاڕیای ملۆ. جە ئاکامو ئی جەنگەینە کریۆ نەخشەو ناوچەکەی بە تەمامی فاڕیۊنە. پېسە گەلو کوردی تا چن ئامادێنمۍ پەی ئی فاڕیایا؟ ئینە پرسیارێوە گرنگەنە و ئینا یاگۍ ۋێشەنە. چی کاتەنە یۊگێرتەیی دلې یانەو کوردی فرە گرنگا. سەرەتا هێز و لایەنەکۍ ۋەرکۊتوو کوردەسانی و دماتەریچ گرڎو هێزو لایەنەکا کوردەسانی مشۊم چی کات و ساتەنە پێوەرە جە گفتوگۆنە با و یەکڕیزیی دلې ۋێشا هێقمتەر بکەرا.
هەرمانەو کەنەکەی پەی یەکڕیزی یانەو کوردییا؛ بنیاڎنیای پلاتفۆڕمێوە هامبەشین...
ئێمە پېسە کەنەکەی هەمیشە کار و کۊششما پەی یۆگێرتەیی دلې یانەو کوردی بیەن و هەوڵما دان کار و کۊشش و ۋێما پەی ئا مەبسیە ۋەرفراوانتەر بکەرمۍ. بە تایبەتی جە ئیساتێنە کە پرسو چارەنوویسو گەلەکەیما جە ۋەرکۊتوو کوردەسانینە ئینا ڕۊژەڤەنە، هەوڵ مڎەیمې کار و کۊششو ۋێما سەرو ئی بەشەو کوردەسانی چڕتەر بکەرمېوە و هەر پاسە کە مزانیۆ ماوێوەن جە ما بەینو حیزب و ڕێکوزیاکا ۋەرکۊتوو کوردەسانینە هەرمانە مکەرمې پەی بنیاڎنیای پلاتفۆرمێوە هامبەشی و جە ئیساتێچەنە کار و کۊششما چی بوارەنە بەردەواما. هەر پەی ئی مەبەسیە هەوڵ مڎەیمۍ جە ڕوانی ئایندەنە گرڎو هەوڵ و هەرەکەتو ۋێما وزمې خزمەتو پەرە پنەدای یەکڕیزی بەینو پارت و لایەنەکا ۋەرکۊتوو کوردەسانی و جە ڕاو سەر ۋنەدای گرڎو حیزب و ڕێکوزیاکاوە، هەوڵ مڎەیمې میکانیزمێوە هەماهەنگی جە ما بەینو حیزب و ڕێکوزیاکا ۋەرکۊتوو کوردەسانینە ئەرەمەرزنمۍ.
بانگەواز پەی یەکڕیزی و هێقمکەردەی دلې یانەو کوردی
پی بۆنۆ سەرەتا داوا جە هېزەکا ۋەرکۊتوو کوردەسانی و دوایچ جە گرڎو هێز و لایەنەکا کوردەسانی مکەرمۍ کە پاڵپەشتۍ کۊششەکاما با پەی بەهێزتەرکەردەی یەکڕیزی دلې یانەو کوردی و جە زووتەرین وەختەنە گلېرۍ بیمېوە و سەرو ستراتیجی و هەرمانەی هامبەشې هەنگامە بنیەیمې. جە دمادمایچەنە داوا جە گرڎو لایەنەکا ئی جەنگەیە مکەرمۍ بە زووتەرین کات جەنگ مردنا و کێشەکاشا بە گفتوگۆ چارەسەر بکەرا."
