کەرنەڤال و نەورۊی جە سێدارانو ئەحمەڎ ئاوای بە ئامەڎەبیەو چنڎین مێمانە جە پانېشتوو کورڎسانی و ۋەرکۊتوو کورڎسانی و بە سرودەو ئەی ڕەقېبی دەسش بە بەرنامەکاش کەرڎ.

ئەمېن حاجی سەرپەرشتېارو باڵاو کەرنەڤاڵی واتەو سەرەتاو کەرنەڤاڵەکەیش پێشکەشکەرڎو ۋاتش:"خێرئامای جە مێمانە بەڕێزەکا کەرو ھېواڎارەنا نەورۊزو ئێساڵی بۊ بە خێرو ۋەشی پۍ گەلوو کورڎی دیارا مېلەتەکەما پۍ ئی جەژنۍ قوربانی فرەشدان چنڎین جارێن ڕۊڵەکۍ ئی مېلەتیە سەرو ئی نەورۊزیە توشو ئەشکەنجەو زینڎان و جەداردای بیێنۍ، ھەورامان پێسە بەشێۋە سەرەکی کورڎەواری گرڎ ساڵۍ جە پانېشتوو ۋەرکۊتوو کورڎسانی ئی یاڎێشا بەرز ڕاگێرتێنۍ".

ئەمېن حاجی واتش؛ بە نامۍ گرڎیتاوە خێرئامای جە مامۊسا و ھونەرو ھۊرامانی مامۊسا "حەمەحسێن" کێمنەی مکەرمۍ کە جە ۋەرکەوتوو کورڎسانیۊ تەشریفش ئارڎەن و ماچۊ مامۊسای نامبریا نزیک بەسەڎێۋەن خزمەڎ بە ھونەرو سېاچەمانەی و ھونەرو ھۊرامانی مکەرۊو سەرو ئانەیچ چنڎین جارۍ دەربەدەرو ئاوارە بیەن ئارۊ مامۊسا ئېنا چنی ئێمەو نەورۊزو ئێساڵېما ڕازاوەتەر کەرۆ.

ئەمېن حاجی جە درێژەو قسەکاشنە مژدەش بە ھونەرمەنڎاو ھونەر دۊسا دا کە ماڵپەرو ھۊرامان نېوزی ورمێزۊ بە ۋەشکەرڎەو پەیکەرێۋە پۍ مامۊسا حەمەحسێنی جە دەروازەو ھۊرامانی جە پانېشتو کورڎسانی منېۊشەرە.

دماتەر مامۊسا جەلېل عەباسی خێرئامایش جە مامۊسا حەمەحسێنی کەرڎو سەرنجش وست سەرو ۋەڵېنگەو نەورۊزی و ۋاتش:" ئەرەنېشتاو قەڎیمو زاگرۊسی و مېزۊپۊتامېای یوۋەمېن گلێرگە بێنۍ کە پەیشا بەرڎ بە زانستو ھەسارە شناسای و زەمېن شناسی بە فەرھەنگی بەجېا کەرڎەیۊشەو ڕۊی مانگۍ و ڕۊی بە نامە نېایشا یوۋەمېن کەسۍ بێنۍ کە پەیشا بەرڎ بە گرنگی ئاوێری جە ژیانەنە سەردەمۍ کە خەڵکی تەر جە سروشتی تەرسێنۍ قوربانی پۍ تەرسەکاو سروشتی کەرێنۍ خەڵکو زاگرۊسی واتە مېدیەکۍ یانی کورڎ ھەوڵشدا کە سروشتی دەسەمۊ کەرۊ بە ژیایۍ عالتەری، نەورۊز جە سەرسەعبو تاریخیۋە ھېنو ئەرەنېشتاو ڕەسەنو زاگرۊسی و مېزۊ پۊتامېاېن ئێمە بێجگە چانەی کە تاریخێۋە سیاسیما ھەن کە تاریخێۋە بە دەسەڵات یاواو مادەکان تاریخێۋە کلتوری و فەرھەنگی و ئاینېچما ھەن کە کەرۊنە ٣٩٧١ ساڵ تاریخێۋەن نزیک بە ٢٠ سەدۍ ۋەڵۍ سەرھۊرداو حەزرەتو"عېسای مەسېح"ین ۋەڵۍ جە ئەڎا بیەو ئاتزای ئێمە مەرزنامارە .

عەباسی ماچۊ؛ نەورۊز واتە یوۋەم ڕۊ چونکی ئێمە بێنمۍ کە یوۋەمجار ئاخرو ساڵۍ ۋە سەرەتاو ساڵێما دیاری کەرڎ، ماچۊ ئا شۊڕە چراوۍ کە ئێرو نەورۊزیش پنە کریۊۋە شۊرە چراۋێنە بە چۊکڵە دارو یانەو پېرشالېاریۋە بە ھەناسەو پېری و جوانېۊ مێویاگۍ بە یاگۍ کورڎسانی گۊرەی گێڵۊو گڕەکێش جە بابە گوڕگوڕۊ ھورگێرۊ و حەتا بۊ بە شۊڵەچراوۍ بە کڵپەتەر پۍ ئانەی حەرچی پوشو پەڵاشو جەھلی ھەن ماڵۊنەش پۍ ئانەی گڕو تېن بڎۊ بە ژیای، بە گلێرگەی، بە نېشتېمانی، ئێمە سەربەرزێنمۍ پا تاریخەی کە ھەنما ۋەڵۍ گرڎو گەلاو دنېێۋە تۊمارما کەرڎەنو نۋیستەنماۋە. واوەی نەورۊزتا پېرۊزبۊ.

دماتەر "سېروان خالېدی" بە گۊرانیەو نەورۊزی کەرنەڤاڵەکەش گەشتەر کەرڎ.

"ئېسماعېل خورماڵی" یۊ جە شاعېرە گۊرەکاو کورڎی و ھۊرامانی بەشدارو کەرنەڤاڵەکەی بۍ و بە ۋەنایۊ دوۋۍ شېعرا مەرسیمەکەش بە جۊشتەر کەرڎ.

کەرنەڤاڵەکە بە زەماۋنەو ھورپڕای دمایش بە بەرنامەکاش ئاورڎ

  ھ.ش