جە ٢٠و ئایاریوە سوپاو عێراقی حۊل مڎۊ چواردەورو کەمپو پەنابەرا گەشمەرڎە رۊسەم جودی (مەخمور)ینە خەندەق بڎۊۋنە، تەلبەنش کەرۊ و بورجی سەروازی چەمڎاری وەش کەرۊ. ئارۊ ١٥ ڕوېن، دژ پا حۊلەیە پەنابەرەکۍ مەخموری جە مدرامانی وەردەوامېنۍ.

خەڵکو کەمپەکەی ١٥ ڕوېن بە شەو و رۊ دژ پا گەمارۊدایە ئینۍ مدرامانەنە. حەرپاسە سەروازەکۍ سوپاو عێراقیچ موزیڕېنۍ سەرو ئانەی و حۊل مڎا چوۋار دەورو کەمپەکەی بە تەل گېرانۍ.

خەڵکو کەمپەکەی هېزی شەوۍ جە خېمەکا مدرامانینە تا سەعبۍ ئێشکگیریشا کەرڎ و حەتا ئیسە ئا مدرامانە وەردەواما.

جە وېرەگاو ٢٠و ئایاریوە هێزەکۍ سوپاوعێراقی بە چەک هجومشا کەرڎ سەرو خەڵکو مەخموری و خەڵکو کەمپەکەیچ بە تەۋەنی وەرپەرچشا دېۋە. جە ئاکامو دەسڕېژو گولا سوپاو عێراقینە جوۋانېوە بە نامۍ ئەحمەڎ عومەرمژینی زامڎاربی و فاڕیاوە پۍ نەوەشخانەی.

هـ . ش