عادل مانع، ئەندامو هامپەیمانیی دەوڵەتو یاسای ئەرەیاوناش، دەوڵەتو عێراقی فشارەکاو دەوڵەتو تورکی پەی قەدەغەکەردەی هەرمانەو پەکەکەی ڕەت مکەراوە و جەختش کەردۆ، "پێویسا حکومەت و هاموەڵاتێ عێراقی سپاسو پەکەکەی بکەرا".
عادل مانع ئەندامو هامپەیمانیی دەوڵەتو یاسای، بە ڕۆژنیوزیش ئەرەیاونا، " پێویسا حكومەت و هاموەڵاتێ عێراقی سپاسو پارتو كرێكاراو كوردستان (پەكەكە)ی بكەرا پەی ئا هامكارییا کە پێشكەش وعێراقییەكاشا کەرد جەنگو دژو داعشینە، چونكوم هەڵوێستشا شەرەفمەندانە و یاگێ ڕێزی بی، ئێمەیچ ئینكاریی ئا خاسەیە نمەکەرمێ.
واتیچش: "واتەواچەکاو حكومەتی چەنی توركیای ماناو ئانەی نییەنە، عێراق داواكارییەكاو توركیای پەی قەدەغەكەردەی هەرمانەو پەكەكەی بیاونۆ یاگێ، بەڵكوم ڕەنگا حكومەتو عێراقی بەڕسمی مامەڵە چەنی ئا حزبە بکەرۆ" .
ئا ئەندامەو دەوڵەتو یاسای نیشانەش دا، ئی بابەتە ئاڵۆزا و ئاسان نییا، چونكوم هیچ ئاماژێوە لاو حكومەتو عێراقەوە نییاپەی بۆ قەدەغەكەردەی هەرمانەو ئا حزبەیە.
واتەنیچش، "پاشێلکەردەی سەروەریی وەڵاتەکەیما لاو توركیایۆ پلانێوەنە، كە ئەمریكا پەشتیوانییش مکەرۆ، پەوکای توركیا نمەتاوۆ هەنگامەی چانێ بنیۆ بەبێ ڕەزامەندیی ئەمریكای".
ئانەیچش وست ڕووە، ئەگەر بگێلمیوە پەی دمای، پەیما بەر مگنۆ هجوومەکاو توركیای پەی سەرنیشتو سووریای هاموەخت بییەن چەنی ئەرەگیركەردەی بەشێوە هەرێمو كوردستانی، كە ئیساتێ دەوڵەتو توركی ٤٠ كیلۆمەترێ ئامان دلێ خاكو عێراقیوە، یانێ زیاتەر جە ٢٠٠ كیلۆمەترا ئامان دلێ خاكو عێراقیوە، خاسا ئینە جەنگا چنی پەكەكەی یا فراونكەردەی دەسەڵاتەكاش مەنتێقەکەنە".
ئاخرۆ واتش: "ئەگەر بییەی توركیای تەنیا بییەێوە ئاسایین، خاسا چی بنكەی سەروازییشا نیانرە؟ بەعشیقە وەختێوە پەكەكەش نیا چەنە، بەڵام سەروازێ توركیایش چەنەنێ چی؟".
