کەژار مانچستەرەنە بە سیمینارێوە ٨ و ئاداریش مبارەک کەرد
ڕۊو شەممەی شاروو مانچستەریەنە ، بۆنەو ۸ و ئاداریۆ سیمینارێوە تایبەت پۍ ڕاوەبەری کەژاری، میهری رەزاییۍ لوواڕاوە .
سەرەتاو سمینارەکەی بە دەیەقێوە بێدەنگی پۍ گەشمەرڎا کوردی و کوردسانی و تەماموو قوربانیا ژەنۍ جە جەهانەنە لوواڕاوە.
ڕاوەبەرەو کەژاری، میهری رەزاییە، سەرەڕاو خێرئامای مێمانەکا و ئاماڎەبیا، سوپاسوو ژەنا ئاماڎەبیەیش کەرد.
میهری رەزاییە سەرەتا سەرنجش وست سەروو وەڵینگە و گرنگی ٨ و ئاداری پۍ گەلا چێردەسەی و تایبەت بە ژەنا ۋەرکەوتوو دلێڕاسەی پێسە ئاخێزێوە، پێویسا گرڎ ساڵێوە بەگرنگییوە یاڎ کریۆوە و دەوروو ژەنا چی ڕووەنە نیشانە بڎریۆ.
ڕەزاییە سەرنجش وست سەروو رەنج و کۊشیای ژەنا کە چنی یانەنە زەحمەت کێشا پۍ ژیۋای ڕووانەی و حەرپاسە پەروەدەی سەرەکی خێزانی و رێکوستەی ژیۋای یانەی، جگە چانەی کۊشیای ژەنا کە بە ڕەنج و مانیایی ۋێشا بەرهەمش مارا، هەمان وەختەنە ژەنی شۆڕشگێڵنێنۍ، ژەنی تاواشا ئیراڎە و مۆراڵ بڎا بە پیایایچ پۍ ئانەی باڼۍ بە پارێزنەروو خاکی و نانی و ئازاڎیی .
میهری ڕەزاییە واتش: "ئێمە ئاخێزوو ژەنی ژیۋای ئازاڎیی جە ئێرانەنە ئێژا تەماشە کەرمۍ، ئی ئاخێزە بەردەواما بە سەرمەشقایەتی گرڎوو ژەنا ئازاڎیوازی جە ئێرانەنە، چونکی ئا زوڵمەی ۋەرا ۋەر بە ژەنا کریۆ جە جەهانەنە بەگرڎیی و ئێرانەنە بەتایبەتی جەهان چەمۍ و گۆشۍ ۋێشش چنە وستەنەرە، پۍ ئانەی دەنگ و ڕەنگوو ئا ئێشەو ژەنا کوردی و گەلا ئێرانی نەوینۆ ".
حەرپاە سەرنجش وست سەروو دەوروو ژەنا کوردی جە تاریخەنە جە نموونەو حەپسەخانەو نەقیبی و مەستوورەی ئەردەڵانیۍ و ساکینە جانسزۍ و لەیلا قاسمۍ و بێریتانۍ.
دماتەر باسش جە دەوروو ژەنۍ کەرد جە دیدوو ڕابەروو گەلوو کوردی عەبدوڵا ئۆجالانیوە ، داواش کەردە جە ژەنا کوردی ئاگاڎارۍ دیدوو ڕابەروو گەلوو کوردی عەبدوڵا ئۆجالانی با جە بارەو ژەنێوە تاوەکو وەرەنگارۍ سیستموو پیاسالاری باوە.
دماتەر سیمینارەکە بە سەرنج و پرسیارەکا ئاماڎەبیا بەردەوام بۍ.
سیمینارەکە بە هۊرپڕای و درووشمەکا "ژەنی، ژیۋای، ئازاڎیی" و "بژیۋۆ ڕابەر ئاپۆ" دمایش پنە ئاما.
