ڕۆنامەنوویسە نوژیان ئەرهانە، جە ٣ۍ ئاداروو ٢٠١٧ ینە جە ئاکاموو هجوومێوە هێزەکاو پەدەکەینە پۍ سەروو گلێرگەو ئێزدیی، سەروو ڕاو بەینوو سنونێ - خانەسۆرینە بە سەختی زامڎارە بۆ، جە ٢٢ۍ ئاداروو ٢٠١٧ ینە گەشمەرڎۍ بییە.

هێزی وێرەگا گەشمەرڎە نوژیانە جە حۆتەمین ساڵیاڎوو گەشمەرڎەبیەیشەنە، سەروو قەبرەکێشۆ جە قەبرسانوو دڵگەشی و مدرامانی جە کەش و شەنگالینە، جە تەرەفوو ڕۆنامەنوویسا شەنگالی و ئەنداما تاژێ یاڎش کریاوە. جە تەرەفوو هامڕایا و ئەڎایا شەنگالیۆ گوڵێشا سەروو قەبرەکێشۆ نیێرە و بەیاننامێوە ونیاوە.

سەرەتا بە نامۍ تاژێوە، خۆخە جندیە ئەرەیاۋناش وەختۍ پەدەکە و دەوڵەتوو تورکی یۊشا گێرت و ئامۍ سەروو سنونێ، ئا وەختە نوژیان ئەرهانەیچ سنونێنە بۍ و واتش: "ئێمەیچ باسوو ئا کۊکوشیەیما پۍ کەرد کە چێش ڕووەشدا ئا ڕووە. هامڕاما نوژیانە وەڵۍ کۊکوشی و دماو کۊکوشی گرڎوو چێوەکاشا ۋنە پەرسۍ. گرنگ نییا ئیساتۍ چێش بواچمۍ، هامڕا نوژیانەکۍ پۍ ئێمەی ئێزدی کۊشیایۍ فرەشا کەردەن. گرڎوو گەشمەرڎا ئازاڎیی و ٧٤ کۊکوشیۍ جە کەسایەتی هامڕا نوژیانێنە جە ویرا و شۊن پاو گەشمەرڎاما هۊرگێرمۍ."

بە نامۍ چاپەمەنی ئازاڎیی ژەنا ئێزدی (راژە)ی نوژین ئێزدیە قسێش کەردۍ و واتش: "من گەشمەرڎە نوژیانەم ئینا یاڎەنە بە وەشی و فیداکارییوە لووا شەنگال پۍ ئانەی ڕاسی کۊکوشیەکەی بە تەماموو جەهانی نیشانە بڎۆ. هەڤاڵە نوژیانە بە ۋێڕاگریێوە فرۆ ئێش و مدرامانوو ژەنا ئێزدیش نیشانەو گرڎ لێوە دا. ئێمە جە شۊنکۊتا گەشمەرڎە نوژیانێنمۍ کە دماو گەشمەرڎەبیەیش دەسمان بە چالاکی و کۊشیای کەرد، گەرەکما بۍ دەنگوو حەقیقەتوو گلێرگەکەیما بیمۍ و بیاومۍ بە گرڎوو جەهانی. وەڵۍ کۊکوشیەکەینە شەنگالەنە هیچ میدیێوە نەبیەن پۍ ئانەی ڕاسی گلێرگەکەیما نیشانە بڎۆ، بەڵام دماو کۊکوشیەکەی، چنی ئاماو ویر و فەلسەفەو ڕابەر ئاپۆی، چێگە ئەرەیاۋنای ئازاڎ ئەرەمەرزیا، ڕاسی کۊکوشیەکەی و گلێرگەکەیما بە گرڎوو جەهانی نیشانە مڎریۆ.