نەورۆزوو ئامەڎیی: دروشمەو 'بژیۋۆ سەرۆک ئاپۆ'ی جە مێڎانەکەنە دەنگ مڎۊوە
مێڎانوو نەورۆزوو ئامەڎیی بە چن سەعاتۍ وەڵۍ دەسپنەکەردەو بەرنامەکا مبارەکبایینە بە دروشمەو 'بژیۋۆ سەرۆک ئاپۆ'ی پەڕ بیەن.
مبارەکباییەکۍ جەژنەو نەورۆزوو ئامەڎیی کە بە دروشمەو ' هوربێزدۍ وەخت وەختوو ئازاڎیی و سەرکۊتەیا' جە پارکوو نەورۆزوو رەزانینە ملۊڕاوە دەسش پنەکەرد.
شانۆو مبارەکباییەکەی بە لافیتەو 'زۋانوو ئێمە شکۆو ئێمەن' و 'گەنجا گەرنتی ئازاڎینۍ' ڕازیانۆ.
حەرپاسە جە مێڎانەکەنە وێنەکۍ کەمال کورکورت، دەنیز پۆیراز و ژینا ئەمینیۍ هۊرواسیێنۍ.
جە دلێینەو بەروو وڵاتیۆ ژمارێوە فرە مێمانۍ خوڵقە کریێنۍ. ئا ئەڎۍ کە پەی ئازاڎیی رابەروو گەلوو کوردی عەبدوڵا ئۆجالانی ئینۍ ئێشکگیریی دادپەروەرینە بەشدارییشا جە نەورۆزەنە کەردەن.
ۋارانێوە بە لێزمە وارۆ و دروشمەو 'بژیۋۆ سەرۆک ئاپۆ'ی دەنگ مڎۆوە
جە ٦ خاڵۍ جیاجیێوە بە دەیان هەزار کەسۍ بە ئاڵاکاو دەم پارتیوە بەرەو مێڎانوو نەورۆزی خرۆشیێنۍ. جەماوەرەکە سەرەڕاو ۋارانۍ بە لێزمەی، دەسشا بە گۊرانی و هۊرپڕای کەردەن.
جە مێڎانوو نەورۆزیوە دروشمەکاو "بژیۋۆ سەرۆک ئاپۆ" و "بژیۋۆ مدرامانوو زینڎانەکا" ئێژا بۆ. حەرپاسە پەیامی پەیوەس بە ئازاڎیی جەستەیی عەبدوڵا ئۆجالانی وچیۆوە.
بەشداربیەی فرەو گەنجا سەرنج کێشا. گەنجا کە بە ئاڵاکاو دەم پارتی، بە واتەیۆ گۆرانیا ۋێڕاگری جۆش و خرۆشی گەورەشا بە مەراسیمەکەی بەخشان. بەشێوە ۋەرچەموو بەشدارا جلوبەرگی نەتەوەییشا ئینا ۋەرەنە.
مبارەکباییەکە بە جۆش و خرۆشۍ فرۆ بەردەواما.
