سنووقو ئەرەنیشتا نەتەوە یۆگێرتەکا (UNFPA) ئارۆ یەرەشەمە جە ئەرەیاۋنێوەنە تەئکیدش کەرڎۆ "جە ئەرەگیری ڕووسیایۆ جە شوباتو ٢٠٢٢ ێوە تا ئیساتۍ، ژمارەو ئەرەنیشتا ئۆکرانیای زیاتەر جە ١٠ ملیۆنا کەمش کەرڎەن".
ڕاوەبەرو هەرێمیی (UNFPA) فلۆرێنس باوێر، جە کۆنگرێوە ڕۆنامەوانینە ژنێڤەنە واتش: "ژمارەو ئەرەنیشتا ئۆکرانیای جە سەرەتاو جەنگیوە تا ئیساتۍ بەگرڎیی زیاتەر جە ١٠ ملیۆن کەسا کەمش کەرڎەن".
وەڵۍ جەنگیچەنە کێشەو دیمۆگرافی بۍ
باوێر مەڵامەتوو ئینەیش گێڵناوە پەی "کەڵەکەبیەی فاکتەرەکا" و واتش "وەڵۍ جەنگیچەنە جە ئۆکرانیانە کێشەو دیمۆگرافیای گۆرەی بۍ". جە درێژەنە واتش "ئۆکرانیا یۆن چا وڵاتە ئۆروپیا ڕێژەو جە ئەڎابیەیش فرە کەما. فرەو کەسایچ ئا کاتەی دەرفەتشا پەی ڕەخسیان وڵاتەکەشا جیائاستەن. ژمارەو ئەرەنیشتا ڕووەش جە پیری زیاتەری و کەمبیەیۆ کەردەن.
ئی ئاژە جە ئۆروپاو ۋەرکۆتینە ئاڼنە نائاسایی نییا، چونکی جە چڼین وڵاتانە فاڕیای دیمۆگرافیی چامنەشا بە ۋێشاوە دیەن. بەڵام جە ساڵەو ٢٠٢٢ ێوە بە دەسپنەکەرڎەو ئەرەگیری ڕووسیای ئی ئاژە خراپتەر بی".
یۆن جە کەمتەرین ڕێژەکاو جە ئەڎابیەی جە جەهانەنە
هەر جە درێژەو قسەکاشەنە واتش: "ڕێژەو جە ئەڎابیەی یاوان کەمتەرین ئاست، کە هەر ژەنێوە زاوڵێوەش وەرگنۆ، ئینە یۆن جە کەمتەرین ڕێژەکاو جەهانی و فرە ئینا چێرو سنوورو تازەکەردەیۆ ژمارەو ئەرەنیشتەکەینە کە مشۆم هەر ژەنێوە لاو کەمیۆ ٢،١ زاوڵێش وەرگنا".
جە دماینە ئاگایش دا: "هەرپاسە ٦،٧ ملیۆن ئینسانۍ جە ئۆکرانیانە بڕەمێنۍ و ژمارێوەیچ بەمەڵامەتو جەنگیوە مەردێنۍ.
ژمارەو ئەرەنیشتا ئۆکرانیای جە ٢٠٢٠ ەنە بە ٤٤ ملیۆنۍ و جە ٢٠٢٢ ێنە بە ٣٨ ملیۆنۍ تۆمار کریابۍ".
