کاندیدەو دەم پارتی پۍ هامسەرۆکەو شارەوانی گۊرەو ئیستەنبوڵی، مەراڵ دەنیش بەشتاشە، پۍ ئاژانسوو هەواڵوو فوراتی (ANF)ی  قسێش کەردۍ.

مەراڵە ئاماژەش پانەی کەرد ئی ئەرکەی وزیان سەروو شاناش، ئەرکێوە قورسا، بەڵام بە نامۍ گەلەکەیماوە ئی ئەرکەیە گێرمێنە ئەستۆ.

مەراڵە ئەرەیاۋناش ئیستەنبوڵ شارێوە کوردییا،  ژمارێوە فرە کوردێش چنە مژیوا، حەرپاسە شاروو پێوەرە ژیۋای گەلان، عەلەوییەکۍ و گەلاو بەحری سیاوی چنەشەنە مژیوا، پۊکاتی ئی شارە باوشیش پۍ گرڎوو بەشەکا گلێرگەی کەردەنۆ.

ئەگەر جە ئیستەنبوڵەنە سەرۍ گنمۍ متاومۍ جە وڵاتەکەنە سەرۍ گنمۍ

مەراڵە سەرنجش وست سەروو پرووپاگەنڎەو "بەشکەردەو دەنگەکا" و ئەرەیاۋناش ئێمە دەنگەکا پارچە مەکەرمۍ و دەنگوو ۋێما بەدەس مارمۍ، بەپێچەوانۆ ئاڎۍ گەرەکشانە دەنگوو ئێمە پارچە کەرمۍ، ئێمە پارتوو یەرەموو وڵاتەکەینمۍ و بەشداری هۊرچنیەی کەرمۍ، واتش: "ئامانجما بنیاڎنیای دیموکراسییا تا گرڎ بەیەکسانی و پێوەرە چنەشەنە بژیومۍ. ئێمە پۍ وڵاتێوە کۊشیەیمۍ چنەشەنە پرسوو کوردی بەشێوێوە دیموکراتیک چارەسەر بۆ. نیازما نییا پەشتیوانی پارتێوە تەری کەرمۍ یان شکس بە پارتێوەتەری بارمۍ. ئێمە پۍ سەرکۊتەی ئینایمۍ چۍ.

داواو دەنگوو گرڎوو ئیستەنبوڵیەکا کەرمۍ. چونکی سەرکۊتەی ئیستەنبوڵنە جە گرڎوو وڵاتینە وەڵابۆوە و ژیۋایۍ یەکسان و هامبەش پۍ گرڎ لێوە ڕەخسیۆ. ئێمە پۍ زەوتکەردەی دەنگوو کەسی و ڕا گێرتەی جە کەسی نامێنمۍ. ئێمە گەرەکمانە سەرۍ گنمۍ و گەل قازانج کەرۆ.

ئێمە گەرەکمانە ئیستەنبوڵ جە تەرەفوو ئیستەنبوڵییەکاوە ڕاوەبەر کریۆ".