دماو ئامەدی حەدەکە و دەم پارتی و تەژەئا نەخشەڕاو نەورۆزیشا ئەستەنبوڵنە وەڵا کەردۆ و ئەرەیاوناشا کە پێوە مجیارە مەیڎانەکا. ئەرەیاونایەکەنە ئامان، "وەختوو ئانەینە پەی ئازاڎی و سەرکەوتەی ورزمێ سەروو پایا."
کۆنگرەی دیموکراتیکوو گەلا (حەدەکە) و جمیەروو ژەنە ئازاڎا (تەژەئا) و پارتوو یەکسانی و دیموکراسیی گەلا (دەم) سەبارەت بە ئاهەنگوو نەورۆزو ئێساڵوو ئەستەنبوڵی ئەرەیاوناشا. جەماوەرێوە فرە بەشدارییشا جە وەڵاکەرڎەیۆ ئەرەیاونایەکەینە کەرد "وەختوو ئازاڎی و سەرکەوتەین". بەیاننامەکە جەنگیز چیچەک، هامقسەکەروو حەدەکەی و پەرلەمانتاروو دەم پارتی ئەستەنبوڵی واناوە.
بەیاننامەکە بە نامونیشانوو "وەختوو ئازاڎی و سەرکەوتەین! ورزدێ سەروو پایا!" وەڵا کریاوە: "نەورۆز گەلاو ئاسیای و وەرکەوتوو دلێڕاسەی وێششا دلێنە ویناوە، خاوەندارییش کەرا و پا بۆنەوە ئاهەنگ گێڵنا؛ تارێخەنە، کولتووروو مدرامانی و سەرەورداین پەی گەلوو کوردی و گەلوو کورڎسانی دژوو ستەمی. هەلومەرجێوە چانەن کە نەریتوو دەوڵەتی یۆگێرتەی فاڕۆ پەی فاشیزمی ئایینی، نەتەوەپەرەسی، ڕەگەزپەرەسی، نەورۆزوو ٢٠٢٤ ڕۆو دەسوەردای و تەسلیمیەتی نییا و باوڕشا بە سەرکەوتەین بە ڕۆحۆ یۆگێرتەیۆ کوێ باوە.
فشاروو سەروو کوردا، عەلەوییا، هەژارا، کرێکارا، ژەنا و گەنجا پەی ئانەینە تەسلیموو سیاسەتی و تندوتیژیی فاشیزموو ئاکەپە-مەهەپەی با. عەلەمەو ئازاڎی کە ڕەمزەو کۆشیای کاوەی ئاسنگەرینە دژوو ئەژدەهاکی، ڕاما ڕۆشنە کەرۆوە.
پەی ئازاڎی و کۆشیای گەلوو کوردی، کە ئامانجوو 'زەنگۆڵماڕا'ی ڕژێمی فاشیستیین، نەورۆز بە ڕۆو سەرەورادی دژوو ستەمی ئشناسیان و گرنگیی وێش هەن. نەورۆزوو ئێساڵی پەی گەلوو کوردی کە دەیان ساڵێن ئیرادەو ئازاڎیی وێشا بەروستەن، فاڕیۆ پەی بۆ ئاویروو کەمپەینوو 'ئازاڎیی پەی ڕابەروو گەلوو کوردی عەبدوڵا ئۆجالانی، چارەسەری دیموکراتیک پەی کێشەو کوردی'.
گۆشەگیریی ڕەها سەروو ڕابەروو گەلوو کوردی بەڕێز عەبدوڵا ئۆجالانیرە سەپییۆ، کە ٢٥ ساڵێن بە سیستموو ئەشکەنجەو ئیمرالی ئەرەگیریان و ماوەو ٣ ساڵی ویەرڎەینە حیچ زانیاریێوەش سەر نیا. پێسە چەنی کاوە مەزڵوم دۆغانی هامچەرخ بە یەرێ چڵە شقارتێ ڕاو ئێمەش ڕۆشنە کەردۆ، ئارۆیچ بەڕێز عەبدوڵا ئۆجالان ئێمە گەلەکەماش بە 'گەلوو نەورۆز'ی پێناسە کەرد، ئێمە سیستموو ئەشکەنجەو ئیمراڵی دلێنە بەرمێ.
فاشیزموو ئاکەپە – مەهەپەی بە سیاسەتوو جەنگی تایبەتی کورڎساننە هەوڵێ هجوومکەرڎەی سەروو گەلوو کوردی و بەرکەرڎەیش خاکەکەشنە مدۆ. ئەوەڵ ئەستەنبوڵنە، فاشیزم سەرمایەداری نەتەوەپەرەس گردوو تورکیای بەرەو وەڵێ بەرۆ. هەرپاسە تۆموو دووەبەرەیی بەینوو گەلانە وەڵا کەرۆوە. سیاسەتی ئەرەگیرکاری وەرنیشت و پانیشتوو کورڎسانینە بەرڎەوام کەرۆ، ئانەیچ هۆکارێوەن پەی مەنەیۆ هامپەیمانی ئاکەپە و مەهەپەی دەسەڵاتنە.
ڕاوەبەرڎەی سیستموو ئەشکەنجەی ئیمرالیینە وەراوەر بە بەڕێز عەبدوڵا ئۆجالانی جە ڕاو دەوڵەتەکەیشۆ کەرۆ، بە دژایەتیکەرڎەی میللەتی جە ڕاو نەتەوەپەرەسی، ئایین، ڕەگەزپەرەسییوە کەرۆ. بەڕێز عەبدوڵا ئۆجالان بە وەڵیوستەی چارەسەروو نەتەوەی دێموکراتیکی ئیسفادێوە گەورەش بە کۆشیای چەوسیاوەکا بەخشا، پەوکای وەختوو ئانەین تەوقە و گۆشەگیری، کە ئیمرالیینە دەسش پەنە کەرڎەن و بە ئاویروو نەورۆزی گردوو گلێرگەیرە وەڵا کریۆوە. وەختوو ئانەین ئا هومێدە کە ئاویروو نەورۆز کۆشیای یۆگێرتەو گەلوو تورکیای و کورڎسانی ڕۆشن بکەرۆوە. وەختوو ئانەینە کۆشیای کۆمارێوە دێموکراتیکی دەوروو یۆینە کوێ بیمێوە.
پێوە مجیەیمێرە مەیڎانەکاو نەورۆزی و بیمێ بە دەنگوو زیندانییە نەوەشەکا، شۆڕشگێڵناو کوردی و گەلوو تورکیای کە بە شێوێوە نایاسایی زیندانەکانە گیریێنێ و بەشدارێنی جە چالاکیی مانگێرتەی جە وارڎەی.
