کۆنسەو ئەوروپای پاشێلکەردەو ئازادیی ڕابەربڕیەی جە تورکیانە زەنگوو ئاگاڎارکەردەیۆین، کۆنسەو ئەوروپای بەتایبەت بەمەڵامەتوو سانسۆروو ڕۆنامەواناوە جە تەرەفوو ئیدارەو ئەردۆگانیوە ناڕەحەتا.
تورکیا یۆن جە ٤٦ وڵاتەکەو ئەنداما کۆنسەو ئەوروپای، کۆمیسەرەو مافەکا مرۆڤوو کۆنسەو ئەوروپای، دونجا میجاتۆڤیچە پەیوەس بە ئازاڎیی ڕابەربڕیەی و میدیای واتش: "ڕۆنامەوانا و داکۆکیکارا جە مافوو مرۆڤی و گلێرگەی مەدەنی دلۍ ستەمی و فشاری یاسایی و سیستماتیکی دوژمنانەینە، درێژە بە کار و خەباتی مڎا".
ئەرەیاۋناش ڕاگێرتەی جە خەباتوو ئازاڎیی ڕابەربڕیەی بیەن بە مایۍ چنڎین پاشێلکاریا مافوو مرۆڤی و "یاوان بە ئاستێوە مەترسیڎار".
کۆمیسەرە ئەرەیاۋناش ئی ئاژە بیەن بە مەڵامەتوو وۍ سانسۆرکەردەی ڕۆنامەوانا و چاپەمەنی سەربەخۆی، حەرپاسە سەرنجش وست سەروو فشاری و کپکەردەی سیستماتیکی دەنگە ڕەخنەگرەکا دلۍ ڕۆنامەوانا و پارێزنەرانە.
سەرۆکەو کۆنسەو ئەوروپای بۆشناکی میجاتۆڤیچە نیگەرانی ۋێش بەربڕی ۋەرا ۋەر بە سنووردارکەردەی ئازاڎیی و "فشاری دڕندانەو پۆلیسی" و "گێرتەی بەکۆمەڵی" و دادگاییکەردەی ۋێنیشاندای ئاشتیانەی.
کۆمیسەرە سەبارەڎ بە قەڎەغەکەردەی ۋێنیشاندای ئاشتیانەی نیگەرانیش بەربڕی و واتش: "بەتایبەت یاگۍ ناڕەحەتیا کە ڕاپیماکەو ئیستەنبوڵی بۊنەو ٨ و ئاداریۆ، ڕۊو جەهانیی ژەناوە، ٨ ساڵێن قەڎەغەکریان".
حەرپاسە سەربەخۆنەبیەی دادوەرییش پێسە مەترسیێوە وجودی سەروو سەروەریی یاسای ئشناسا.
کۆمیسەرە داواش جە ئەنقەرەی کەرد، زینڎانیا ویژدانی ئازاڎ بکەرۆ، چەمۍ یاساکاشەرە خشکنۊوە و قەرارەکاو دادگاو مافەکا مرۆڤوو ئەوروپای جابەجێ کەرۆ.
