دەسەی وېڕاوەبەری کەژەکەی جە بارەو هۊرچنیەی سەرۊکایەتیی ٢٨و ئایاری جە تورکیا ئەرەیاۋناش، "بە دڵنیاییوە ئا هۊرچنیەیە هۊرچنیېوە داڎپەروەرانە و ڕجوا نەبۍ. ئانە ئۊپەراسیۊنېوە تایبەتی ڕژێمو جەنگی تایبەتیا".
دەسەی وېڕاوەبەری کەژەکەی جە هۊرسەنگنایۍ کوڵەنە سەرنجش وست سەرو هۊرچنیەکا، کە جە ساڵیاڎو پەیماننامەو لۊزانینە ئەنجامدریۍ و ئەرەیاۋناش، "ئا هۊرچنیۍ سەرو بنەماو پلانۍ فرە لایەنی هێزەکا جەنگی تایبەتی تورکی ئەنجامدریۍ".
هۊرچنیەی جە ساڵیاڎو لۊزانینە
هۊرسەنگناکەو کەژەکەی:
"هۊرچنیەکۍ پەرلەمانی و سەرۊکایەتیی تورکیای دمایشا پنەئاما. ئا هۊرچنیۍ جە ١٠٠ەمین ساڵیاڎو پەیماننامەو لۊزانینە ئەنجامدریۍ و جە چوارچێوەو ئاماڎەکەرڎەی و تەمامکەرڎەی پیلانگێڵیی میان نەتەوەیینە بۍ. پېسە مزانیۊ جە قۆناغو هۊرچنیەکانە و چی ساڵا دماینە ٢٠٢١ و ٢٠٢٢ بە تایبەتی دڕنڎانەتەرین و ناڕەواتەرین هجومەکۍ جە دژوو مەنتیقەکا گەریلای، جە دژوو ڕابەرایەتیما، گەلەکەیما، ژەنا، جوۋانا، هێزەکا ئازاڎیی و دیموکراسی و گرڎو ڕێکوزیا یاساییەکا ئەنجامدریۍ. چەکی کیمیاۋیی قەڎەغەکریا بە شێۋېوە بەکار ئامان، کە جە حیچ جەنگېوەنە پا جۊرە جە دژوو گەریلای نەۋینیان. هێزە میان نەتەوەییەکۍ بە شێۋېوە فرە دووڕوانە بە بێدەنگیی ۋېشا، چەمۍ ۋېشا چا هجوما وستېرە.
ئامانجو ئەساسی دەوڵەتو تورکی فاشیسی جە ١٠٠ەمین ساڵیاڎو پەیماننامەو لۊزانینە، ئانە بۍ، کە بە پاکتاوکەرڎەی جمېەری ئازاڎیما تەمام کەرۊ، بەڵام ڕابەرایەتیما، جەمەو ژەنا، گەلەکەما و گەریلا کۍ جە وەران ۋەرو گرڎو هجومو نەژاڎپەرسەکانە و نەتەوەپەرەسەکانە مدرامانۍ شکۊڎارانەش نیشانە دا. ئا مدرامانە جە تاریخ و مرۊڤایەتینە بی بە گۊرەتەرین و سەرنجڕاکێشتەرین مدرامان. چا چوارچێوەنە گرڎو هجومەکا دۊڵەتو تورکی پووچېکریێوە. بە پێچەوانەو ئامانجو دەوڵەتو تورکیای و حکومەتی فاشیستیی ئەردۆغانی، وەختۍ هۊرچنیەی دەششپنەکەرڎەبۍ، گەریلۍ جە کەشەکانە نەکیشیۍ بېنۍ. گەلەکەما گرڎو هێزو ۋېش وست هەرمانە و وەرەنگارییش کەرڎ.
جە هۊرچنیەینە سەرەڕاو گرڎو سیاسەتەکا جەنگی تایبەتی، بڕۍ کەمو کوڕیۍ، ئا مدرامانە شکۊمەندەیە نیشانەدریۍ. گەلەکەما بە شێۋېوە فرە چالاکانە و بە وەشحاڵی، بە ئیدعا و قەرارۊ وەرگیریشا جە ڕابەرایەتی، بەها نەتەوەییەکاشا، ڕۊح و ئیراڎەو ئازاڎیی و دیموکراسی کەرڎ وەڵۍ گرڎ چېۋېنە ئێمە سڵام جە مدرامان و هەڵۋێسی ئازاڎیی گەلەکەیما و وەڵۍ هۊرچنیەی و دماو هۊرچنیەی مکەرمۍ.
جەنگو دژ بە ژەنا
ڕژێمی فاشیستی ئاکەپە – مەهەپەی بە کۊمەڵایەتیکەردەی زایەندپەرەسی، نەتەوەپەرەسی و دەسەڵاڎداریی دەوڵەت جە دژوو ژەنا جەنگش ڕاوەبەر کەرڎەن. ئا ڕژێمە حۊلشدان بە کۊکوژکەرڎەی ژەنا، بە کولتورو دەسدرێژی و جۊرەکا جەنگی تایبەتی، کەسایەتی و ڕۊحو ژەنا دلېنە بەرۊ، مەجالەکا ڕێکوستەی ژەنا و هەرمانەو ڕێکوزیاکا ژەنا هۊرشېونۊوە، بەڵام ژەنی جە گرڎ مەجالەکانە جە دژوو ئا هجوما وەرەنگارییشا کەرڎ. مشۊ گرڎو پارت و هێزەکا ئانەیە قەبوڵ کەرا، کە ژەنی جە فاڕیای و دیموکراتیکبیەو تورکیاینە مژاری سەرەکینۍ. ژەنۍ بە کۊشیای ۋېشا دژوو سیاسەتو دەسەڵاڎداریی پیای و زایەندپەرەسەکا ڕژێمو فاشیستی ئاکەپە و مەهەپەی، جە مەرحەلەو هۊرچنیەینە هومېڎ و پەرۊشیېوە فرەشا خوڵقنا. ئێمە گرڎو ژەنا، کە بە ڕەنگو ورە و شناسنامەو ۋېشاوە سەرو بنەماو دروشمەو "ژەنی، ژیای، ئازاڎیی بەشڎاریشا جە هۊرچنیەکانە کەرڎ، مبارەک باییشا ۋنەکەرمۍ و سڵامشا ۋنە کەرمۍ. کۊشیای ژەنا جە سیاسەتی دیموکراتیکەنە نوێنەرایەتیی یەکسان و ژەنا جە بەرزتەرین ئاستەنە مسۊگەر کەرڎەن. مەڵامەتەکۍ کۊشیای هامبەشو ژەنا جە گرڎ وەختۍ بەقوەتتەر بیەن و بێگومان ئا ڕژێمەو ئاکەپە – مەهەپەی، کە پېسە هامپەیمانیی جەنگی دژوو ژەنا ڕێکوزیان و ئەرەمەرزیان، وەرو یۊی هۊرشېویۊۋە.
گەلەکەما بە پارېزناو بەهاکا ۋېش هەڵۋێسش نیشانە دا
بە سەرمەشقبیەو ژەنا، هەڵۋێسی گرڎی گەلەکەیما، هەڵۋێسو ئازاڎیی و دیموکراسییا. بیەن بە عالتەرین جواب پۍ ئازاڎیوازا، کە جە لایەن و ڕابەرایەتیماوە دریان. ئا جوابەی، کە جە کورڎسانەنە بە ئەردۆغانی فاشیستی دریا، بە پارېزنای نرخ و بەهاکاشا دریانۊ. گەلەکەما بە هەڵۋێسو ۋېش جە هۊرچنیەکانە، وشیاری و زانابیەی ۋېش، هێزو ۋېش پېسە گلېرگېوە دیموکراتیکی نیشانە دا. جە هەمان وەختەنە جارێوەتەر پیلانگێڵیی میان نەتەوەییش پووچ کەرڎەنۊ.
بە دڵنیاییوە هۊرچنیېوە ناداڎپەروەرانە و نا پەسەنڎ بۍ
پلانەکۍ ئەردۊغانی و دەسەڵاتەکەیش چا هۊرچنیانە سەرو بنەماو دروۍ و فێڵۍ و تەڵەکەبازی و دزیەی دەنگەکا مجیابېرە. دزی جە هۊرچنیەینە، بە شێۋېوە نهېنی و فرە شارەزایانە جە لایەنو دەسەڵاتو ئاکەپەیۊ ئەنجامدریان.
پۍ نمونەی گەڕو دوۋەمو هۊرچنیەی سەرۊکایەتینە، هامپەیمانیی ئاتای جە دیاریکەرڎەی ئەنجامو هۊرچنیەینە هەڵۋێسېوە ستراتیجیش پێکئارڎ، ئانە جە بنەڕەتەنە پلانێوە جەنگی تایبەتو ۋېش بۍ. پېسە مزانیۊ جە هۊرچنیەینە هێزێوە، کە چارەنۋیس دیاری کەرۊ، گەلو کورڎین و ئا هەڵوێستەنە، کە گەلوو کورڎی گېرۊشەنە وەر. جە دماین هۊرچنیەو شارەوانییەکانە ئانە بەرکۊت.
بە دڵنیاییوە ئا هۊرچنیەیە هۊرچنیېوە ناداڎپەروەرانە و ناڕەوا بۍ، ئۊپەراسیۊنێوە ڕژێمو جەنگی تایبەتی بۍ. مشۊ گەلەکەماو، ژەنا، هێزەکۍ ئازاڎی و دیموکراسی ئا گەمە، پیلانگێڵیا و سیاسەتەکا جەنگی تایبەتی بە عالی ۋینا و کۊشیای ۋېش زیاتەر بەقوەت کەرۊ. کۊشیایما تەنیا کۊشیای هۊرچنیەی نییا و هۊرچنیەی بەشېوەن جە کۊشیای. چېۋی بنەڕەتی ئانەن، کە گەلەکەما و جەمەو ژەنا جە گرڎو مەجالەکانە ۋېشا رێکوزا. سەرو بنەماو ۋېڕېکوستەی وەرگیری جە بەهاکا گلېرگەی کەرا. جە دژوو ڕژێمی فاشیستی مدرامان کەرا.
ئێمە بە ئیدعا و بانگەشېوە بەقوەت ڕاکەرمۍ
سەرەڕاو گەمەکا جەنگی تایبەتی ڕژێمو ئاکەپە – مەهەپەی فاشیستی، گەلەکەما کورڎسانەنە مدرامانېوە گۊرە ڕاوەبەرکەرۊ، گەلەکەما لوۋا سەرو سنوقەکا دەنگدای و دەنگو ۋېشا دا و تاۋاشا سەرگنا. حەرپاسە جە پارتو چەپی سەوزینە ژەنی و جوۋانۍ فرە کاریگەر و چالاکانە هەرمانەشا کەرڎە. ژەنۍ جە فراکسیۊنی پەرلەمانینە بیۍ بە خۊتان نوێنەرایەتیۍ یەکسان. ئێمە پېسە ژەنا جە گرڎو مېڎانەکا ژیاینە ئەرەکۊشای ئازاڎیی بە شێۋېوە فرە بەقوەت و بە ئیدعا و بانگەشېوە گۊرۊ ڕاوەبەرکەرمۍ.
پۊکەی مەرحەلەو کۊشیای وەردەمیما، کە هۊرچنیەو شارەوانییەکاش ئینا چنە، فرە گرنگا. مشۊ چی سەردەمە تازەو کۊشیاینە وەڵۍ گرڎ کەسیوە ژەنی، جوۋانۍ، گەلەکەما، هێزە دیموکراسی و ئازاڎییوازەکۍ تا دما نەفەس وەردەوامی بە مدرامانی بڎا. جە تورکیانە سەڎەنە ٥٠ و ئەرەنیشتا فاڕیای، دیموکراسی، ئازاڎیی و داڎپەروەرییشا گەرەکا. حیچ کەس مەتاۋۊ نیمەو گلېرگەی چەوەسنۊوە. جە تورکیانە یوۋەمجارا هێزێوە ئۊپۊزسیۊنی ۋېش میاۋنۊ سەڎەنە ٥٠. ئانە فرە گرنگا. بەبۍ ئانەی ئێمە ڕا بە بۍ هیوایی بڎەیمۍ، بە گرڎو هێزو ۋېماوە، ۋېما ڕێکوزمۍ، جە دژو فاشیزمی حەتاوەکو دما هەناسە وەرەنگاری کەرمۍ، کورڎسانی پۍ فاشیزمی کەرمۍ بە قەبرسان. سەڎەو ٢١ی کەرمۍ بە سەڎەو ئازاڎیی گەلەکەیما و ژەنا.
سەرو ئا بنەمۍ ئێمە گەلەکەیما، ژەنا، جوۋانا، گروپە باوەڕییەکا خوڵقە کەرمۍ پۍ ۋۍ ڕێکوستەی و مدرامانی جە دژوو فاشیزمی. ئێمە ماچمۍ، "ژەنی، ژیای، ئازاڎیی".
هـ . ش
