پەرلەمانتارەو پارتوو دیموکراسی و یەکسانی گەلا (دەم پارتی) نەورۆز ئویسال ئاسلان-ە ئەرەیاۋناش، پەی زینڎانیا نەوەشی کۊشش کەرا و واتش، "حۊڵ مڎەیمۍ کە جە ۋەران ۋەروو کردەوە و مامەڵە خراپەکا زینڎانەکانە هەم بیمۍ بە دەنگ، هەمیچ خەتېوە کۊشیای دیاری کەرمۍ".

ئویسال-ە جە دیڎارېنە چنی ئاژانسوو هەواڵو فوراتی (ANF) ئەرەیاۋناش: زینڎان یاگېوە پا جۆرە نییا کە چنەشەنە سیاسەت دیاری کریۆ. بەڵام دماو ئانەی هەڵوێسوو زینڎانیا، شێوەو مدرامانی جە ۋەران ۋەروو ئا ئاژەی کە ئینېش چنە، هەڵوێسوو ئاڎیشا جە ۋەران ۋەروو ئا سیاسەتەینە جە هەمان وەختەنە سیاسەتێوە تازە وزۆڕووە. گېرتەی و زینڎانی کەرڎەی هەزاران کەسا و هەڕەشۍ دادگای و سزادای زیاتەروو سەریشا  بەرش وزۆ کە جە زینڎانەکانە چ جەنگېوە پۍ ماڕای ئیرادەی ملۊڕاوە. ۋەروو ئانەیی کردەوەکۍ جە زینڎانەکانە جە رووی یاساییوە کردەوۍ خراپەکارانۍ و ئەشکەنجەداینۍ. جە رووەوە سیاسیەکەیچۆ حۊڵېوەن پۍ ماڕای ئیراڎەو ئینسانی.

ئا پەرلەمانتارۍ ڕۊشنش کەرڎۆ، " جە ڕاو ئا مامەڵە خراپاوە جە دژوو زینڎانیەکا، پەیامێوە مڎا بە کۊششکارا جە بەروو زینڎانی. دەوڵەت چا مژارەنە سیاسەتێوە تایبەت ڕاوەبەرکەرۆ. دەوڵەت سیاسەتوو کوشتەی سەروو کۊششکارارە جابەجێ کەرۆ".

نەورۆز ئویسال ئاسلانە ئانەیچش وست ڕووە ئا سزۍ کە مسەپیا یەکجار فرېنۍ، هەلومەرجوو زینڎانی فرە دژوارا و واتش، "بەتایبەتی راگېرتەی جە چارەسەرکەرڎەی زینڎانیا نەوەشی جە هەمان وەختەنە پاشێلکەرڎەی مافوو ژیۋاین. جە ئاکاموو پەیڕەوکەرڎەی سیاسەتوو کوشتەینە چارەسەریشا پۍ مەکریۆ. ئێمە پېسە سیاسەڎمەدارا دەم پارتی حۊڵ مڎەیمۍ دژوو ئا سیاسەتا کە زینڎانەکانە ملۆڕاوە بیمۍ بە دەنگێوە و هەمیچ خەتېوە کۊشیای دیاری کەرمۍ. چا مژارەنە پۍ ئازاڎکەرڎەی زینڎانیا نەوەشی ئێمە درێژە بە کۊشیای ۋېما مڎەیمۍ".