کوردیناسیۆنو کەژەکەی ئەرەیاوناێوەنە سەبارەت بە حەفتەو قارەمانێتی وەعدو پەرەپەنەدایش بە خەتەو سەرکەوتەی دا. کەژەکە سەرنجەش پەی ورچنیەی ٣١ ئاداری کێشتە و داواش وەنەو کوردا کەرد: "حەرهەلومەرجێوەنە مشۆم دەنگ بە ئیرادە و ئیدارەو وێتا بڎەیدێ."
کوردیناسیۆنو کەژەکەی بە بۆنەی حەفتەو قارەمانییوە بەیاننامێوە نویسیاش وەڵا کەردۆ و وەعدو وەرفراوانکەرڎەی خەتەو سەرکەوتەیش دا.
کوردیناسیۆنو کەژەکەی بەیاننامە نویسیاکەشنە واتەنش؛
"مەشخەڵەو قارەمانێتیی هامڕا مەزڵوم دۆغانی، کە ڕۆو نەورۆزینە زیندانی تاریکو ئامەدیش ڕۆشن کەردۆ، ڕاو کەشەکاو کوردسانیش ڕۆشنە کەردۆ.١٥ تەباخینە فەرماندە مەحسوم کۆرکماز ئی مەشخەڵێشە کەشەکاو کوردسانینە بەرزە کەردۆ و ڕۆشنش کەردۆ، کە ئی مەشخەڵێ، کە بە قارەمانێتیی گەشیاوە، تەرسی، مەرڎەی، بێشناسنامەبییەی و کۆیلایەتییش دلێنە بەرد و یارای و ژیوای ئازاد و شناسنامەی ئازادش خوڵقنا. فەرماندە مەحسوم کۆرکماز کە ٢٨ ئادارینە گەشمەرڎە بی و لوا کارەوانو گەشمەرداوە، یۆگێرتەیی بەینو زیندانەکا و کەشەکاو کوردستانیی ئازادیش نیشانە دا و ئا یۆگێرتەییشە کوردستاننە هەمیشەیی کەردۆ و کەردش بە خەتەو ئازادیی. پەوکای تاریخو کۆشیایمانە ٢١ ئادار تا ٢٨ ئادار پێسەو حەفتەو قارەمانیەتی ئشناسیان. ئازایەتی و فیداکاری جە کەسایەتیی دەیان هەزار گەشمەردامانە ئێمەدا سەرەش وردان و ئی خەتێ حەقیقەتو گەلی و ژەنە مدرامانکەراش خولقنان. جە کەسایەتیی فەرماندە مەحسوم کۆرکمازینە، کە ٢٨ ئازارینە گەشمەرڎە بی، بە ڕێز و حورمەتۆ گردو گەشمەرڎە قارەمانەکاما یادێ مکەرمێوە و وەعد مدەیمێ، کە سەرکەوتەی و قارەمانێتی کوردستاننە سەرو خەتەو کۆشیایۆ پەرە پنە مدەیمێ.
ئی خەتەو قارەمانێتییە ئارۆ بە قەوەتتەرین شێوە بە مدرامانی بێوێنەو ڕابەر ئاپۆی، جە خەتەو گەریلایەتیی پسپۆڕی و مۆدێڕنو هێزەکاو هەپەگەی و یەژاستاریمانە، بە چالاکییە سەرکەوتانەکاشا تاجدارە بیێنە. ئێمە حەفتەو قارەمانییەتی وەنەو ڕابەر ئاپۆی، کە هەمیشە زیندانو ئیمرالیینە بەرڎەوام بە مدرامانێوی گەورە ڕاما ڕۆشنە مکەرۆوە، جە هێزی قارەمانوو هەپەگەی و یەژاستاری و گەلی وەڵاتپارێزنیما، کە ڕووەشا کەردێنە کەش و گەریلایەکا، ژەناو کوردی و هامڕێ شۆڕشگێڵن-دیموکراتا مەبارەک مکەرمێن. جە سەدەو ویس و یەکینە ئا خەتێ کە چارەنویسو کوردی و ژەناش جە ڕووەو ئازادییوە دیارییە مکەرۆ، خەتەی فکرییە و ڕانماییەکاو ڕابەر ئاپۆینێ.
مانگەو ئادارو ٢٠٢٤ بە سەرکەوتەی ٨ ئاداری و نەورۆزی مۆرەو وێش وەنەو ساڵەو ٢٠٢٤ی دا. گەلی وەڵاتپارێزنما، ئەدێ، ژەنی و گەنجێ فرە بە ڕۆشنی هەڵوێستو وێشا دژو فاشیزمی و ستەمی نیشانە دا. گەلەکەما، خەتەی قارەمانانێ مەزڵوم دۆغانەکانە، سارایا و مەحسوم کۆرکمازانە، بە دەنگێوی بەرز گرد یاگێونە کە کوردش چنەن، لکەدریایی وێشا بە ژیوای ئازادیوە نیشانە دا. گەلەکەما و ژەناو کوردی جارێوی تەر بە سەرنجکێشتەرین شێوە بە گرد لایێ و دۆس و دوژمناشا نیشانە دا کە سەرو خەتەو ڕابەر ئاپۆی و گەشمەرڎە قارەمانەکاوە ملانێ و بەرڎەوامێ با جە کۆشیای.
ئیساتێچ بە گوڕدای خەتەو عەگیدا و فاڕایۆ پەی قۆناغێویتازەی، هەرمانەو سەروو شانامانە فاشیزمو ئاکەپە-مەهەپەی ماڕمێنە، گرد یاگیوی کوردستانی و ئا یاگێ کوردش چنە مژیوۆ، بە فراوانکەرڎەی ڕێکوستەی و پێوەسبییەی پی ئامانجەیۆ و وەرگێریی فاشیزمی، مانادارتەرین و قەوەتتەرین جوابا پەی گەشمەرڎە قارەمانەکاما، پەی ڕابەر ئاپۆی و مدرامانوو گەریلاکاما.
