کەشەکاو کوردسانیینە ٨وو مارسی ڕۆو جیهانی ژەنە ڕەنجدەر و کۆشەرا بە جۆشوخرۆشۆ مەبارەک کریا. مەبارەکباییەکەنە ئەندامەو دەسەو فەرماندەیی یەژاستاری ئارژین دێرسیمە واچێوەش پێشکەش کەرد.

ئەندامەو فەرماندەیی یەژاستاری ئارژین دێرسیمە ئەرەیاوناش، "مەبارەکبایی ٨وو مارسی ڕۆو جیهانیی ژەنە ڕەنجدەرا جە عەندازەگیروو ئینسانیەتی، ڕابەروو ئازادی، ڕابەر ئاپۆی، ئەدایا کە جە کەسایەتیی ئەدایاو ئاشتیینە ئینێ ئێشکگێریی ئازادیینە، گردوو ژەنا، هامڕایاو زیندانی و گردوو هامڕایا، کە سەنگەرەکانە وێگێریی کەرا، مەبارەک کەرمێ".

ئارژین دێرسیمە وستش ڕووە، کە ٨وو مارسی ڕۆو مدرامانوو ژەنێن، ڕۆو کۆشیاین، ڕۆو وێشناساین و بونیادنیای بییەی وێمانە و ئەرەیاوناش: "ڕابەرایەتی سەدەی ٢١ەمینیش پێسە سەدەو ئازادیی ژەنا نامێ نیان. ئی سەدە بە سەرمەشقایەتیی ژەنا بۆ بە سەدەو ئازادیی ئینسانیەتی. ڕابەرایەتیی پەکەکەی پێسە پارتوو ژەنا، جمیەروو ژەنا پێناسە کەرد. جە سەردەمێوەنە کە ئەقڵیەتی باڵادەسوو پیای جە کەسایەتیی ژەنانە ئینسانیەتش یاونا قەراخوو دلێنەشییەی، سایێ ڕابەرایەتی و یوەم گەشمەردەکاماوە، ژەنی واوەی وێشا ئشناسا، وێشا ڕێک وست و کەوتێ دلێ کۆشیای گەورەوە. ئارۆ ئەنجاموو ڕەنج و هەوڵدای ٥٠ ساڵەو ڕابەر ئاپۆی و هامڕایا پێسەو سارا، پەیمان، دەلال، هێژار، ئاخین، ئازێ و لەیلێ ورکەوتێنێ. ئا هامڕا ژەنێما کە سەرمەشقایەتیی کۆشیای ئا ژەناشا بە نۆرە ورگێرتەن و بیێنێ شۆنکەوتێشا ، پەی گردوو ژەناو جیهانی ئارۆ زاپ، ئاڤاشین، دەگاو فلەی و سەرنیشتنە ئینێ دلێ مدرامانی و کۆشیای گەورەینە. وەروو ئانەیە ڕابەر ئاپۆ دروستتەرین هامڕایەتییش چەنی ژەنا کەرد، ژەنیش تاریکیوە پڕنێوە پەی ڕۆشنایی. بە زانستوو ژەنا واوەی گلێرگەش ڕۆشن کەردۆ و وەروو ئانەیە هێزە دەسەڵاتدارەکێ پیلانگێڵنیی میاننەتەوەییشا دژوو ڕابەر ئاپۆی ڕێک وست. ئەگەر ئارۆ ڕابەر ئاپۆ چوارمێخ و خاچی ئیمرالینە ئینا دلێ کۆشیاێوە گەورەینە، ئانە بە ماناو ئانەینە پەی ئازادیی ژەنا و ئازادیی ئینسانیەتی قوربانی مدۆ. دەدات. وەروو ئانەیە ئانە کە زیاتەر جە گرد لاێوە ماناش پی ڕۆیە بەخشا ڕابەر ئاپۆ و جمیەروو ژەنە ئازادنێ. جمیەروو ئازادیی ژەنا جمیەرێوەن، کە بە سەرمەشقایەتیی ساراکانێ کەوتەن وەڵێ. تارێخیچنە وینیان  جە فەرمانڕەوا و باڵادەساوە گەرەکشا بییەن  بە گرد جۆرەو ڕابازێوە هجووم کەرا سەروو ژەنا و کولتووریشا. بەڵام دەسەڵاتداری وەراوەروو ئا ژەنە کۆشەرانە شکسشا ئارد و سەرنەکەوتێ. ئارۆ ئەنجاموو کۆشیای ڕابەر ئاپۆی و هامڕا ژەنەکاشنە هەوڵەکێشا پووچەڵێ بیێوە. پەی خاوەنداری جە میراتی تارێخیی ژەنا، سەرمەشقاو جمیەری ئازادی سارا، لەیلا، دەلال و هێژارێوە میراتێوەشا دماو وێشاوە جیا ئاستەن".

'شۆڕشوو ژنەنا بە ژەنی، ژیوای، ئازادی تاجدار کەرمێ'

فەرماندەیی یەژاستاری ئارژین دێرسیمە داواش وەنەو گردوو ژەنا کەردە، کە یاگێ وێشا ڕیزەکاو کۆشیاینە گێرا و پێسە بەردەوامە بییە: " ئارۆ گەریلاکاو یەژاستاری، دژوو مۆدێرنیتەی سەرمایەداری و ئەقڵیەتی دەوڵەتپارێزنی بە سەردەسەیی پیای بەرەکاو وەڵیوە گژیا و کۆشیای گەورە کەرا. ئارۆ ڕابەر ئاپۆ و هامڕێما زیندانەکانە دژوو ئا ئەقڵیەتەیە ئیرادە و کۆشیاێوە گەورە کەرا. ئا ژەنێ بە ئایدۆلۆژیاو ڕابەر ئاپۆی وێشا ئشناسا، ئارۆ گردوو جیهانینە داراو میراتێوە گەورەینێ. بە سەرمەشقایەتیی یەژا ستاری سەنگەرەکانە وێگێری کەرانێ، دژوو هجوومەکاو سەروو ژەنا ئینێ دلێ کۆشیای و ڕێکوستەیێوە گەورەینە. چێوە داوا کەرمێ؛ با گردوو ژەنە گەنجا ڕووە کەرا کۆشیای، ڕووە کەرا ڕیزەکاو ئازادیی. داوا وەنەو گردوو ژەنا کەرمێ دژوو هجوومەکا پەی سەروو ڕۆح و جەستەو ژەنا بەشداری دلێ کۆشیاینە کەرا و بەیا دلێ ڕیزەکاو کۆشیایۆ بە سەرمەشقایەتیی یەژاستاری. ئی شادییە هینوو گردوو ژەنان. ئی ئاوازە ئاوازوو گردوو ژەنان. پەوکای مشۆم گردوو ژەنا خاوەندارییش وەنە کەرا. ئێمە شۆڕشوو ژەنان بە دروشموو 'ژەنی، ژیوای، ئازادی'ی بە سەرکەوتەی تاجدار کەرمێ، گۆشەگیریی ئیمراڵی ماڕمێ. ئێمە ژیواێوە ئازاد، وەڵاتێوی ئازاد و ژەنێوی ئازادە بونیاد منیەیمێ".

ڕۆ دماو ڕۆی ڕاپیمای ئازادیما گەورەتەر کەرمێ

گەریلاکاو یەژاستاری کە بەشدارییشا ئاهەنگەکەنە کەرد پێسە دوێ:

لۆران سەرحەدە: "ئێمە ٨وو مارسی ڕۆو جیهانیی ژەناجە گردوو ژەناو جیهانی، ئەدایاو ئاشتی کە پەی دادپەروەریی ئینێ ئێشکگێریینە، ڕابەرایەتیما و هامڕاێما سەنگەرەکاوجەنگینە مەبارەک کەرمێ. ئێمە نەک هەر ٨وو ئاداری گردوو ڕووەکا کەرمێ بە ڕۆو ژەنا و پێسە درێژە بە کۆشیایما مدەیمێ".

بێریتان چیا: "ئێمە کەشە ئازادەکانە، مەیدانە ئازادەکانە ئاویروو ئازادیی، چڵۆسکەو ئازادیی بە گەشی مردنمێرە. ئێمە ئا چلٶسکێ سەرەمڕ بەبەرزی مازمێوە. پەوکای مشۆم ژەناو جیهانی ڕیزەکاو ئازادیی، مەیدانەکاو ئازادیی پەڕ کەراوە. ئێمە ماچمێ، "ژەنی، ژیوای، ئازادی"، پی دروشمێوە ئێساڵ بەدڵنیاییوە ئازادیی جەستەیی ڕابەر ئاپۆی مسۆگەر کەرمێ. ڕۆ دماو ڕۆی ڕاپیمای ئازادییما گەورەتەر کەرمێ".

زەکیە ڕۆزا: "گەرەکما چێگەوە ڕووە کەروو ژەنا. کۆشیای تاکەکەسی پەی ئازادیی بە تەنیا وەسێ نییا.وەروو ئانەیە؛ ئازادیی گلێرگەی ئێمە ئازاد کەرۆ. پەوکای مشۆم شۆڕشوو ژەنێ پێسەو  وەرپەرسبییەی بوینیۆ، یا پێسەو هەرمانێوە کە گنۆ سەروو شانەیما. وەڵیوەبەردەی شۆڕشوو ژەنێ و وەرگێرتەی جە کوشتەی ژەنا، هەرمانەو ئێمەنە".

دیدار ئامەدە: "سایێ ڕابەر ئاپۆیۆ هۆشیارێ بیەیمێوە، دماو ئانەیە بەشداریما ڕێکوستەینە کەرد، هەستما بە شناسمانەو وێما کەرد. دلێ هێزەکاو یەژاستاری و هەپەگەینە ئێمە هەستما بە ئازادیی وێما کەرد. ئامانجما ئازادکەردەی گردوو ژەنان. ئا کۆشیایەو ئێمە  کە کەرمێش، تەنیا پەی پارچێوە یا کەسێوە نیا، پەی گردوو ئینسانیەتین."

مەبارەکباییەکە بە ورپڕای و بە هەلهەلێ و دروشمواتەی دماییش ئاما.