کۆردیناسیۆنوو یەپەسە/یەپەسە-ژەنێ ئەرەیاوناش، "هامڕا چیاگەر هێڤی شۆنکەوتەو  فەرماندەی ئەفسانەییما عەگید (مەعسوم کۆرکماز) و یۆ جە فەرماندە گیانبازەکاو مدرامانوو وێڕاوەبەری کە سەروو بنەماو ستراتیژوو جەنگی شۆڕشگێڵنیی گەلی وزیا وەڵێ، هەشتەم ساڵیادوو گەشمەردەبییەیشنە بەڕێزۆ یادش کەرمێوە و کەسایەتیی گەشمەردە چیاگەر هێڤیینە وەعد مدەیمێ پێوەسبییەی وێما بە گردوو گەشمەرداوە ئەوەخوای کەرمێوە".

ئەرەیاونایەکەو کۆردیناسیۆنوو یەپەسە/ یەپەسە-ژەنێنە ئامان:

"دژوو 'پلانەو وڕنای' کە دەوڵەتوو تورکی سەروو بنەماو قڕکەردەی و جینۆسایدوو گەلوو کوردی دەسش پەنە کەردەن، بە سەرمەشقایەتی چیاگەرهێڤی، نوجان، زەریان و خەباتکارەکاو گەلەکەیما مدرامانێوە تارێخییش گێرتەرە وەر و مۆرەو ێش دا وەنەو تاریخی. ئا مدرامانە شکۆمەندانە وەرش پا پلانێ دوژمنی گێرت و گەلە وێگیرەکەما نیشانەش دا کە ئاستوو هجوومەکەی چێش بۆ با بۆ، ئادێ سەرە نمەکۆمنارە و وێشا مەدا دەسۆ. دەوڵەتی تورکی کۆلۆنیالیست قۆناغوو مدرامانوو وێڕاوەبەریینە تا ڕۆو ئارۆی هجوومێ کەرۆ و گەرەکشا ئەنجام بەدەس بارۆ. بە پەشتیوانیی سەرمایەی جیهانی، ناتۆ، هامکارە هەرێمی و خائینەکا ئامانجش ئانە بێ، کە  جمیەر، ڕێکوستەی، دەسکەوتەکاو گەلوو کوردی و بییەی گەلوو کوردی بەتەمامەتی پاکتاوێ کریا. وەروو ئینەیچە  گرد لاێوە هجوومش کەرد سەروو گردوو بەهاکاو گەلوو کوردی. ئا هجوومە تا ڕۆو ئارۆی بەردەواما. بە سەرمەشقایەتیی ڕابەر ئاپۆی ماڕای بییەی گەلوو کوردی زیاتەر جە ٥٠ ساڵان بەتایبەتی چی ٩ ساڵەو دماینە بە بێوچان و بە هاوسەنگیێوە بەرزۆ بەردەواما. پێسە چەنی هەشت ساڵێ وەڵێ ئیسەینە سور، جزیر، شڕنەخ، هەزەخ و گەڤەرنە کریا، ئارۆیچ زاپ، ئاڤاشین، مەتینا و خواکورکنە بە سەرمەشقایەتیی گەریلای ئا مدرامانە شکۆمەندانە بەردەواما.

هامڕا چیاگەر هێڤی فەرماندەو مدرامانی شکۆمەندانەی سووری، دژوو هجوومەکاو دلێنەبەردەی دوژمنی، سەروو بنەماو جەنگوو گەلی شۆڕشگێڵنی بە بڕوا، قەرارداری و پاگێرتەیرەی گەورەوە سەرمەشقایەتییش پەی مدرامانی سووری کەرد. هەستوو پێوەسبییەی ڕابەر ئاپۆی و ئاواتەکاش، گەورەبییەی و قەوەتبییەی مدرامانیش دیاری کەرد. گرد وەختێوە بێ دووەدڵی دژوو گرد هجوومێوە دوژمنی بە ڕۆحێوە فیداییوە گژیا. گردوو تایبەتمەندییەکا کە وستشا وەڵێ و کەسایەتییشنە خۆیدا یاگەدارێش کەردێبێنێ، پێسەو فەرماندێوە  کە جەنگەوانەکاش سەرۆ پەروەردێ کەردێ، ئا ئیرادە پتەوە و بڕوامەندە کە بە سەرمەشقایەتیی هامڕا جیاگەر هێڤی ئاما ئاراوە، دژوو تەکنەلۆژیای وەڵیکەوتەی و چەتەکاو فاشیزموو ئاکەپە-مەهەپەی مدرامانی سەردەمییشا گێرتەرە وەر. بە قسێ وێگیرە سوورا، کۆمۆنی تارێخیی پاریسیش ویەرنان و پا مدرامانۆ سوورنە پەڕێوە تازەی تارێخییش ورداوە. نەک هەر گورزی ستراتیژیکی قورس چا مەیگەلە فاشیستەو ئاکەپە-مەهەپەی دریا، هەمان وەختنە ڕۆح و ئیرادەو سەردەمی پەی گەلوو کوردی وزیا ڕووە. ڕۆح و ئیرادە کە مشۆم وەراوەروو فاشیستەکانە نیشانە بدریۆ، ئاما کایەوە. هەمان وەختەنە ئانە سەلەمیان، کە وەراوەروو هجوومە هەمەلایەنەکاو سڕیەیۆ و پاکتاوینە تاکە ورچنیە مدرامانا.

هامڕا کەمال پیر کە یۆ بێ جە سەرمەشقەکاو کۆشیای ئێمە، ساڵەو ١٩٨٢ دژوو گردوو هجوومە قورسەکا  زیندانەکاو فاشیزمینە واتەبێش، 'من سەرکەوتەی دلێ ئی جمیەرینە موینوو'. هامڕا چیاگەر کە ساڵەو ١٩٨٢ینە ئاما دنیاوە، مدرامانی سوورنە دژوو گردوو هجوومە فاشیستیەکا بە واتەی 'ئاخیرەکەش شکۆدار بۆ' درێژەش پا نەریتەیە دا. هامڕا چیاگەریچ پێسەو هامڕا کەمال پیری داراو هومێد، بڕوا، قەرارداری و پێوەسبییەی بە وەرمەکاو ڕابەرایەتیی ئازادی، کوردستانی ئازادی و ژیوای ئازادی بێ.  

هەرمانەی سەرەکییەو سەروو شانەیما ئانێنە، کە ئێمە جەنگی شۆڕشگێڵنیی گەلی، کە ڕاو ئاردەیدی ئامانجەکاو ڕابەرایەتیی ئازادی، کوردستانی ئازادی و ژیوای ئازدینە، کە وەرم و ئاواتوو گردیمانە، قەوەتتەر کەرمێ. چی قۆناغەنە مشۆم تاکە ئامانج و هەرمانەو گردیما ئانێ بۆ، مدرامانی شکۆدار کە ئیمراڵیینە بە سەرمەشقایەتیی ڕابەر ئاپۆی و هەرێمەکاو پارێزنای مێدیاینە ڕاو گەریلاکاو ئازادییوە یاوان بەرزتەرین ئاست، گرد مەیدانێوەنە فراوانش کەرمێ و پەرەش پەنە بدەیمێ. پەی پووچەڵکەرەیۆ هجوومەکاو قڕکەردەی و سەرکەوتەی جەنگی شۆڕشگێڵنیی گەلی، مشۆم ئێمە بە ڕۆحوو چیاگەر هێڤی-وە وێپارێزنای گەلوو وێما گرد مەیدانێوەنە وزمێ وەڵێ و قەوەتش کەرمێ. سەروو بنەماو ڕاسیی گەلی جەنگکەری، بە سەرمەشقایەتیی ژەنا و گەنجاوە مشۆم تەماموو گەلە شکۆمەند وەڵاتپارێزنەکەیما بە گردوو هێزوو وێشاوە بەشدارێ با و گنا ئامادەباشییوە.

ساڵیادوو گەشمەرەبییەیشنە ئێمە جارێوە تەر جە کەسایەتیی هامڕا چیاگەر هێڤی-ینە گردوو گەشمەرداما  بە پەنەزانایۆ یادێ کەرمێوە، پێوەسبییەی پۆشاوە و یادەوەرییشا وزمێ ڕووە و وەعد مدەیمێ ئاوات و ئامانجەکاشا بارمێ دی ".