وەڵۍ دەس بەکاربیەو مەسرور بارزانى پېسە سەرۆکوو کابینەو نۆیەموو حکومەتوو هەرێمی، تەسەورەکۍ پا ئاڕاستەرە بېنۍ، جە کەسایەتى مەسرور بارزانینەکە جە هەناوو دەزگېوە سیخوڕییۆ مېنە دلۍ کایەی سیاسى و مەدەنى، مەتەرسى نەک پۍ سەروو ئازاڎییە گرڎینیەکا و ئازاڎیى هەرمانەی ڕۆنامەگەرى وەش کەرۆ، بەڵکم حۊڵوو بێدەنگ کەرڎەی و دوروستەیۆ کەسایەتییەکا دلۍ بنەیانەکەیچش مڎۊ و هەرێموو کوردسانی ڕووبەڕوو قەیرانێوە سیاسی و ئابورى قوڵی کەرۊوە بە قوڵکەرڎەیۆ ملەملانەکا چنی حکومەتوو عێراقی.

پېسە ئانەی تەسەور کریابۍ مەسرور بارزانى جە هەناوو دەزگېوە سیخوڕییوە ئامان دلۍ کایەیی سیاسیی و مەتەرسى سەروو هەرمانەو ڕۆنامەوانى و ئازاڎیى ئەرەیاۋنای وەش کەرۆ، جە یوۋەمین هەنگامەیچشەنە دژوو ڕۆنامەنووویسا، ژمارېوە جە ڕۆنامەنوویسا و چالاکا مەدەنىش بەتۆمەتەو سیخوڕى کەرڎەی و دماتەر بە تۆمەتەو تیرۆری وستۍ گونجوو زینڎانیۆ وەڵۍ قەراروو داڎگاکانە قەراری سیاسىیش سەرەرە سەپنۍ، ئینەیچ کاروەدای ڕێکوزیاکا دلېینەی و میان دەوڵەتییەکا و کۆنسوڵوو ولاتاش چنە کۊتۆ و ئیڎانەو سیاسەتەکاو مەسرور بارزانیشا کەرڎ.

چا چوارچێوەنە و دماو قەرارەکەو داڎگاى فیدراڵى و هۊرشانایۆ پەرلەمانوو هەرێموو کوردسانی، حکومەتوو هەرێمی بیەن بە هەرمان ڕاییکەر، چا وەختە بەدماوە گرڎوو توانا و وزەو دار و دەسەکەو مەسرور بارزانى وزیان خزمەتوو پڕوپاگەندەی و نیشانەداى کابینەکەو مەسرور بارزانى پېسە کابینېوە سەرکۊتەی، چېگۆ کریۆ جە هاموڵاتیا پەرسمېنە ئایا کابینەکەو مەسرور بارزانى سەرکەوتە بیەن یان تەنیا پڕوپاگەندەو سەروو شاشەکان و حیچى تەر؟

سیاسەتە غەڵەت و بەردەوامەکا مەسرور بارزانى جە ۋەرتەسک کەرڎەیۆ ئازاڎییەکا و وەشکەرڎەی قەیرانۍ جۆر بە جۆرۍ پۍ هاموڵاتیا هەرێموو کوردسانی و تاوانبارکەرڎەی ڕۆنامەنوویسا بە سیخوڕى کەرڎەی پۍ کۆنسوڵوو وڵاتا وەڵۍ قەراروو داڎگاکانە، هەرێموو کوردسانیش بەرەو لێوارێوە مەترسیڎاری ئاڕاسەکەرڎەن و کار یاوان پانەی، سەرۆکوو حکومەتى هەرمان ڕاییکەروو هەرێموو کوردسانی، جە پېخامېوە پەڕ جە ڵاڵیایۊینە باسوو مەترسییەکا سەروو قەوارەو هەرېمی پۍ سەرۆکوو ولایەتە یۊگېرتەکا ئەمریکای کەرۆ.

بە پاو ئاژانسوو مۆنیتەری ئەمریكی، سەرۆك وەزیرانوو هەرێمی جە ٣ۍ ئەیلوولینە پېخامېوەش ئاراسەو سەرۆكوو ئەمریكای کەرڎەن و دماو چن ڕووېوە یاوان دەسوو بایدنی، بەپاو نەواخن و دلۍ پېخامەکەی مەسرور بارزانی ئاگاڎیش دابۍ، کە رەنگا هەرێموو كوردسانی پېسە قەوارېوە هەرەسبارۊ ئەگەر قەیرانەكە چارەسەرنەكریۆ و قورسا سەروو ئا ئاژەیرە زاڵۍ با.

کیاستەو پېخامېوە پی جۆرەیە پەیوەندییداربۍ بە قەراروو داڎگاو میانجیکەری میان دەوڵەتى جە پاریس تایبەت بە پرسوو نەوتۍ و هەرزان ورەشتەی نەوتۍ بە دەوڵەتوو ئەرەگیروو تورکی و قەراروو داڎگاى فیدرالى تایبەت بە هۊرشېونایۆ پەرلەمانوو هەرێموو کوردسانی.

هاموەخت چنی پېخامەکەو مەسرور بارزانى پۍ سەرۆکوو ئەمریکای، نێچیرەڤان بارزانىچ بە پەلە ۋېش یاونا لاو ئیمانوێل ماکرۆنی سەرۆکوو فەرەنسای جە پایتەختوو ئا وڵاتەیە و داواو میانجیکەریش ۋنەکەرۆ پۍ گفتوگۆو بەینوو هەولێری و بەغڎای، حەرچنە میدیاکۍ سەر بە پەدەکەی گەرەکشابۍ پلانەو سەرداکەی بشاراوە، بەڵام بەرکۊت ئامانجوو سەرداکەی پۍ دمایی ئارڎەی بۍ پا مەترسییا کە ڕووبەڕوو قەوارەو هەرێمی بیېنێوە و ئاڎیچ جە دەرئەنجاموو سیاسەتە غەڵەتەکا حەر یەرە بارزانییەکەی.