گلېرگەو ژەنا ئازاڎو ۋەرکۊتوو کورڎەسانی (کەژار) سەپنای سزاو جە قەنارەدایش سەرو چالاکا ژەنارە پېسە حەقکەردەیۆ دەسەڵاتو پیا سالارو ئێرانی سەرو ژەنارە نامۍ بەرد و پەی مردنای ئا سزایا بانگەوازێوە ئەرەیاۋنۆ.
سەپنای سزاو جە قەنارەدای سەرو شەریفە محەمەدیۍ و پەخشان عەزیزیێرە کاروەدای فرەش شۊنەو ۋێشەرە ئاورد و چا چوارچێوەنە کەژار ئەرەیاۋنێوەش وەڵاکەردۆ و چنەشەنە داواش جە تەماموو ئازاڎیوازا و رێکوزیاکا داکۆکیکار جە مافەکا مرۆڤی و چالاکا ژەنۍ کەردەن دژوو ئا سزایا مرداوە و هەرمانە پەی مردنایش بکەرا و خاوەنداری جە تەماموو زیڼانیا سیاسی ژەنۍ بکەرا.
دەقو ئەرەیاۋناکەو کەژاری پی جۆرەنە:
دەسەڵاتوو پیاسالارو ئێرانی، رەوتوو حەقکەردەیۆش جە چالاکا ژەنا خێراتەر کەردەن
بەیدۍ پێوەرە و دەس دلۍ دەسی سزا نامرۆڤانەکاو جە قەنارەدای مردنمۍ
دماو شۆڕشوو "ژەنی، ژیۋای، ئازاڎیی" و فراوانبیەی ئەرەکۊشای ئازاڎیوازانەو ژەنا و گرڎوو گلېرگەکاو ئێرانی، تێبینی زیاڎبیەو فشارەکا رژێمی سەرو ژەنا مکەرمۍ، کە چالاکتەرین و رادیکاڵتەرین توێژۍ بێنۍ و بەردەوام جە مېڎانەنە بێنۍ. ڕۊشن و ئاشکران کە ژەنی جە سەرهۊرداو "ژەنی، ژیۋای، ئازاڎیی"نە سەرمەشقۍ بێنۍ و یۆگێرتەی سەرانسەری بەینو گرڎوو ئشناسنامەکا بە دەورو پەرسو ژەنێوە ئاما ئاراوە. جە ڕوانی یووەم و سەرهۊرداو ژەنی، ژیۋای، ئازاڎیی-رە شەپۆلەو روو جە بەرزبیەیۆ کردەوە نامرۆڤانەکا رژێمو ئێرانی و بەتایبەتی سەپنای جە قەنارەدای جە سەران سەرو ئێرانینە دەسسپنەکەرد و ئیساتۍ ئا شەپۆلۍ یاۋێنە بە ترۆپکوو ۋێش. چی چوارچێوەنە هەواڵو سەپنای سزاو جە قەنارەدای پەی چالاکا ژەنۍ بیەن بە مایۍ نارەحەتی گلېرگەو ئازاڎیوازی چ جە دلېنە و چ جە جبەرۆ. جە دووە ڕۊی وەڵینەنە پەخشان عەزیزیەی رۆنامەنویسە، توێژەرەی کۆمەڵایەتیە و زیڼانەی سیاسیەو کوردی کە ماوەو ساڵێوەن جە زیڼانی ئێڤینینە گیریێنە، بە قەرارو دادوەر ئیمان ئەفشاری سزاو جە قەنارەدایش سەرەرە سەپیان. پەخشان عەزیزیە جە ماوەو ساڵی ۋییەردەینە جە مافوو دیڎاری چنی بنەیانەی و پارێزنەری بێبەشە بیێنە و بەمەبەسوو هۊرگېرتەی دڎان نیایپۊرەی زۆرەملێ چېرو فشاری و ئەشکەنجەینە بیێنە. ئاڎە جە نامەکەشەنە باسش لە جیاکاری رەگەزی و نەتەوەیی و ئەشکەنجەکا و رووخساری قەبێح و سیستەمی ۋەرا ۋەر بە ژەنا کەردەنۆ، هەمان ئا جیاکاریە هۊرقوڵیاو تەرسەو رژێمینە جە ۋەرا ۋەر بە ئەرەکۊشای ژەنێوە کە تەرس و لەرزشا وستەن گیانو دەسەڵاتوو دژەژەناوە. سزاو جە قەنارەدای پەخشان عەزیزیۍ دووەم سزاو جە قەنارەدای ژەنا زیڼانیێن بە تۆمەتو "بەغی" یان چەکهۊرگێرتەی دژوو دەسەڵاتی جە ماوەو دووە هەفتەی ۋییەردەینە، شەریفە محەمەدییە جە چالاکا کرێکارا و زیڼانەی سیاسیە کە جە زیڼانو لاکاو رەشتینە زیڼانییەنە، ماوۍ چێوەڵتەر جەلایەنوو لقوو یەکوو دادگاو رەشتیوە سزاو جە قەنارەدایش سەرەرە سەپیا. ژمارېوە زیڼانیۍ سیاسیۍ ژەنی تەرێچ جە زیڼانەکا رژێمینە هەمان تەرسیشا ئینا سەر. هەمڕێما وەریشە مورادییەیچ کە تۆمەتەو چەکهۆرگېرتەیش رووبەڕوو کریانۆ، جە ئیساتێنە ئینا زیڼانو ئێڤینینە.
دەسەڵاتو رەگەزگەراو ئێرانی سەرجەنۆ سەلەمناش کە ئیتر تواناو ۋییەرنای قەیرانەکاش نییا و بە بەرکەردەی و جابەجێکەردەی هەر سزێوە جە قەنارەدای، زیاتەر نوقمو گێجاوەو سیاسەتە رەگەزگەرایانەکاو ۋێش مبۆ. جابەجێکەردەی سزای قورسۍ، هامکات چنی بانگەشە و ژاوەژاو فاڕیای و چاکسازی، رێک بە ماناو ئانەینە کە فاڕای مۆرۍ و داشەکانە و یەگەگیریشانە بە مۆرەی تەرە جە باڵەکا تەری، هیچ فاڕیایۍ جە شکڵوو دەسەڵاتو دژە ژەنی و پیاسالاری و دژە خەڵکو ئێرانی نمارۆ ئاراوە. دەسەڵاتوو ئێرانی بە عالی ئاگاڎارو هێزو ئەرەکۊشای ژەنان و بەرکەردەی سزای قورسێچ بەرەنجاموو ئی ئشناسایشەنە جە هێزو ژەنا و بە ماناو تەرسۍ و تۆقاین جە ئەرەکۊشایشا بە ئاراسەو ئشناسنامە، ئیراڎە و ئازاڎیوازی ژەنان. زیڼان بە درێژایی ئی ماوەیە، بیەن بە سەنگەرو مڎرامانی و ئەرەکۊشای، چا شۊنێنە کۆمارو ئیسلامی پېسە شۊنماو پەشیمانبیەیۆ نامێش بەرۆ، ئیساتۍ شۆنێوەن پەی هامفکری، یۆگێرتەی و رێکوستەی. بوێری، هومێد و ڕێکوستەی بەدیئاما، جە گەورەتەرین دەستکەوتەکاو شۆڕشوو "ژەنی، ژیوای، ئازادی"یەن، کە ڕاو سەپنای قنارەدایوە دڵێنە نمەشا. چا یاگانە کە بناغەو ژیوای ئازادی و دیموکرتایکی پەرسەو ڕۆی بۆ. ئیتر مەرگ مانێوەش نییەنە. ڕژێموو ئێرانی مشۆم بزانۆ کە وەنەکەوتەیوەکاو ئی سزا نائینسانا دامنەو وێشا مگێرۆوە. توانا و هێزوو خەڵکیش نیشانە دێنە و فشار و بەیاگەیاونای سزای نائینسانانێ ڕاچارە نییەن و ئازادیی نمەدریۆ قەنارە، راو ستەمی و چەوسنایوەیۆ بە هەرمانەکاش دمایی بە ژیوایی وێش مارۆ.
گلێرگەو ژەنە ئازاداو وەرکەوتوو کوردستانی (کەژار) جگە جە شەرمەزارکەردەی سزاو قورسێ دژوو زیندانییە سیاسییە ژەنا، پەخشان عەزیزییە و شەریفە محەمەدییە، داوا وەنەو سەرجەموو گلێرگەی ئازادیوازی، ئەرەمەرزیا و ڕێکوزیا داکۆکیکارا جە مافەکاو ئینسانی مکەرۆ. بە هەماهەنگیی زیاتەری بە ئاراستەو سازکەردەی جمیەرێوی فراوانی جە دژوو سزاو قەنارەدای چالاک بکەرا. داوا جە ژەنە کۆشەراو سەرجەموو بەشەکاو کوردستانی و بەروو وەڵاتی مکەرمێ، کە پێوەسێ بانە بە کۆشیایماوە، پەی ئازادیی ئی ژەنا کە بیێنێ بەهاێوە پەی گلێرگەی و پەشتیوانیی چا کۆشیایە بکەرا، چی چوارچوەنە پەشتیوانیی کەمپەینوو" نا پەی قەنارەدای، بەڵێ پەی ژیوای ئازادی" هەرمانێوی ئینسانییەنە، کە گرد لایێوە خوڵکە مکەرا پەی بەشداریی چنەش.
پەخشان عەزیزییە بییە بە دەنگوو سەرجەموو ژەنە کۆشەر و ئازادیوازا، یانێ مشۆم چی قۆناغە هەستیارەنە، بیمێ بە دەنگوو ئادی و سەرجەموو زیندانییە سیاسییا. ئازادی سەرەتاییتەرین مافوو حەر ئینسانیوەن، ئی ژەنە کۆشەرێ پەی یاوای سەرجەموو گلێرگەی بە ئازادی کۆشیێنێ و چالاکییشا کەردن و مکەرا، بەیدێ ئێمەیچ پێوەسێ بیمێ بە کۆشیایوە پەی ئازادییشا ".
