مانگرتەی بە نۊبەو زینڎانیا کە پۍ ئازاڎیی ڕابەروو گەلوو کوردی عەبدوڵا ئۆجالانی و چارەسەری سیاسی پرسوو کوردی دەسش پنەکەرڎ ئینا ڕۊو ٩ ەمینیەنە.

زینڎانیاو بلۆکەو(A) زینڎانی ژمارە ٢ۍ ئاسایش و باڵاو ئامەڎی پەیامێوەشا سەبارەڎ بە مانگرتەی جە وارڎەی کە جە ٢٧و تشرینوو دووەمیۆ دەسش پنەکەرڎەن وەڵاکەرڎۆ.

زینڎانیەکۍ ۋیرشا ئارڎۆ کە ڕابەروو گەلوو کوردی عەبدوڵا ئۆجالان نزیکەو ٢٥ ساڵان جە زینڎانێوە تاکە کەسی ئیمراڵینە بە شێوېوە نایاسایی ڕاگیریان و ئەرەیاۋناشا:"ماوەو ٢٥ ساڵان ڕووبەڕوو هەڵسوکەوتی کەیفی و هەڕەمەکی بیەنۆ. جە چوارچێوەو یاسای و دەستووری بنەڕەتینە مامەڵېوە پا جۆرە بیەیش نییا."

'با مافە بنەڕەتییە دەستوورییەکۍ رەچاو کریا'

زینڎانیا داوا کەرا گۆشەگیری سەروو عەبدوڵا ئۆجالانی هۊرگیریۆ و ئاژەو تەندروستی و عمرش وەروچەما گیریۆ و چا چوارچێوەیچەنە یانەنە مەنۆوە، حەفتانە چنی پارێزنەری و بنەیانەکەیش کۆبۊوە و مافە دەستوورییەکېش پۍ گېڵاوە زینڎانیەکۍ بەردەوام ماچا:"پېسە مزانیۆ بەڕێز عەبدوڵا ئۆجالان پۍ برایەتی گەلا، پۍ چارەسەرکەرڎەی قەیرانۍ و جەنگوو ۋەرکەوتوو دلېڕاسەی دەورېوە گرنگش هەن. جە پرۆسەو ساڵەکا بەینوو ٢٠١٣ تا ٢٠١٥ بە مەڵامەتوو سیاسەتەکاو ئاشتی و حۊڵەکا بەڕێز ئۆجالانی ۋنی لوتەو حیچ کەسێوەرە ناما، بەڵام ئانۍ کە پەشتیوانی جەنگیشا کەرڎ، ۋەرشا بە پڕوسەکەی گێرت و جارێوەتەر جەنگشا دەسپنەکەرڎۆ، چا ڕوۆ تا ئیسە، جەنگ بەردەوامیش هەن و زەرەرېوە فرەی ئابووری، کۆمەڵایەتی، سیاسی و مرۆڤایەتیش چنەکۊتۆ."

"ئەگەر داواکارییەکېما جابەجێ نەکریا، چالاکییەکېما ئانڎەی تەر ڕادیکاڵتەرۍ با"

زینڎانیەکۍ ئەرەیاۋناشا کە گەرەکشانە دەوڵەت بە پاو ئەنەیاوایش "گېڵایۆ جە غەڵەتەکا خاسا" مامەڵە کەرۆ و پەیامەکەشا پی جۊرە دمایی پنەئارڎ:"با پرۆسەو جەنگی مردۆ، گۆشەگیریی ڕەها سەروو بەڕێز ئۆجالانی هۊرگیریۆ، شەرتەکاو زینڎانوو ئیمراڵی ۋەرووچەما گیریۆ و یانەنە بازیۊوە، مافە یاسایی و مرۆییەکاش جابەجێ کریا و پرۆسېوە تازەو گفتوگۆی دەس پنە کریۆ، مانگېرتەکەیما ئیسە بەنۆبەن و حەر ١٠ ڕوۍ جارێ گروپێوە جیاواز مانی گېرا، ئەگەر داواکارییەکېما جابەجێ نەکریا، ئا وەختە چالاکییەکېما بە شێوېوە ڕادیکاڵتەر بەردەوامۍ با، گەرەکمانە ڕا جە مەرڎەی گېرمۍ، پرۆسەو جەنگی مرڎۆ، داوا جە گرڎوو گەلی خۊتان بە ویژدانی و ئەرەمەرزیاکا کەرمۍ دەنگشا وزانۍ پاڵ و دەنگیما، بە دڵنیاییوە پېوەرە بە ۋەرفراونکەرڎەی چالاکییەکاما سەرۍ گنمۍ، ئا سەرکۊتەیە بە کۊشیاین و بۆ."