ڕۆمانە دەوروو ڕابەروو گەلوو کوردی جە کۆشیای ژنانە واتەواچش بارەوە کریا
٢٥ەمین ساڵیادوو پیلانگێڵنیی میاننەتەوەیینە ڕۆمانە بارەو دەور و کاریگەریی تیۆریک و پراتیکوو ڕابەروو گەلوو کوردی عەبدوڵا ئۆجالانیوە جە کۆشیای ژەنانە قسەوباس کریا.
کۆنفڕانسەکە بە دروشموو "فەلسەفەو ورچەرخنای ژیوای: ژەنی، ژیوای، ئازادی"، کۆلێجوو گیۆریس پرۆدینزاو زانکۆو ڕۆماو ٣ لوا ڕاوە.
کۆنفڕانسەکە کە بە سەرمەشقایەتیی ڕێکوزیایەکاو تەژەکە-ئە، ڕێتێ ژەنێ و کۆمیتەو ئیتالیاو ژەنۆلۆژی و پەشتیوانیی شارەوانیی مەنتێقەو ٨وو ڕۆمای ساز کریا، دلێشنە چالاکێ ژەنێ، ئەکادیمیسیانێ، مافشناسێ، بارەو شرۆڤەکاو ڕابەروو گەلوو کوردی عەبدوڵا ئۆجالانیوە بارەو جمیەروو ژەنا و هەوڵەکاش پەی بونیادنیای کەسایەتیی ئازادی و ئاستوو پاشێلکارییە یاساییەکاو سیستموو گۆشەگیری ورسەنگنایشا کەرد.
کۆنفڕانسەکە بە وانایۆ بڕێ بەشاو کتێبوو "ژیوای من بەردەوام جەنگ بێ"و سەکینە جانسزێ، یوە جە ئەرەمەرزناو پەکەکەی، کە ساڵەو ٢٠١٣ پاریسنە تیرۆرە کریا، هەرپاسە وانایۆ شیعرەو "ژەنەو ئەوین"ی، کە ڕابەروو گەلوو کوردی عەبدوڵا ئۆجالانیە نویستێنە، دەسش پەنە کەرد.
بە نامێ فەرمانگەی کولتووریی شارەوانیی مەنتێقەو هەشتوو ڕۆمایۆ مایا ڤێتری قسێکەردێ و واتش کۆنفیدڕاڵیزمی دیموکراتیک کە ڕابەروو گەلوو کورد عەبدوڵا ئۆجالانی وستەن ڕووە، بابەتوو ئیکۆلۆژیک، دیموکراسی و ئازادی ژەنێ گێرۆ وێ و ئانەش وست ڕووە، کە ئا مۆدێلە پەی ئادیشا پێسەن سەرچەمەی.
پانێلەو ئەوەڵینە کە کۆمەڵناس چیارا داڤۆلیێ بەردە ڕاوە، کەسایەتییەکا پێسەو لاورا کۆرادی زانکۆو کالابرای، فێدێریکا گیاردینی زانکۆو ڕۆما ٣، جە ڕاو گێڵنایوە ئەندێشەکاو ڕابەروو گەلوو کوردی عەبدوڵا ئۆجالانیوە باسشا جە دیالێکتیکوو ورچەرخنای جە جمیەرەکاو ژەنانە کەرد.
هاموەخت گیا پیکاردی بەینوو شرۆڤەکاو ڕابەروو گەلوو کوردی عەبدوڵا ئۆجالانینە و یوە جە تیۆریناساو گرنگیی جمیەری ئیکۆ-فیمینیستی ماریا میەسێ بەراوردێوەش کەرد.
بە نامێ ئەکادیمیاو مۆدێرنیتەی دیموکراتیکیوە ڤێرا قسێش کەردێ و کاریگەرییەکاو شرۆڤەکاو ڕابەروو گەلوو کوردی عەبدوڵا ئۆجالانیش بارەو ئازادیی ژەنێ و جمیەروو ژەناوە ورسەنگنا.
پانێلەو دووەمینە کە مامۆستاو کۆلێژوو گیروس پرودێنزای پرۆفیسۆر ئێنریکا ریگۆی بەردە ڕاوە، پارێزنەرە مێشێلا ئاریکاڵە، پارێزنەرەو ڕابەروو گەلوو کوردی عەبدوڵا ئۆجالانی ڕازیە ئۆزتورکە و ئەندامەو ڕێتێ ژەنێ لاورا کوالیۆگولۆ بارەو دۆخوو ئیمراڵییوە قسێشا کەردێ و سەرنجەشا پەی سەروو گرنگیی کۆشیای دژوو گۆشەگیری و هەوڵە یاساییەکا کێشتە.
پانێلەو یەرەموو کۆنفڕانسەکەینە بە نامێ "ڕاپیمای بەرەو شۆڕشوو ژەنێ" چالاکێ جمیەرەکاو ژەناو کوردی هەوڵەکاو ڕابەروو گەلوو کوردی عەبدوڵا ئۆجالانیشا پەی شناسنامەو ژەنێ ئازادێ، بونیادنیای بنەیانەی دیموکراتیکی و وەڵێوەبەردەی کولتوروو مدرامانی وست وەروو باسی و واتەواچی.
پانێلەو 'مدرامانوو ژەنا وەکەوروو دلێڕاسەینە' فەلەستینۆ ئالبا نابلوسی و ئێرانۆ مارال رەحیمییە قسێشا کەردێ.
