سیاسەڎمەداروو قوبرسی، نیۆکلیس سیلیکیۆتیس باسش چانەی کەرڎ کە ئاخېزوو ۋەرنیشتی پۍ قوبرسی نمونېوە وەڵینگەین و بیەن بە سەرچەمەو ئیسفاڎە چنە ورگێرتەی.

پەرلەمانتاروو قوبرسی جە پەرلەمانوو ئەوروپای نیۆکلیس سیلیکیۆتیس قسېش پۍ ئاژانسوو هەواڵوو فورات (ANF)ی کەردۍ و ئەرەیاۋناش: " دەمێوەن جمیەروو ئازاڎیی کوردی مشناسوو، جە ساڵەکا ١٩٨٠یۆ کە ئەڵمانیابېنۍ پەکەکەی مشناسوو. بەڕێز ئۆجالان بەمەڵامەتوو هەڵوێستێوە یۆنانیۆ کە شیاوو قبوڵکەرڎەی نییا گیریا. حەر ئا وەختە رەخنەما چا هەڵوێستەو یۆنانی گېرت. پۍ ئێمە یاگۍ شەرمەزاریېوە گەورەی بۍ. من ئاگاڎاروو گرڎوو قۆناغەکا گېرتەی ئاڎینا و حەر ئا وەختە ناڕەزاییما بەربڕی. وەختۍ دادگاییکریا و سزاو جە قەنارەدایش سەرەرە سەپیا فراکسیۆنوو چەپی جە پەرلەمانوو ئەوروپای ناڕەزایەتی گەورەش نیشانەدا. چی ساڵا دماییەینە یاگەگیروو سەرۆکوو فراکسیۆنی بېنۍ و گرڎ ساڵۍ چالاکیما پەی کوردسانی ساز کەرڎەن. پۍ ئانەی کۊشیای کوردا نیشانە بڎەیمۍ جە هادەپەوە تا پەیەدە جە سوریا ئێمە خوڵقەو کوردی کەرېنمۍ و بەردەوام پرسوو ئازاڎکەرڎەی ئۆجالانی وزېنمۍ ڕووە.

پېسە فراکسیۆنوو چەپی و ئەی کە ئی ئێڵ حەجگیز قبوڵش مەکەرمۍ کە جمیەرە رزگاریوازەکۍ پېسە تیرۆریستی پێناسە بکریا. موینمۍ کە تورکیانە ئا کەسۍ کە پۍ ئازاڎیی گەلی کۊشیا بە ئاسانی بە تیرۆریست تۆمەتبارۍ کریا. مژارېوەتەر کە پەیوەس بە عەبدوڵا ئۆجالنی مایۍ قبوڵکەرڎەی نییا، ئانەنە کە جە ژووری تاکەکەسینە ئاستەنشاوە، کە ئانەیچ جە سیستموو دادوەری تورکیای و ئەوروپاینە یاگېش مەبۊوە. ماوەو نزیکەو یەرۍ ساڵایچا مەتاوۆ پارێزنەر و کەسوکاروو ۋېش بوینۆ. ئانەیچ پاشێلکەرڎەی سەرەتاییتەرین مافەکا مرۆڤین. مەتاوا ئینسانېوە چا ئاستەنە گۆشەگیر کەرا. ئانە شێوازێوە ئەشکەنجەیا.

عەبدوڵا ئۆجالان کۊشیایۍ بێهامتا بەرۊڕاوە و ئانەیچ راستیێوەن. تا ئا کۊشیایە بۆ چنڎەیچ فشار کەرا، مەتاوا ۋەردەموو کۊشیاو ئازاڎیی کوردینە با بە لەمپەڕ. بەپێچەوانۆ، کۊشیای گەلوو کوردی زیاتەر گەورە بۆ. نەک حەر جە تورکیا، جە سوریا، جە عێراق و مەنتیقەکا تەرینە. ئانەیچ بەرش وزۆ کە دەوڵەتێوە دیکتاتۆر جە ۋەران ۋەروو سەرۆکوو گەلوو کوردینە چنڎە ڕێچ گېرۊنە ۋەر، مەتاوۆ ڕا جە دەوروو ئاڎی گېرۆ دلۍ کۊشیای ئازاڎیی گەلوو کوردینە".

نیۆکلیس سیلیکیۆتیس جە درېژەو قسەکاشەنە سەرنجش وست سەروو ئاخېزوو ۋەرنیشتی و واتش، "جە چالاکیەکاو پەرلەمانوو ئەوروپاینە ئێمە پەشتیوانی فرە جە مۆدێلوو ۋەرنیشتی کەرمۍ، ئانە نمونېوەن جە پێگە و هەڵوێستوو عەبدوڵا ئۆجالانی؛ ئازاڎیی ژەنۍ، پارېزناو ژیۋگەی، ژیۋای پېوەرەیی و دیموکراسی نمونېوەنۍ جە مۆدێلوو ۋەرنیشتی. نمونېوەن کە بەردەوام باسش کەرمۍ. ۋەروو ئانەی کورد جە ڕوو وەڵینگەیۆ پۍ ساڵانێوە فرەی بە ئایین، شێخ و مەلاوە مەشخوڵ کریابۍ، جە سایەو پەکەکەیۆ پێناسەکۍ دیموکراتیکی، کۆلەکتیڤ و ئیکۆلۆژیکی خوڵقیۍ.

ئاخېزوو ۋەرنیشتی پۍ قوبرسی نمونېوە وەڵینگەین. ئانە پۍ ئێمە سەرچەمەو ئیسفاڎە هۊرگېرتەین. پېسە چنی مرۆڤەکۍ ۋەرنیشتەنە، عەرەب و کورد دلۍ گلېرگېوە دیموکراتیکینە بە شێوېوە یەکسان مژیوا و وەرپەرچوو نەتەوەپەرسی مڎاوە، ئا پاڕادایمەیچە بەرش وزۆ کە رۆمەکۍ قوبرسەنە متاوا بە شێوېوە دیموکراتیک چنی گەلا تەری بژیوا، پەنەوازشا بە هێزێوە تەری باڵادەسی و هێزێوە پارېزنای جیای نییا".

سەبارەڎ بە هەڵمەتەو 'ئازاڎیی پۍ عەبدوڵا ئۆجالانی و چارەسەری سیاسی پۍ پرسوو کوردی' نیۆکلیس سیلیکیۆتیس واتش، "تورکیا بە زینڎانی کەرڎەی عەبدوڵا ئۆجالانی گەرەکش بۍ جمیەروو ئازاڎیی کوردی پاکتاو کەرۆ. ئینە ڕووەش نەڎا، بە پێچەوانۆ جە ئاژەو گېرتەیشەنە ئاخېزێوە تازەش خوڵقنا. ئا کەمپینە فرە گرنگا، مژارېوەن کە ماوېوە فرەن باسش کەرمۍ. پۍ ئانەی پرسوو کوردی بە شێوېوە دیموکراتیک چارەسەر کریۆ، مشۊم سەرۆکوو گەلوو کوردی ئازاڎ بکریۆ. گۆشەگیری دەردەو چارەسەری قۊرتەکۍ مەوەرۆ، بەڵکم قۊرتەکا قووڵتەر کەرۊوە. پۊکەیچ مشۆم پەشتیوانی میان نەتەوەیی بەقووەتتەر کریۆ. پۍ چارەسەری دیموکراتیکی و یەکسانی. پۍ مردنای جەنگی، واوەیش کەرووە کە مشۊم دەموودەس عەبدوڵا ئۆجالان ئازاڎ بکریۆ".

جە دمادمایی قسەکاشەنە نیۆکلیس سیلیکیۆتیس واتش، "جە گرڎ بوارېنە ئێمە ئینایمۍ چنی کوردی. چېش کەرا، با کەراش، ئێمە پەشتیوانی چایشا کەرمۍ، ۋېش جە ۋېشەنە ئێمە گرڎ وەختۍ پەشتیوانیما بەربڕیەن. پەیلووای فرە ئەرێنیما سەروو کوردی هەن. ئا کەمپینە فرە گرنگا. جە ڕاو ئا کەمپینەیۆ مشۊم ئێمە زیاتەر جە هەرمانەکاو ئۆجالانی جە زینڎانۆ، جە پێشنیازەکاش پۍ ئاێربەسی، هەرمانەکېش پەی گلېرگەی، کار و بەرهەمەکاش جە ۋەرنیشت زیاتەر بیاومېنە. مشۊم ئانەی پۍ گەلوو قوبرسیچ باس کەرمۍ. حەرپۊکەی بە بڕواو من مشۊم کتێبەکاو ئۆجالانی بە زۋانە جیاجیاکا هۊرگېڵنایشا پۍ کریۆ. بەتایبەتی قوبرسەنە چونکی فرە کەمېنۍ. مشۊم زیاتەرۍ کریا. فرە گرنگا کە ئەندێشە، فەلسەفە و ئایدۆلۆژیاو عەبدوڵا ئۆجالانی دلۍ گەلوو قوبرسینە وەڵابۊوە".