کۆردیناسیۆنو کەژەکەی ئەرەیاۋناش هەوڵمڎریۆ دیسان جە سوریانە جەنگ هۊرگیسیۆوە، داواش جە گرد لێوە کەرڎ ٨ و ئاداری ڕۆو جەهانی ژەنە کرێکارانە، کۆمکوژی سەرو عەلەوییەکا شەرمەزار بکەرا.
کۆردیناسیۆنو جەمەو ژەنا کوردەسانی (کەژەکە) بە ئەرەیاۋنێوە نویسیا کۆمکوژی سەرو عەلەوییەکاش جە لایەنو دەسەو تەحریر ئەلشامی (هەتەشە)یۆ شەرمەزار کەرڎ، واتش: "پەشتیوانی ۋێما پەی گەلوو عەلەوی و ژەنا بەربڕمۍ، داوا جە گرڎو ئەرەمەرزیا و ڕێکوزیا دیموکراتیکەکا ژەنا جە کوردەسان و تورکیا و بەتایبەت جە سوریانە مکەرمۍ بە هەستیارییوە مامەڵە بکەرا، ئی هرووژما شەرمەزارۍ بکەرا و هەڵوێس هۊرگێرا".
ئەرەیاۋناکەو کۆردیناسیۆنو کەژەکەی پی جۆرەنە:
"دیسان سوریا بەرەو جەنگێوە ۋناوی و کۆمکوژیی بەینو گەلا و مەزهەبەکا پەلکێش مکریۆ. عەلەوییەکۍ سوریای، چن حەفتێوەن جە هەرێمەکاو لازقیە و حومس و تەرتوسینە جە لێوارەکا سوریاینە ڕووبەڕوو سوکایەتی نامرۆڤانەی و ئەشکەنجەی و کۆمکوژی باوە. ژەنا عەلەوی ڕووبەڕوو گرڎ جۆرە فشار و دەسدرێژیێوە تیرۆریستی و چەتە ئایین‌پەرس_مەزهەبییەکا داعشی باوە کە فرەیشا خەڵکو سوریای نیەنۍ. ئی کۆمکوژیا ۋەرا ۋەر بە گەل و ژەنا عەلەوی بە تنی شەرمەزار مکەرمۍ.
دژمنو ژەنا نمەتاوۆ ئایندێوە گەش پێشکەش بە گەلاو سوریای بکەرۆ
هێزە مېیاننەتەوەییەکۍ هەوڵمڎا جە سوریانە شەرعییەت بە هەتەشەی بڎا و هەرێمەکەی بەپاو بەرژەوەندییەکاشا مجاراوە. پۊکەی گرڎو هێزە مېیاننەتەوەییەکا ۋەرا ۋەر بە گرڎو ئا کۆمکوژی و ستەمە نامرۆڤانەیە بێدەنگێنۍ. ئی دەسەڵاتە ئەوەمەڼە و دژە ژەنە کە ئیرادەو گەلا سوریای پەستگۊش وزۆ و بە پاو دۆڵەمەڼیە کۆمەڵایەتی_کەلتوورییەکەو سوریای مامەڵە نمەکەرۆ، بە سیاسەتو کۆمکوژی و چەوەسنایۆ نمەتاوۆ ئایندێوە گەش پێشکەشو گەلا سوریای و بەتایبەت ژەنا بکەرۆ.
پەنەوازا ئیرادێوە ۋەرفراوان نیشانە بڎریۆ
ئا وڕای و ئاوارەیی و فشارەی ئینە ١٠ ساڵێن گەلوو سوریای چەشۊش، پاسە مکەرۆ چی قۆناغەنە پەنەوازی بنیاتنیای دیموکراتیکی بۍ وەڵۍ. جوغرافیاو سوریای کە جیاوازی ئایینی و کەلتووری و مەزهەبیش ئینا چنە و گەلاو عەرەب و سریانی و کورد و دورزی و تورکمانی و سونی و عەلەوی و مەسیحیش چنە مژیوا، زەمینەو پێوەرە ژیۋایۍ ئازادا. جە سەرنیشتوو ۋەرکۊتوو سوریاینە ئینە ١٠ ساڵێن گەلاو کورد و عەرەب و سریانی پېوەرە بە ئاشتی مژیوا، وە ژەنی جە گرڎ بوارە کۆمەڵایەتییەکانە بەشێوێوە ئازاد و یەکسان بەشداری جە ئیدارەو ۋێڕاوەبەرینە مکەرا. ئینە گرنگیی مۆدێل و دەسکەوتەکا ئیدارەو ۋێڕاوەبەری بەروزۆ. ئیتر پەنەوازا ئیرادە و هێزو چارەسەری پەی گفتوگۊی و چارەسەری کێشەکا نیشانە بڎریۆ.
پاڵپەشتی جە گەلی و ژەنا عەلەوی مکەرمۍ
چی چوارچێوەنە بانگەواز جە جمېیەرە جەهانییەکاو ژەنا و ڕۆشنۋیرا و هێزە دیموکراسیەکا مکەرمۍ جە ۋەرا ۋەرو بە کۆمکوژی عەلەوییەکانە بێدەنگۍ نەبا. ئێمە پاڵپەشتی جە گەلی و ژەنا عەلەوی مکەرمۍ. پەنەوازا گرڎو ئەرەمەرزیا و ڕێکوزیاکا ژەنا جە کوردەسان و تورکیا و بەتایبەت جە سوریانە بە هەستیارییوە مامەڵە بکەرا، ئی هرووژما شەرمەزار بکەرا.
ئەنجامدای ئی کۆمکوژییە، جە ٨ و ئاداری ڕۆو جەهانیی ژەنە کرێکارانە، پەنەوازی ژەنا بە ڕێکوستەی هامبەشی و گۊرەکەردەی ئەوەکۊشای زیاتەر بەروزۆ. ۋەرپەرس و مەڵامەتو گرڎو کۆمکوژی و جەنگی و نایەکسانیەکا، زیهنیەتو پیا سالاریا. پۊکەی ئازادی و ئەوەکۊشای ژەنا، دژە ژەعرو گرڎ جۆرە کەلتوورێوە تنوتیژی و زاڵبیەیا. چی چوارچێوەنە، ڕۆو ئەوەکۊشای ژەنا عەلەوی و گرڎو ژەنا پیرۆز مکەرمۍ".
