ڕۊو شەممەی ٩و کانونوو یوۋەمی بە سەرمەشقایەتی کەژاری و یەرۍ رێکوزیۍ مافوو مرۆڤی بە بۆنەو ڕۊو جەهانی مافەکا مرۆڤی و ٢٥ەمین ساڵیاڎوو کوشتەی زنجیرەیی چالاکا و ۋەرهەڵستکارا سیاسی و جە دژوو پاشێلکاری سیستماتیکی مافەکاو مرۆڤی ئێرانەنە، جە بەرلین ڕاپیمای و گلېرۊبیەیۍ لوواڕاوە.

چالاکیەکە جە تەرەفوو حەریۆ جە گلېرگەو ژەنا ئازاڎیی ۋەرکەوتوو کوردسانی (کەژار)- بەرلین، ناوەنڎوو پەنابەرا سیاسی ئێران- بەرلین، کۆمیتەو پەشتیوانی جە زینڎانیا سیاسی-بەرلینی و کۆمیتەو پەشتیوانی جە خەباتوو دیموکراتیکی مەردموو ئێران- بەرلینی رێکوزیابۍ.

جە دمادمایی گلېرۊبیەکەینە ئەرەیاۋنېوە هامبەش ۋنیاوە کە جە بەشېوەشەنە ئامابۍ: "سڵام جە گرڎوو زینڎانیا سیاسی و ئازاڎیوازا کەرمۍ جە زینڎانەکاو کۆماروو ئیسلامینە " و حەرپاسە ئاماژە بە زەینەب جەلالیانۍ ژەنە زینڎانیەی سیاسیەو کوردی کریان و چا بارۆ ئەرەیاۋنانشا: "گەرەکمانە دەنگوو ۋېما بە زەینەب جەلالیانۍ بیاونمۍ، کە زیاڎ جە ١٦ ساڵان بە کۊشیای ۋېش جە زینڎانە سامناکەکاو ئێرانینە، زینڎانش فاڕان پۍ سەنگەرێوە مدرامانی و ۋېڕاگری".

جە درێژەو ئەرەیاۋناکەینە باس جە بڕفانای و بێسەروشۊنکەرڎەی ۋەرهەڵستکارا جە لایەنوو حکومەتوو ئێرانی و حەرپاسە پاشێلکەرڎەی مافەکاو مرۆڤی و ئەشکەنجەداو بنەیانەو قوربانیا کریان و چنەشەنە ئامان، "جە نمونەکاو بڕفانای و بێسەروشۊنکەرڎەی کریۆ ئاماژە بە پەخشان عەزیزیۍ، ئیدریس فەقیهی و وریشە مورادیۍ و فرەو کەسی تەری کریۆ. وریشە مورادیە چالاکەو بواروو مافەکاو ژەنا کە زیاتەر جە چوار مانگان جە لایەنوو هێزە ئەمنییەکاو کۆماروو ئیسلامییوە بڕفانیېنە، پېسە ژەنێوە یووەنە جە سەرمەشقا ئاخېزوو ژەنی، ژیۋای، ئازاڎیی کە بە چالاکیەکاش جە بواروو مافەکا ژنانە زیاتەر جە گرڎ وەختۍ کۆڵەکەکۍ دماکۊتەیی و پیاسالاری رژێموو کۆماری ئیسلامیش لەرنېوە".

جە دمادمایی ئەرەیاۋنا هامبەشەکەینە ئامان، " داواکارېنمۍ جە گرڎوو چالاکا مافەکا مرۆڤی بەتایبەتی چالاکا مافەکا ژەنا و حەرپاسە گرڎوو ئا کەسا کە حەز بە ژیۋایۍ یەکسانی و ئازاڎیی کەرا،  کە بانۍ بە دەنگوو زینڎانیا و دەنگوو ئاڎیشا بیاونا گۊشوو راو گرڎیی جەهانی پۍ ئانەی ئازاڎیی و رزگاری تەماموو زینڎانیا سیاسی مسۆگەر کریۆ"