ڕۊنامەوان عەبدوڵا گۊران: بنەیانەو بارزانی بیێنۍ بە مەڵامەتو شێونای یەکڕیزی نیشتمانی کورڎسانەنە.
نەبیەی یەکڕیزی دلۍ حیزبەکاو پانیشتو کورڎسانینە بەرڎەوام زەرەرۍ فرەش دان بەرژەوەندییەکاو کورڎی، جە ورچنیەکاو ئیجارەو کەرکوکیچنە باجێوە گۊرە مڎەیمێ.
ڕۊنامەوان "عەبدوڵا گۊران"ڕۊو چوارشەممەی جە مېمانداریۍ بەرنامەو ئاژینوو کەناڵوو ئاریان تیڤینە بەشڎاربۍ و هۊرسەنگنایش پۍ مژارەکا، نەبیەی یەکڕیزی جە هۊرچنیایەکاو کەرکوکینە و ئا مەڵامەتۍ کە چارەنویسوو شارەکەیشا وستېنۍ مەترسیۊ.
دەقوو چەمپنەکۊتەکەی پی جۊرەنە:
عەبدوڵا گۊران مواچۊ، پەرسەو کەرکوکی پەرسێوە فرە گرنگە و حەساسەنە، هەرپاسە مواچۊ گلیرگەو کورڎی جە گرڎ ئاخیزەکانە یەک ڕیز نەبیەن پۊکی نەتاوانما سەرکۊتی بیمی، نەبیەی یەکڕیزیچش وست ئەستۊو بنەیانەو بارزانی و پەدەکەی.
" بەرڎەوام پارتی مەڵامەت بییەن پەی پەرتەوازەی دلۍ یانەو کورڎی"
دەربارەو نەبیەی یەکڕیزی جە کەرکوکو کورڎساننە ڕۊنامەوان واتش، بەرڎەوام پارتی مەڵامەت بییەن پەی پەرتەوازەی دلۍ یانەو کورڎی و بەتایبەتیچ بنەیانەو بارزانی گەرەکشا نیا کورڎ یەکدەنگ و یەکریز بۊ، چون پەدەکە بیەن ئەجێنداو بێگانەیی و بیەن دارڎەسو وەڵاتا داگیرکەری بەتایبەتیچ دۊڵەتو ئەرەگیرو تورکی.
درێژەو قسەکاشنە عەبدوڵڵا گۊران، واتیچش نەبیەی یەکڕیزی دلۍ حیزبەکاو پانیشتو کورڎسانینە بەرڎەوام زەرەرۍ فرەش دێنە بەرژەوەندییەکاو کورڎی، جە ورچنیەکاو ئیجارەو کەرکوکیچنە باجێوە گۊرە میەیمۍ و نەتیجەکەیچش دماو ورچنیایەکا وینمێ.
" کورڎ تەنیا قەندیل و کەشەکێش هەنۍ"
هەر دەربارەو حیزبەکا ئا ڕۊنامەوانە مواچۊ جگە جە پەدەکەی حیزبەکۍ تەریچ هەریۊشا بیەن بە دارڎەسو لایێوە تەری. مواچۊ عەرەبی پەشتوپەناشا فرەن و دۊڵەتە عەرەبەکۍ پاڵپەشتیشا کەرا، بەڵام گلێرگەو کورڎی تەنیان و کەس دۊسش نیا، کورڎ تەنیا قەندیل و کەشەکێش هەنێ.
دەربارەو جەدەستای کەرکوکی جە ورچنیایەکاو ئیجارەینە، کە قەرارا ڕۊو دووەشەممەی کریا، عەبدوڵا گۊران واتش، وەڵتەر کاتێوەنە کەرکوک چێرو دەسەڵاتو کورڎی و بەتایبەتیچ دەسەڵاتو هەرڎووە حیزبی دەسەڵاڎداری و حکومەتو هەرێمینە بییەن، نەتاوانشا خزمەتو خەڵکو کەرکوکی کەرا ئینەیچ کەرکوکییەکێش بیتاقەتۍ کەرڎێنێ. ڕۊنامەوانەکە مواچۊ گەر ئیجارە کورڎ چی ورچنیایەنە بەرنەشۊ نەک کەر کوک بەڵکوم حکومەتو عێراقی مۍ تا قەرەهەنجیر.
" تاکە هێز کە پارێزگارییش جە شەنگالییەکا کەرڎ، هێزو پەکەکەی بۍ"
جە درێژەو قسەکاشنە باسو دروشمەکاو پەدەکەیش کەرڎ و واتش پەدەکە سیاسەتش نەتەوەیی نیا، بەڵکوم تەنیا دروشمەکیش نەتەوەیینۍ، بەڵکوم پەدەکە سیاسەتو بنەیانەی کەرۊ هەرکات یۊش گەرەک بۊ مارۊش سەرو دەسەڵاتی.
دەربارەو شەنگالیچ قسێش کەرڎۍ و ماچۊ پەدەکە گەرەکش نیا ئاوارەکۍ شەنگالی گیڵاوە چون گەرەکشا چێرو دەسەڵاتو ویشەنە با پەی ئانەی بەدڵو پەدەکەی جوڵنۊشاوە، بە ڕاو ڕۊنامەوان عەبدوڵا گۊرانی مواچۊ جە شەنگاڵنە هیچ هێزێوە ئنڎەو هېزو وەرنیشتی و پەکەکەی کاریگەرییش نەبیەن سەرو شەنگالییەکا، چون وەختۍ کە شەنگال ئەرەگیر کریا، تاکە هێز کە پارێزگارییش جە شەنگالییەکا کەرڎ، هێزو پەکەکەی بۍ کە فریاو شەنگالییەکا کەوت.
