گەلو کەرسو شەنگالینە ئاهەنگو نەورۆزی بە سەرمەشقایەتیی مەجلیسو ڕاوەبەریی شەنگالی بە درووشمو "ئازادیی پەی ڕابەر ئاپۆی، وێڕاوەبەریی پەی شەنگالی" دەسش پەنە کەرد. ئەوەڵ پەیامو ئیدارەو وێڕاوەبەریی شەنگالی وئەرەمەرزیا و دەزگاکاو جڤاکو ئێزدی، لاو هامسەرۆکو دەسەو ڕاوەبەریی شەنگالی ڕیهام حەسەنیوە ونیاوە.

ڕیهام ئاماژەش بە گرنگیی نەورۆزو  ئێساڵی کەرد و قسێوە گەشمەردە مەزڵوم دۆغانی، کە زیندانوو ئەمەدیەنە واتەش "مدرامان ژیواین، تەسلیمبییەی خیانەتا" و ئاویرش وەردا جەستەیش و نەورۆزش کەردۆ، دمایی جە کەسێتی مەزڵوم و زەکیە و ڕەهشانی و گردو گەشمەرداو شۆڕشیش یادێ کەردێوە و واتش: "پێسە چەنی کاوەی ئاسنگەر وەراوەرو زوحاکیوە مرداوە، دماییش بە ستەمەکەیش ئارد، ئارۆیچ ئێمە بە ڕۆحو نەورۆزی و فیکرو ڕابەر ئاپۆیۆ دمایی بە ئەرەگیرکاریی تورکی و خیانەتو بنەیانەو بارزانیی مارمێن".

ڕیهام ئەرەیاوناش بە وەعدو "ئازادیی پەی ڕابەر ئاپۆی، وێڕاوەبەریی پەی شەنگالی" مدرامان گەورەتەر مکەرمێ، مزانیی تەڤگەرو ئازادی جە نەورۆزو ئێساڵینە پێسەو قۆناغێوە تازەی پەی گەلە ئازادیوازا ئشناسا و واتش: "ئی مزانییە فرە پەڕ مانان، چونکوم دەوڵەتو تورکی بە تەکنیکو وێش هجومێ کەرۆ سەرو گردو گەلە ئازادیوازا، گرد گورزێوە وەنەو دوژمنی پەی ئێمە مانادارا".

پەیامەکەنە ئەوەخوای کریاوە گەلو ئێزدی گێڵێنیوە یاگێ وێشا، تا شەنگالێوە ئازاد و وێڕاوەبەر مدرامان کەرانێ و پلانەو دوژمنی پەی چۆڵکەردەی شەنگالی پووچەڵە کەرانێوە و سەرێ گنا، ماچۆ: "جۆشو نەورۆزو وێما مکەرمێ بە سەوقاتو ڕابەر ئاپۆی و جەنگەواناو ئازادی، ماچمێ، "بژیوۆ سەرۆک ئاپۆ، بژیوۆ نەورۆز، مدرامان ژیواین و تەسلیمبییەی خیانەتا".

مەشخەڵەو ئاویری لاو ئەداو قسەکەرەو تەڤگەروو ئازادیی ژەناو ئێزدی (تاژێ) ڕیهام حەجۆیۆ کریاوە و دمایی  گرووپوو ورپڕای ئامێ سەرو شانۆی.

ئاهەنگەکە بە گۆرانیێ فۆلکلۆریێ لاو موراد فەقیریوە دەسش پەنە کەرد.

هونەرمەندا ئیدۆ چەلکی و فەرمان هەورامی و بەربانگ هلات، هونەرمەنداو ناوەندو چاندی و هونەرو شەنگالی بەرهەمو وێشا پێشکەش کەرد و ئاهەنگەکە تا دما سەعاتەکاو وێرەگای خوایناش.