دەنگدای جە جبەرو ۋڵاتی پۍ ھورچنیەکا ۱٤و ئایارو ۲۰۲۳ جە تورکیا و سەرنیشتوو کورڎسانی، چن ڕوۋۍ چېۋەڵتەر دەسش پنەکەرڎ. پارتو چەپی سەوزی جە ئۊروپا ماتەوزە و توانېۋە بەقوەتش پۍ دەنگدای هەن، ھەرمانېوە وەرفراوانە ئەنجام دریۊ.

ڕەمزی کارتاڵ هامسەرۊکو کۊنگرەو - گەلی بە ئاژانسو هەواڵی فورات (ANF)یش ئەرەیاۋنا، ھورچنیەکۍ ١٤ و ئایاری دەرفەتێوەن پۍ بە دیموکراسیکەرڎەو کۊماری، کە سەرو بنەماو نکوڵیکەرڎەی و دلېنەبەرڎەی و ئەسڕیەیۊ مەرزیانەرە، پۊکەی داواش جە گرڎ لایۍ کەرڎ بە گرڎ توانېوەشاۋە بە شێۋېوە وەرفراوان و هەمەلایەن ۋێشا پۍ پارتو سەوزی چەپی تەیار کەرا.

ڕەمزی کارتاڵ ئەرەیاۋناش، ھورچنیەکۍ ١٤و ئایاری ھورچنیېۋە ئاسایی نیەنۍ و ۋاتش، "ھورچنیەکۍ ٢٠٢٣ۍ ئاسایۍ نیەنۍ. ھورچنیەی جە وەختۍ گرنگەنە ئەنجام دریۊ. ماوەو ١٠٠ ساڵان سیاسەتۍ نکوڵیکەرڎەی جە دژوو کورڎەکا ملۊڕاوە. بە تایبەتی بە جەنگوو ٨ ساڵی ۋیەرڎەی، کە حکومەتو ئاکەپە-مەهەپەی حۊڵ مڎۊ ئیراڎە و ویستو گەلو کورڎی دلېنەبەرۊ، بەڵام جە وەران ۋەرو ئانەینە مدرامانۍ و وەرهەڵستیۍ گۊرە هەن. جە ئاکامەنە سیاسەتی فاشیستی، کە جە دژوو گەلوو کورڎی ملۊڕاوە، وەرن ڕوو شکسی بیەنۊ. چی ئاژەنە ئێمە ھورچنیەی ئەنجام مڎەیمۍ. ئی ھورچنیە کریۊ بۊ بە مەڵامەتۍ پۍ ئانەی دەسەڵاتو ئاکەپە - مەهەپەی جە ڕووی سیاسییۊ دمایش پنە بۍ. وەرو ئانەی ئینە پۍ گەلوو کورڎسانی و هێزە دیموکراتییەکا ھورچنیېۋە گرنگا."

چڕیەیۍ پۍ دەنگدەرا جە ئۊروپا

ڕەمزی کارتاڵ چڕیەیش پۍ دەنگدەرا ئۊروپای بۍ و ۋاتش، پێۋیسا گرڎ کەسێوە بە تەمامی و جە گرڎ ڕوۋېوە جە ئەرکەنە با و ۋاتش، "چی ھورچنیەنە تەنیا دەنگدای وەسۍ نییا. پێۋیسا ئینسانەکۍ یانە بە یانە گېڵا و باسو ئەھمیەتو ھورچنیەکا کەرا. پێۋیسا هەنگام بە هەنگام و فرە زیاتەر جە ھورچنیەی وەڵینی دەنگۍ بەدەس بارمۍ. حەرپاسە پێۋیسا ئێمە ئەنجوومەنەکاما، ڕێکوزیا و ڕێکوستەکاما وزمۍ ھەرمانە و بە تەمامی سەرو پەیاوە با. پێۋیسا حەتا ٩و ئایاری واز جە ھەرمانەکاو ۋېتا باردۍ و تەنیا سەرنج وزدۍ سەرو ھورچنیەکا. نەک تەنیا حەر کورڎ، بەڵکم مشۊ گرڎو هێزە دیموکراتییەکا و گروپە ئۊپۊزسیۊنەکا جە دەورو یۊی کۊباوە و دەنگدەرا ڕێکوزا. پێۋیسا ئێمە دەنگ بە پارتو چەپی سەوزی بڎەیمۍ. مشۊ ئێمە گرڎو توانا و دەرفەتەکاما وزمېنە ھەرمانە و دەنگدەرا بیاۋنمۍ بە بنکەکا دەنگدای".

ھ.ش