نوری مەحمووڎ، قسەکەروو یەپەگەی  واتش، کە بەرڎەوامۍ با  جە هەرمانەکاشا پەی پارێزنای دەسکەوتەکاو شۊڕشی و گلێرگەی، با گەل سەبارەت پی بابەتەیە هیچ خەمێوەشا نەبۊ و واتش: "ئێمە داعشما ماڕا، هجوومەکاو  ئارۊیچ ماڕمێ".

نوری مەحمووڎ قسەکەروو یەپەگەی بۊنەو ساڵۍ تازێوە پەی ئاژانسوو ANF قسێش کەرڎێ.

نوری مەحمووڎ واتش، کە  وەرنیشت و سەرنیشت و وەرکەوتوو سوریاینە، چەنی دەسپەنەکەرڎەی شۊڕشوو وەهاروو گەلا، پڕۊژێوە تازە پێشکەش بە خەڵکوو سوریا، وەرکەوتوو دلێڕاسەی و تەماموو جیهانی کریا و واتش: "یەپەگە و یەپەژە چێروو سێبەرەو (قەسەدە)ینە دەوروو پارێزنای ئی پڕۊژەیەیشا گێرت گەرڎەن. ئێمە ئەوەڵ گردو هجوومە هەواڵگێرییەکا، سەروازییەکا و سیاسییەکاو دەوڵەتوو تورکی و دەوڵەتە بەرژەوەندیوازەکاما ماڕێ. هەمان وەختەنە تا گردوو گەلاو سوریای دلۍ سیستمێوە دیمۊکراتیکینە بژیوا، پرۊژێوەما پێشکەش کەرد. چا ڕووەوە ئێمە گردوو ئا هجووماما پووچەڵۍ کەرڎێوە، کە وەراوەروو دەسکەوتەکاو سەرنیشت و وەرکەوتوو سوریایوە کریێنێ. ئەنجامۍ پیلانگێڵنییەکاما پێچەوانە کەرڎێوە. ئەنجاوو ئینەیچەنە دەسکەوتۍ گەورێما دەس وستۍ و سەرەمڕ چەنی گەلوو سوریای واتەواچما کەرڎەن.

ئێساڵ گەلوو سیوەیداش واتشا، کە مۊدێلوو ئیدارەو وێڕاوەبەری گونجیاتەرین مۊدێلا پەی ڕاوەبەرڎەی مەنتیقەکاشا.جگە جە هەرێمەکاو سەرنیشت و وەرکەوتوو سوریای، هیچ بەشێوە سوریاینە سیستمێوە نییا، کە گەل وێش بەئازاڎانە ڕێک وزۊ و ئیفادە کەرۊ، نە چا یاگانە کە ئینۍ چێروو دەسەڵاتوو حوکمەتوو شامینە و نە چا یاگایچەنە کە ئینۍ چێروو دەسەڵاتوو دەوڵەتوو تورکی ئەرەگیری و چەتەکاشنە سیستمێوە چانە نیا. واز جە سیستمی بارڎۍ زەمینێوە دیمۊکراتیکیچ نیا.  بەتایبەت ساڵەو ٢٠٢٣ پێسە ئانەی کە وینیا  بڕۍ دەوڵەتۍ پێسە دەوڵەتی ڕەفتار مەکەرا. دلێشانە دەوڵەتوو تورکی پێسە گروپێوە مافیایی و تیرۊریستی ڕەفتار کەرۊ. پێوەندیێوە قەوەت  هەن بەینوو هاکان فیدانی و دەوڵەتێوە پێسە تالیبانوو ئەفغانستانینە، کە جە بازرگانیی ماددەی هۊشبەری و تیرۊرینە یوەما. بەتایبەتی سنوورەکاو سەرنیشتوو کوردستانیی بە شێوێوە قەوەت پەی ئانەیە بەکار مەیا. دلۍ تورکیاینە بازرگانی بە ماددەی هۊشبەریوە کریۊ و هەم فاڕیۊیچۊ پەی وەڵاتاو سوریای و ئەورووپای.

نوری مەحمووڎ ماچۊ، دەوڵەتوو تورکی تەکنەلۊژیای وەڵیکەوتە و هێزی عاسمانیی وێش بەکار مارۊ، وەلۍ پێسەیچ  وەراوەروو هێزە سەروازییەکاما حیچ ئەنجامێوە دەس مەوزۊ و واتش:"هاکان فیدان وەزیروو بەروو تورکیای بەئاشکرا ماچۊ کە تاوانوو جەنگی کەرا، یانۍ چێرخانە تازەکا کەرا بە ئامانج.  چاپخانە، کۊگاو گەنما، وێستگەکاو کارەبۍ، هەرمانگۍ و ئەرەمەرزیایەکا کە پەنەوازیۍ خەڵکینۍ کەرا ئامانج. یانۍ ئینسانیەتی کەرا ئامانج. ئیتر پەنەوازا یۊبییەی ئەورووپای و ناتۊ ئینەیە بوینا. ئارۊ گرووپێوە مافیۍ دەسشا سەروو دەوڵەتێوە ستراتژیرە گێرتەن و ئی عەقڵیەتە چوارچوەو وێشانە بەکار مارا. چی ڕووەوە پەنەوازا یۊبییەی ئەورووپای و ناتۊ و بەتایبەت گەلوو تورکی دژوو ئینەیە ڕایۍ وێزاوە. تورکیا مشۊم دەسوو ئی دەسەڵاتە مافیای و ئینسانکوشاوە ڕزگارش بۊ.  

ئەوەڵوو شۊڕشیوە تا ئارۊ جەنگما دژوو داعشی بەرڎەواما. پێسە مزانیۊ هەزاران چەتۍ داعشی ئینۍ زیندانەکاو ئێمەنە. نزیکەو ٥٠ هەزار بنەیاناو داعشی ئینۍ کەمپوو هۊلدانینە. سەرجەموو ئینیشا تەرسۍ گەورۍ مەنتێقەکەنە وەش کەرانۍ، جگە چینەیچ بنکەکاو چەتەکا ئینۍ چێروو ئەرەگیرکاریی دەوڵەتوو تورکینە. دەسەڵاتداراو دیمەشقی  هەرێمەکاو وێشانە وێشا پێسە تەدموری، ئینۍ سەنگەروو دمایوە و بەرڎەوام یاگەکا پەی چەتەکاو داعشی جیا مازا. یانۍ بییەی ئا یاگا، زیندان و کەمپەکا، تەرسێوە گەورێنە سەروو مەنتێقەکەی. پەنەوازا گلێرگەی میاندەوڵەتی قەراری تازە پەی داعشی بەر کەرۊ. زیندانەکامانە زیاتەر جە ١٠ هەزار چەتاو داعشی هەنۍ، ئەر ئازاڎۍ با متاوا ١٠هەزار جەتۍ تەرۍ  داعشۍ ڕێکۍ وزا. جگە چانەیچە زیاتەر جە ٥٠ هەزار زارۊڵا ئینۍ کەمپوو هۊڵداینە، کە لاو بنەیانەیشاوە بە عەقڵیەتوو داعشی پەروەرڎۍ و گەورۍ کریا، ستاندارڎە جیهانییەکانە هیچ ڕا و دەستوورێوە دژوو ئینەیە نەنریانرە. جگە ئانەیە مەنتێقە ئەرەگیرەکانە بە دەسوو دەوڵەتوو تورکی چەتەکۍ مەناوە. دەوڵەتوو تورکی بە پاڵپشتییی یۊبییەی ئەورووپای و ناتۊی پەشتیوانیی وەنەو داعشی کەرۊ.  

قسەکەروو یەپەگەی، نوری مەحمووڎ، ئاخروو قسەکاشنە واتش:"بێگومان ئارۊ سەرنیشت و وەرکەوتوو سوریاینە مۊدێلێوە کۊمەڵایەتی ئەرەمەرزیان. هەرمانەی سەرەکییەو هێزەکاما پارێزنای دەسکەوت و ئامانجەکاو گلێرگەین پەی پارێزنای دەسکەوتەکاو شۊڕشی و گلێرگەی. ئێمە وەراوەروو گرد هجوومێوە فاشیستی و ڕەگەزپەرستانەینە هەرمانەو وێما کەرمۍ . با خەڵکەکەما حیچ خەمش نەبۊ.