کەنەکە داوا کەرۊ کورڎسانیۍ و دۊسەکێشا ساڵیاڎوو پیلانگێڵنی و گەلەکۊمەو ١٥ی شوباتینە بەشداریی وێنیشاندای و چالاکییەکا بەتایبەتی وێنیشانەدایەکەو کۊڵنی کەرا و پیلانگێڵنا شەرمەزار کەرا.
کۊنگرەو نەتەوەیی کورڎسانی (کەنەکە)، بارەو ٢٥ەمین ساڵیاڎوو پیلانگێڵنیی میاننەتەوەیی دژی ڕابەروو گەلوو کوردی عەبدوڵا ئۊجالانینە ئەرەیاوناێوەش وەڵا کەرڎۊ و دلێشنە داواش کەرڎێنە کورڎسانیۍ و دۊسێشا بە بەشدارییشا جە چالاکییەکانە و وێنیشاندایەکاو تایبەت پا ساڵیاڎەینە، پیلانگێڵنۍ و هامپەیمانۍ پیلانگێڵنا شەرمەزار کەرا، بەتایبەتی کەنەکە پەی بەشداریی جە وێنیشاندای گەورەو کۊڵنینە، کە ١٧و شوباتی ملۊ ڕاوە، داواش کەرڎێنە.
دەقوو ئەرەیاونای کەنەکەی پێسنەن:
ئێمە گەلەکۊمەی ناڕەواو ١٥ شوباتوو ١٩٩٩، کە جە کەسێتیی بەڕێز عەبدوڵا ئۊجالانینە، جە دژوو جمیەری ئازاڎیوازوو کورڎسانینە کریا، بەتندی شەرمەزار کەرمێ!
١٥و شوباتوو ١٩٩٩ینە نادادپەروەری و ناڕەوایێوە گەورە کریا. لاێوە گەورەیی گەلوو کورڎسانی و سەرۊکوو پەکەکەی بەڕێز عەبدوڵا ئۊجالان، لاێوە تەریچۊ دەوڵەتی ئەرەگیرکەروو تورکیای و دەوڵەتە هامپەیمانەکاش. بەڕێز ئۊجالان خەبات پەی دۊزوو ئازاڎیی گەلوو وێش کەرۊ، کۊشیۊ پەی ڕزگاریی وەڵاتوو وێش. دوژمن و هامپەیمانە جیهانییەکێشا ڕێکۍ کەوتۍ و گەرەکشابۍ بەرەکاو دنیێش سەر وزارە، ڕاو هەناسەیش وەنە گێرا، فکرشا جە ویژدان و مافوو ئینسانی و یاسۍ و دادوەری و ئەخلاقی نەکەرڎۊ، وەختۍ قەرارشا دا گەورێوە کوردی، کە پەی ویژدان و دادپەروەری، ئاشتی و یەکسانی و ئازاڎی و گردوو بەها ئینسانییەکا خەبات کەرۊ، بێدەنگ کەرا و ڕاو ژیوایش وەنە گێرا.
ڕێککەوتەی بەینوو تورکیای و هامپەیمانە جیهانییەکا، حەر جە ئەمەریکاوە گێرە تا چندین دەوڵەتۍ دلۍ یۊبییەی ئەورووپای، یۊنان و تا ڕووسیا و ئیسرائیل، میسر و کینیا، گر چا بارۊ یۊشا گێرت و بەرژەوەندییشا چانەینە دیۊ، کە گردوو نۊرمە ئینسانی و ئەخلاقییەکا وزا چێروو پایا، گردوو توانا و دەزگا سیخوڕییەکاشا دژوو بەڕێز ئۊجالانی وزا هەرمانە، کە چێروو پارێزنای یۊنانی ئەنداموو یۊبییەی ئەورووپاینە بۍ، تا بە فێڵۍ و خیانەت گێراش و بداش دەسوو تورکیایۊ.
ئامانجی گەلەکۊمەکەی ئانە بۍ، کە جمیەروو ئازاڎیی گەلوو کورڎسانی دلێنە بەرا. پڕۊسەو دماو گەلەکۊمەی بەڕۊشنی بەرش وست، کە ئا ناوەندە نادادپەروەرانۍ نەیاوۍ مەیل و داواو وێشا و ئامانجشا ناما دی. ئاخر هومێدشا ئانە بۍ پەکەکە کە سەرمەشقوو جمیەری نەتەوەیی کورڎسانین، تێکش بدا و دلێشنە بەرا. یان حەر حیچ نەبۊ فرە لاوازش کەرا. وەلۍ ئانە کە چەمەڕێش بێنۍ ماوەو ئی ٢٣ ساڵەینە بەتەمامی پێچەوانە بیۊ. بەڕێز ئۊجالان زینداننە وەرگێرییش کەرد و زیندانش کەرد بە مەیدانوو کۊشیای. لێوە تەریچۊ جمیەروو ئازاڎی و گردوو خەڵکوو کورڎسانیچ مدرامانێوە بێوێنەشا کەرد و گەلەکۊمەکێشا پووچەڵە کەرڎۊ.
حەرچند گەلەکۊمەکەرۍ نەیاوۍ ئامانجەکاشا، وەلۍ حەر جە پیلانگێڵنای و هجوومی بەرڎەوامێنۍ. هەڵای دەوڵەتوو تورکیایچ بە گرد شێوازێوە دوژمنایەتیی گەلوو کورڎسانی کەرۊ، بەرڎەوامیی بە هجوومەکاش مدۊ. ئا دەوڵەتە نەک حەر سەرنیشتوو کورڎسانینە، پانیشت و وەرنیشت و وەرنیشتوو کورڎسانینە دوژمنایەتیی گەلوو کوردی کەرۊ. جە بواروو میاننەتەوەییچنە هەوڵۍ مدۊ کورد نەناسیا و بەرڎەوام پەلامارۍ گردوو دەسکەوتەکاو کورڎسانی مدۊ. پیلانگێڵی بە شێوازی جیاواز بەرڎەواما. پێویسا کورڎۍ دۊساو دۊزوو کورڎسانی ئا ڕاسییە بوینا و پاسە ئامادەکاری کەرا و کۊشیای فراوان کەرا.
٢٥ ساڵۍ سەروو گەلەکۊمەکیی ١٥ شوباتیترە ملۊ. بەڕێز عەبدوڵا ئۊجالان تا ئیساتێچ ئینا زیندانداننە و ئینا گۊشەگیرکەرڎەێوە تندنەنە. ٣٥ مانگێن بەڕێز ئۊجالان و ٣ هامڕێش ئیمرالیینە حیچ هەواڵ و زانیاریێوەشا نییا. ماوەو ئی ٣٥ مانگەینە نە بنەیانە، نە پارێزنەر، نە کەسی تەر، کە متمانەما بۊ پەنەش، بەڕێز ئۊجالان و هامڕایەکێش دیێنۍ و نە دەنگیچش ژنەویان. ئەوانیشیان ماوەو ئی ٣٥ مانگەینە حیچ نامە و پەیوەندیێوی تەلەفۊنیما پەنە نەیاوان. چی بارەوە، ١٠.١٠.٢٠٢٣ وە دۊستاو بەڕێز ئۊجالانی و دۊساو گەلوو کوردی هەڵمەتێوە گەورێشا سەروو ئاستی میاندەوڵەتی بە نامۍ "ئازاڎیی پەی ئۊجالانی، چارەسەری سیاسی پەی پەرسەو کوردی" دەس پەنە کەرڎەن و وەرفراوان بەراش ڕاوە. ئێمە پێسە کەنەکەی چی هەڵمەتێنە یاگۍ وێما گێرمۍ و پەشتیوانیی هەڵمەتەو ئازاڎیی بەڕێز ئۊجالانی کەرمۍ و داوا وەنەو گەلی و گردووهێزەکاو کورڎسانی کەرمۍ پەشتیوانۍ ئی هەڵمەتۍ با.
چوارچوەو ئی هەڵمەتێنە ڕۊو شەممەی ڕێککەوتوو ٢٠٢٤.٠٢.١٧ ڕاپیمای و کۊبییەیۊ گەورە شاروو کۊڵنوو ئەڵمانیاینە بە سەرپەرشتیی دۊسان و هامکاراو بەڕێز ئۊجالانی کریۊ. پی بۊنەوە ئێمە پێسە کەنەکەی داوا وەنەو گردوو کورڎسانییا و دۊساو کوردی کەرمۍ، کە پێسە ١٥ شوباتوو ١٩٩٩ بەشداریی ئی ڕاپیمایە کەرا و ئاڵاو ئازاڎیی ورکەرا و پیلانگێڵنا شەرمەزارۍ کەرا.
کۊنگرەو نەتەوەیی کورڎسانی ساڵوەگێڵوو گەلەکۊمەو ١٥و شوباتینە، جارێوە تەر داوا وەنەو گردوو کورڎسانییا کەرۊ، دلۍ وەڵاتینە و حەرلاێوەنە با. دەنگ و هاواروو کۊشیای پەی ئازاڎی بەڕیز ئۊجالانی و ڕزگاریی کورڎسانی بەرز کەراوە. یۊبییەی دلێشا و هامپەیمانیی چەنی دۊسەکاشا خاستەر و قەوەتتەر کەرا. نەیارۍ و هامپەیماناشا شەرمەزارۍ کەرا.
حەرپاسە کەنەکە داوا وەنەو گردوو کورڎسانییا کەرۊ، بەشداریی پرۊتستۊکەرڎەی گەلەکۊمەو ١٥ شوباتی با. هەڵوێستوو کۊشیای وێشا سەروو دۊزوو کوردی و کورڎسانیوە نیشانوو یاری و نەیاری بڎا."
